23.07.2019

23.07.2019 श्रावण (सावन) गटॖ पछॖ (कृष्ण पक्ष)शॆयम(देवादेव)(षष्ठी)बॊम्वार (मंगलवार),श्री सप्तर्षी सम्वत 5095, राश मीन (चलान) ऋतु वर्षा (चलान)द्रठॖपऻन्च़ुक (पंचक) (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: खितॖ खितॖ गॊच़ॖर
    अ: स्व ज़नान यॊस असुन तॖ
         असुन त्रावि/ज़्यादॖ असन
         वाज्यन
2. मु: खऻस्य ठिलॖ
    अ: लऺठ्यकिंजि गिन्दनॖ विज़ि
         यॆलि हारन वऻलिस ज़्यॆनन
         वऻलिस सवऻर्य दिन्य छि
         प्यवान
3. मु: खागऺर्य प्वलाव
    अ: सब्ज़ बाग़
4. मु: खास्यन गव नॖ माछ लऻरिथ
   अ: वुनि छॆ नॖ जल्दी/तम्बलुन नॖ
5. मु: खार ह्यॆच़ खऺच़ मटि गाठ
         गछ़ि वातॖन्य
   अ: यॆलि ज़िम्वऻरी ह्यॆच़ स्व गछ़ि
        अंद वातनावॖन्य
**************************
1. खर....Donkey/Ass
2. गुर.....Horse
3. हून.... Dog
4. ब्रऻर्र.... Cat
5. हून्य....Bitch
6. गगुर... Rat
7. रय......Ant
8. वूंठ.....Camel
9. हॊस.... Elephant
10. सॖह...Lion
**************************
        गीता ज्ञान :अध्याय 14
यि शरीर पऻदॖ करन वऻल्य यिम त्रॆ ग्वन, युस यिमन ग्वनन हुन्द लगाव त्रावान, ज़्यनॖ मरनॖकि द्वखॖ म्वक्लिथ म्यॆ प्रावान
वॊन भगवानन गीता ज्ञान
**************************
ॳस्य छि सऻरी कलाकार। कांह छु बॊड तॖ कांह छु ल्वकुट। युस बऺडिस पर्दस प्यठ हावान छु कलाकऻरी, सु छु दपान ज़ि सु गव बॊड कलाकार। युस ल्वकटिस पर्दस प्यठ हावि पनॖन्य कलाकऻरी सु दपान गव ल्वकुट कलाकार। वुछव यॊदवय तॖ बॊड ल्वकुट मसलॖ छु नॖ कॆंह सिरिफ छु यि कॖस्मतुक खेल। कांह छु रातो रात थज़रस प्यठ वातान, कऻन्सि छु वख लगान सु थज़र प्रावनस मंज़। मंचस प्यठ, टी वी-यस प्यठ या सिनिमा हालकिस बऺडिस पर्दस प्यठ छि ॳस्य वुछान रोज़ान दोहय कलाकार मगर कॆंह कलाकार छि तिम ति यिम नॖ कुनि ग्रेन्दि मंज़ छि यिवान हालांकि कलाकऻरी हुन्द जज़बॖ छु पूरॖ पूरॖ आसान बऺरिथ तऺमिस मंज़। प्रथ अख इन्सान छु कुनि न तॖ कुनि रंग्य कलाकार। यीत्य ति यथ ज़गतस मंज़ कार छि तॖ यॆमिस शख्सस मंज़ यॆमि कॖस्मुक कार अथि लॊग सु छु तमि कॖस्मुक कलाकार बनान तॖ पनॖन्य कला हऻव्य हऻव्य प्रसिद्धि प्रावान। सतिमि जुलाई 2019 तॖ आथवारि द्वह हऻव कश्मीर बवनस मंज़ ल्वकट्यव ल्वकट्यव शुर्यव पनॖन्य पनॖन्य कला ग्यवनॖ रऺग्य, नच़नॖ रऺग्य, सांज़ वायनि दऺस्य तॖ बनऻवॖख महफिल मज़दार। अख कलाकार ओस मॆहरोली प्यठॖ ति आमुत, नाव ओसुस विजय कुमार भट। ॳम्य ति कॊर  मंचस प्यठ खऺसिथ ठठॖ-मस्खऺरी हुन्द अख कलाकऻरी हुन्द नमूनॖ पेश तॖ ज़्यीनिन्य वाह-वऻहयऻयी हालस मंज़ बिहित लूकन हॖन्ज़।
जान छु रोज़ान अगर कांह पनॖन्य कला ह्यॆकि हऻविथ तॖ वुछन वाल्यन असनऻविथ। म्यऻन्य व्यनती छि म्यान्यन बायन ब्यॆन्यन ज़ि तिमन पज़ि पनॖन्यन शुर्यन कलाकार बनावुन तॖ समाजिच सीवायि मंज़ तमि कलायि हुन्द फ़ऻयदॖ वातनावुन।
**************************
"हचवि हऻरिंजि प्यच़िव कान गोम,
अबख छान प्योम यथ राज़दाने
मंज़बाग बाज़रस कुल्फॖ-रॊस वान गोम
तीर्थॖ रॊस पान गोम कुस मालि ज़ाने
पऺरिव यि लल वाख ति दॊहय
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)