17.07.2019

17.07.2019 श्रावण (सावन) गटॖ पछॖ (कृष्ण पक्ष) ऒक्दॊह (प्रथमा), ब्वदवार (बुधवार)श्री सप्तर्षी सम्वत 5095, राश मकर (चलान) ऋतॖ वर्षा (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: शाल च़ऺलिथ बठ्यन लोरि
    अ: ख़तरॖ टऺलिथ रोब हावुन/
         बऺल्य क्रकॖ नाद
2. मु: शाल शाल ब्यॊन ब्यॊन
         टुंगि विज़ि कुनी
    अ: ज़ऻती दुश्मनी ॴसिथ ति
         इतिफ़ाक आसुन
3. मु: शाल गव क्वलि ज़ि आलम
         गव क्वलि
    अ: युस मरि तसॖन्द्य किन्य छु
         दुनियाह मरान
4. मु: शामॖ च़ॊतुर तॖ मंदिनि बॆह-
         वाल
    अ: दॊहलि कऻम न करनवोल
        तॖ रातस चालऻकी/कामि च़ूर
5. मु: शऻल्य तारख हावॖन्य
    अ: अपुज़ दऺलील बोज़ॖनऻविथ
          दोखॖ द्युन/अपुज़ व्वमेद
          पऻदॖ करॖन्य/नूनॖ गुर्य तॖ तेलॖ
          तलाव हावॖन्य
**************************
1. राब..... Molasses/Gold-
                en syrup (used
                in tobacco)
2. राबर....Muddy/Liquid
               moisture
3. राथ.....Night/Yesterday
4. रऻत्य रातस..For the whole
                     night
5. राथ प्यॆठ्य प्यॆन्य...Have a
          long and wearisome
          night
6. रातस प्यठ....For the night
7. राथ द्वह .....Day and night
8. राथक्युथ....In the night/
          Night time/Very late
9. राथ लगॖन्य....Have to
                    spend a night
10. रातॖ क्रॗल....Bat
**************************
       गीता ज्ञान  :अध्याय 14
 रजोग्वन बडनॖ सॗत्य लूब बडान,अशऻन्ती हवस स्वकाम कर्मन लगान। विशय बूगन हॖन्ज़ यछ़ा पऻदॖ सपदान
वॊन भगवानन गीता ज्ञान
**************************
बऺहसॖ बऺहसय ह्च़ॖन लगॖन्य व्हाटसापस प्यठ। मज़मून छु कर तरव तॖ किथॖ पऻठ्य तरव कऺशीरि। कुनुय कुनुय नफ़र तर्या किनॖ अयाल ह्यथ तरि। यि सोरुय बऺहस छु बस कॆंच़नॖय म्यान्यन बायन पानॖवुन्य चलान रोज़ान। बासान छु ज़न सारी समाज्युक ठेकॖ छु तिमवॖय रॊटॖमुत। म्यॆ छु याद ज़ि अकि फिरि ॴस्य यार ज़ॖ फोनस प्यठ कथ करान ज़ि यि वतन कुस छु चलावान। बऺहस लॊग तॖ ॳक्य वॊन ब्यॆयिस ज़ि सिरिफ छि बस ॳसीय ज़ॖ वतन चलावान। दॊयिम यार गव हऻरान यि बूज़िथ तॖ प्रुछ़नस किथॖ पऻठ्यन। ग्वडनिक यारन द्युतनस गऺन्ज़रऻविथ हिसाब तॖ वॊनॖनस मानव ज़ि आबऻदी छि हथ नफ़र, अमि मंज़ॖ छि अरनमथ तिम यिम नॖ वतन चलावान छि बऺल्कि बऺहसस मंज़ पनुन वख कडान। अरनमतस मंज़ गऺन्ज़रऻव्य तम्य तिम यिम कऻद खानन मंज़ बिहिथ  छि वतनॖच नॖ फिकिरिय, साधू-संत यिम बीछिथ अनान छि तॖ ख्यवान छि, नेता छि यिम पनॖन्य चन्दॖ बरान छि तॖ वतनुक च़ुक छुख नॖ, ल्वकॖट्य शुर्य, बु़ज़र्ग, नऻतवान, वगैरा वगैरा तॖ दॊपनस अति बचेयि च़ॖ तॖ बॖ यिमन वतनुक च़ुक छु तथ प्यठ छुख च़ॖ सिरिफ बोज़ानॖय योत तॖ च़ुक छु म्यॆय योत यॆमि वतनुक। सोय बऻश्य छि यिमन म्यान्यन बायन व्हाटसापस प्यठ गऺमॖच़। तिमन छु बासान ज़ि बाकय छि कनस बतॖ लदान तॖ यिमय योत निन फऻसलॖ कऺरिथ सारी समाजुक। रामॖ लगय चानि लीलाये।
**************************
"परन परन ज़्यव ताल फऺजिम
च़्यह युग्य क्रय तऺजिम नॖ ज़ांह
सुमरन फिरन न्यॊठ तॖ ऒंगज गऺजिम
मनॖच दुय मालि च़जिम नॖ ज़ांह"
पऺरिव यि लल वाख ति दॊहय
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)