04.07.2019

04.07.2019 हारॖ (आषाढ) ज़ूनॖ पछॖ (शुक्ल पक्ष) द्वय (देवादेव) (द्विती) ब्रसवार (वीरवार/ब्रहस्पथवार/गुरुवार)श्री सप्तर्षी सम्वत 5095, राश कर्कट (चलान) ऋतु ग्रीष्म (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: ताबस छु लाब
    अ: ताब करनस छु फऻयदॖ
         मेलान
2. मु: तालवस लोरि काह जंगॖ
         विज़ि नॖ कांह
    अ: मॊकॖ विज़ि नॖ चीज़ अथि
         युन
3. मु: ताह करतम शाह करथ
    अ: चीज़स वातॖनॖ सॗत्य छु
          चीज़स दार न्येरान
4. मु: तापॖ सॗत्य दऻर छऺछ़रऻवमॖच़
    अ: वख ज़ायि कऺरिथ ति कॆंह
          हऻसिल न सप्दुमुत
5. मु: तछान तछान नशान कॊह
    अ: लगातार कूशिश करनॖ
         सॗत्य छि मुश्किल कऻम ति
         अंद वातान
**************************
1. ताअबद....For the whole
          life unto eternally/
          Ever lasting
2. ताब..... Patience/Endu-
                rance
3. ताब अनुन.....To show
          patience/Suffer
          silently/Endure
4. ताब करुन...To be patient
5. ताब नॖ अनुन...To be impa-
          tient/Be unable to
          endure
6. ताबवुन/ताबान...Shining
7. ताबेदार....Loyal/Servant/
                   Obedient
8. ताफ़.....Sunshine/Sun-
                light
9. तापस थवुन....To keep in
            sun/To put in the
            sunlight/To keep
            pending
10. तापॖ तॊत....Heated in
                        sun
**************************
     गीता ज्ञान - अध्याय 13
हे अर्ज़न अकी सिर्यि सॗत्य सपदान यि सोरुय ब्रह्मांड प्रकाशमान
अख आत्मा सोरुय क्षेत्र प्रज़लावान
वॊन भगवानन गीता ज्ञान
**************************
अड्यन अश तॖ अड्यन खश, ॳड्य ख्वश तॖ अड्यन व्वश, अड्यन आयि न्वश तॖ अड्यन द्रायि न्वश यल दिथ तॖ आयि नॖ फीरिथ ब्यॆयि वऻरिव। ॳजीब हालाथ छि यिवान नज़रि  अज़कल तॖ त्रऺहरान छु इन्सान यि वुछिथ। सऻनिस समाजस मंज़ छु अज़कल ब्यॊन ब्यॊन गरन मंज़ रंगॖ रंगॖ रंग गछ़ान। कूर छि लडकस प्रॖछ़ान खान्दरॖ ब्रौंठॖय ज़ि च्यऻनिस गरस मंज़ कऻत्याह डस्टॖबिन छि। लऺडकॖ बिचोर स्यॊद सादॖ ब्यूठ मनॖ मंज़्य गऺज़रावनि तॖ वॊनॖनस पांछ़ मगर च़्यॆ प्रुछ़ुथ क्याज़ि। जवाबस मंज़ वॊनॖनस कोरि तिमन डस्टॖबिनन क्याह छु म्यॆ करुन। बॖ छस ज़ानुन यछ़ान ज़ि तुहन्दिस गरस मंज़ कऺच़ बुज़ुर्ग छि यिमन म्यॆ खान्दरॖ पतॖ प्यॆयि ख़ऺदमत करॖन्य। लडकॖ गव परेशान तॖ ज़न रॊटुख च़ूरि प्यठ। क्याह जवाब दीहे अथ सवालस। नमस्कार कॊरनस तॖ दॊपनस बॖ छुस अनॖहूरॖय जान। अदालतन मंज़ दपान कऻशिर्य बट्टॖ छि पनॖन्यन कोर्यॆन तॖ न्वशन हॖन्द्य न्याय ॳन्ज़रनस मंज़ लऺगिथ यितॖ गछ़ करान। महाराष्ट्रस मंज़ आव रूदॖ सॗत्य सऺहलाब तॖ मूद्य वारियाह, यपऻर्य छु नॖ रूदुक वुनि नामोनिशाना कॆंह मगर तापॖ च़न्जि सॗत्य ति आयि ॳस्य कऻशिर्य बट्टॖ ज़्यादय पाहन ह्यनॖ। यथ नॖ हऻल ॴस ती छि वुछान तॖ भगवानस प्रछ़ान ज़ि ब्यॆयि कॗतिस कालस छु यि अज़ाब असि तुलुन।
**************************
"पूजितोsसि मया भक्त्या भगवन त्वम् स्मादरात्।
ब्रह्मरूपोsसि मे स्वान्तं विश विश्रान्ति हेतवे।।"
पऺरिव यि मंत्र ति दॊहय
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)