20.07.2019

20.07.2019 श्रावणॖ (सावन) गटॖ पछॖ (कृष्ण पक्ष) त्रय (देवादेव)(तृतीय) बटॖवार (शनिवार/शनिश्चरवार) श्री सप्तर्षी सम्वत 5095, राश कुम्भ(चलान), ऋतु वर्षा (चलान) द्रठॖपऻन्च़ुक (पंचक)(चलान)...अज़ छि संकटॖ च़ोरम (संकट निवार्ण चतुर्थी) ति
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ। पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1.मु: क़र्ज़न छु चोमुत आबे हयात
    अ: क़र्ज़ छु नॖ वखतस प्यठ
         नखॖ वसान
2. मु: क़तरॖ क़तरॖ छु दऺर्याव समान
    अ: रछ़ रछ़ कऺर्यथॖय छि कऻम
         अंद वातान
3. मु: फ़कीर च़ाव आंगन होन्यन
         वॊथ लचि दॊद
    अ: हंगॖ तॖ मंगॖ कऻन्सि हुन्द
         अज़रवुन युन
4. मु: क़ऻज़िस तॖ लांछ़स मेल क्या
    अ: यिमन नॖ कांह बराबऺरी
         आसि तिमन हिशर छ़ान्डुन
         छु फ़ज़ूल
5. मु: क़बलि छुम पनुन च़्यॆ क्याह
         ओर सनुन
    अ: पनॖनिस मामलस मंज़ नॖ
        ब्यॆयिसॖन्ज़ मुदाख्लत पसंद
        यिन्य
**************************
1. छ़ऺर..... Empty/Vacant/
               Unoccupied/Un-
                filled
2. छ़टुन....Winnow
3. छ़टॖनावुन.......To get win-       
                          nowed
4. छ़ल......Water-wheel
5. छ़लुन....To deceive/To
                 mislead/To
                 dodge/To cheat
6. छ़ान्ठ..... Swimming/
                   Floating
7. छ़ारुन..... To search/To
                  investigate/To
                 spot
8. छ़ाय......Shadow/Shade/
              Reflection/Image
9. छ़ाल.....Jump/Leap
10. छ़्यन....Break/Separa-
                   tion
**************************
        गीता ज्ञान  :अध्याय 14
 सातविक फल स्वख शऻन्ती ब्यॆयि ज्ञान, राजस फल द्वख रूपी आसान, तामस कर्मन हुन्द फल सिरिफ अज्ञान।
वॊन भगवानन गीता ज्ञान
**************************
वथ छि यऺच़ सारिनॖय मगर क्वस वथ कॊतकुन छि गछ़ान तॖ क्वस वथ पज़ि रटॖन्य, तमि बापथ छु वतॖहावुक सुन्द आसुन ज़रूरी। गाह सु गरस मंज़ मोल मऻज्य आसि, च़ाटॖहालस मंज़ व्वसताद आसि या सफ़रस मंज़ कांह वति हुन्द ज़ऻन्यकार आसि। अध्यात्मुक ज्ञान ज़ाननवोल आसि या कांह निस्वार्थ यार दोस्त आसि। वतॖहावुक गछ़ि आसुन। वुछनस तल छु यिवान ज़ि असि छि अज़कल व्यछ़य वातहावकन हॖन्ज़। स्यॆज़ तॖ पऺज़ वथ हावन वऻल्य छि नॖ नज़रि यिवान। अथ मंज़ कांह शक छु नॖ ज़ि असि आव पौंस मगर पोंसॖव सॗत्य छि नॖ ह्यकान संस्कार मऺल्य ह्यथ। संस्कार छि यिवान पनॖन्यन ज़िठ्यन सॗत्य सॗत्य रोज़नॖ सॗत्य, तिहॖन्द्यव तजरुबव सॗत्य, तिहॖन्द्यव प्रवचनव सॗत्य मगर असि आव छ़्यन पानस मंज़। ब्यॊन ब्यॊन गऺयि। ज़ऻन्यकार ज़िठ्य रूद्य नॖ। ॳस्य छि आमॖत्य वुनक्यनस च़ु-वऺतिस प्यठ। फिकिरी छु नॖ तरान क्वस दिशा रटव। अकि तरफॖ ह्यॆच़ॖन्य सऻन्य माजि ज़्यव कऻशिर असि निशि दूर गछ़ॖन्य पनॖनि अक्लि, दॊयिमि तरफॖ रऺट पर-ज़ऻच़ मंज़ शुर्यव-कट्यव खांन्दर करनॖच तेज़ रफ़्तार, प्रथ ॳकिस गरस मंज़ छि प्रथा अज़कल  बनॆमॖच़ ज़ि अख या ज़ॖय शुर्य गछ़न आसॖन्य।  मऺशरावॖन्य ह्यॆत्य  पनॖन्य संस्कार कुनि न तॖ कुनि बहानॖ। यिम सऻरी अलामात आयि असि ब्रूंठ्य तॖ ॳस्य छि बन्यॆमॖत्य बेलगाम गुर्य तॖ लाकम रट्नवोल छु नॖ नॊन कुनि। दय गछ़ि असि पनुन अनुग्रह करुन न तॖ छु मुश्किल पनॖन्यन ज़ंगन प्यठ खड़ा रोज़ुन
**************************
"शिलायि हॖन्ज़ॖय व्वतमा बऺज़ॖम
सॊम्बरिथ ट्यॊक पोन्य आसन पठ
मनस अंदर व्यच़ार कॊरुम
वुछुम तॖ ड्यूंठुम शिल कनि वठ"
पऺरिव यि लल वाख ति दॊहय
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
 नऺविव तॖ फॊलिव
   भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)