30.07.2019

30.07.2019 श्रावणॖ (सावन) गटॖ पछॖ (कृष्ण पक्ष) त्रुवाह(देवा-
देव) त्रयोदऺशी, बॊम्वार (मंगलवार)
श्री सप्तर्षी सम्वत 5095, राश मिथुन(चलान),ऋतु वर्षा (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: याजि पऻजामॖ
    अ: बे-रब्द/बे-वऺतीरॖ
2. मु: या गछ़ि बनुन न तॖ क्याह
         वनुन
    अ: कऻम अंजामस ताम वऻतिथ
          गछ़ि थ्यकुन
3. मु: यार ज़िन्दॖ सेहतयऻबी
    अ: ज़िन्दॖ ज़ुवय छि प्रॖछ़गऻर
4. मु: या च़लुन या च़ालुन
   अ: यॆमिस नॖ त्वछ़ आसि तऺमिस
        पज़ि नॖ मऻदानस मंज़ वसुन
5. मु: या पूर नतॖ दूर
    अ: कऻम अंद वातॖनावॖन्य नतॖ
          नॖ मटि ह्यॆन्य
**************************
1. शाबाश.....Well done/
             Excellent/Brave/
             Buck up
2. शाख़........Branch
3. शाख़-तरऻशी....Cutting/
         Pruning of branches
4. शाद......Glad/Pleased/
            Joyful/Cheerful
5. शादमऻनी.... Happiness/
                       Rejoicing
6. शादाब....Green/Lush/
          Radiant with health
7. शऻद्य...Marriage/Delight/
              Pleasure/Wedd-
              ing/Rejoicing
8. शऻद्यमर्ग.....Death from
                     sudden joy
9. शास्त्र..... Knowledge of
             scientific treatise/
            Hindu code of law
            having religious
            sanction
10. शास्त्री.....A scholar of
             scientific treatise/
          One skilled in Hindu
          law
**************************
        गीता ज्ञान  :अध्याय 14
ज्ञऻनी टोठ अटोठ ह्युवुय ज़ानान,
न्यॆन्दाय तॖ तऻरीफ़ ज़ानान समान
न कुन्युक ग़म न खुशी आसान
वॊन भगवानन गीता ज्ञान
**************************
मुबारक छु असि कऻशिर्य बटन ज़ि असि छु आमुत न्यमंत्रन कऺशीरि प्यठॖ संदीप मावा सऻबुन। दपान तऺम्य छि सानि बापथ व्यवस्था कऺरमॖच़ ज़ि युस ति कांह यॆछ़ि कऺशीरि वापस गछ़ुन तॖ तति बसुन तऺमिस पज़ि संदीप जियस सॗत्य रऻबितॖ कऻयिम करुन तॖ सु करि ब्यॆहनॖच व्यवस्था मुफुत कम से कम श्यन रयतन यॊताम सु पनुन ख्वर सम्बालि। यि छु संदीप जियन बडॖ नफ़ीस क़दम तुलमुत तॖ आफ़रीन तॖ मरहब्बा छु ॳम्यसॖन्दिस यिथिस रॖतिस ख़यालस प्यठ। यि छु हऻविथ दिवान ज़ि कोताह च़ुक छु संदीप जियस पनॖनि समाजुक। बोज़ान ओसुस ज़ि तऺमिस छि पानस तति बिहिन किछ़ जाय तॖ ततिक्यन लूकन हॖन्ज़ माय ति क्याज़ि तऺमिस छि आश्यन्य तति ची अख मुसलमानबाय। यॊदवय सऻनिस समाजस मंज़ कऻन्सि यछ़ा छि वापस कऺशीरि तरनॖच, यि छस रॖच़ राय वुन्यक्यनस संदीप जियिन्य तॖ तऺमिस पज़ि तऺम्यसॖन्दिस लोलस लोल बरुन तॖ मऺशरावुन ज़ि अज़ त्रॖह वऺरी ब्रौंठ क्याह क्याह सितम आयि, मऺशरावुन पज़ि सु क़हर युस तिमव तुल नमतस मंज़ तॖ किथॖ पऻठ्य च़ऺलरऻविख कऻशिर्य बट्टॖ रातो राथ। हऻरान छुस बॖ  पऺरिथ संदीप जियुन यि न्यमंत्रन व्हाटसापस प्यठ तॖ सौंचान छुस ज़ि यिथ्य हि नफ़र कमि म्यॆच़ि हॖन्द्य छि भगवानन बनऻवमॖत्य। हऻरान छुस बॖ यि वुछिथ तॖ बूज़िथ या पऺरिथ ज़ि समान किथ पऻठ्य छु यिमन बुथ तॖ खुले-आम युथ ह्यु शर्मनाक न्यमंत्रन दिवान। मऺत्य आब। पूरॖ मऺत्य आब। अकि तरफ़ छि मुफ़्ती महबूबा तयार कऺशीरि तलातुम तुलनॖ बापथ याम धारा 35A या 370 हटावनॖच घोषणा गछ़ि, अकि तरफ़ छि सऻन्य कॆंह ततिकिस अलगाव-वादस सॗत्य नालो नाल, ब्यॆयि तरफ़ॖ छि आतंकवऻद्य प्रारान सऻनिस वापस तरनस ताकि तिमन यी ब्यॆयि अकि फिरि असि सॗत्य च़ूरि च़ूरि तॖ मारा मऻरी गिन्दनस मज़ॖ। यि कॆंछ़ा असि बचोमुत छु तथ क़ब्ज़ॖ करनॖ बापथ छि तिम सऻनिस स्वागतस प्रारान। क़ऻतिल छि मुर्यन मंज़ ज़ागि असि ज़ि कर तरव ॳस्य तॖ कर यी वऺसिथ ब्यॆयि पऺस्य। यि मॆहर मा गछ़ि असि पनॖन्यन हॖन्दी दऺस्य म्यॆ छु फ्रठ।
**************************
"आंचार हऻन्ज़न हुन्द गोम कनन
नदुर छुय तॖ ह्यॆयिव मा
ति बूज़ त्रुक्यव तिम रूद्य वनन
च़ेनुन छुवॖ तॖ च़ीनिव मा"
पऺरिव यि लल वाख ति दॊहय
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
 नऺविव तॖ फॊलिव
   भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)