06.07.2019

06.07.2019 हारॖ (आषाढ) ज़ूनॖ पछॖ(शुक्ल पक्ष) च़ोरम(देवादेव)
(चतुर्थी) बटॖवार(शनिवार/शनिश्चरवार) श्री सप्तर्षी सम्वत 5095, राश सिंह (चलान) ऋतु ग्रीष्म (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: टरॖ मीरॖन्य राद
    अ: अपज़्यऻर्यसॖन्द्य अपज़ी
          क़ॖसॖ
2. मु: टोडऺरमऺल्य हिसाब
    अ: प्यॆठ्य प्यठ्य अंदाज़ॖ
         लगावुन
3. मु: ट्यॆन्ड्यखाव
    अ: यॊस लिखऻय परनॖ यी नॖ
4. मु: ठूलॖ च़ूरि प्यठय छु मूलॖ च़ूर
         बनान
    अ: ल्वकचि च़ूरि प्यठय छु अथॖ
         दरान
5. मु: टरलस टर फुटुन मोल मर-
         नस बराबर
    अ: अपज़िस नन्यर गछ़ुन छु
         अपज़्यऻरिस सख़ मुश्किल
         गछ़ान
**************************
1. टाठ..Jute mat/Coir mat
2. टास दिन्य...Beat/Thrash/
                     To punish
3. टालुन...To avoid/Put off
               To get rid of this/
                Send away
4. टांगॖ......Tonga
5. टांगॖवोल....Tonga-driver
6. टांगुन.....Deep howl as of
               an animal/Deep
               sound
7. टासॖराय.....Loud sound
8. टऻच........A kind of cap
9. टाफ...Slap/Thrash/Beat
10. टाठिन्यार....Love/Affec-
               tion/Kindness/
               Regard/Tender
**************************
     गीता ज्ञान  :अध्याय  14
         श्री भगवान वनान
भगवान  वनान ज्ञानन मंज़ यि उत्म ज्ञान, ज़ऻनिथ मुक्त गऺयि मुनीश्वर ज्ञानॖवान
हे अर्ज़न च़्यॆ बॖ वनय थाव ध्यान
वॊन भगवानन गीता ज्ञान
**************************
कुनवहशथ तॖ नमथ वऺरियुक जनवऺरी रयथ कोताह द्वखदायक रयथ ओस यॆलि कऻशिर बट्टॖ च़ऺलिथ आयि पनुन पान बचावान बचावान तिमन दहशथगर्दन निशि यिमव सानि समाजक्यन कॆंच़न बायन, बुज़र्गन, माज्यन, कोर्यन ब्यॆन्यन क़त्लॖगारथ मचऻव तॖ लऺग्य यपऻर्य छम्बन तॖ छालन। गरॖ गरवेठ रूज़ तऺती, ज़मीन जायदाद रूद तऺती, सोन ल्वकचार, नच़ुन फ़ेरुन , असुन तॖ गिन्दुन रूद तऺती। ह्यथ आयि पनुन पान जान यज़थ तॖ मान। नंगय तॖ न्यथनऺन्य आयि तॖ बीठ्य छ़ान्डनि सॆरॖ वाव तॖ ढेरॖ वाव। छ़ान्डनि बीठ्य शुर्यन कट्यन हुन्द यिनॖवोल पगाह। ॳथ्य मंज़ द्रायि असि यिम त्रॖह वऺरी तॖ कल छि तूर्यकुन यॆति प्यठॖ ॳस्य लार तॖ मार दिवान दिवान कऺडिख। कल छि तूर्यकुन यॆति तिम मारॖवातल, दहशथगर्द, आतंकवऻद्य वुनि छि खुले आम नच़ान कलॖ थॊद थऺविथ तॖ ब्यॆयि असि आलव दिवान वऺलिव रऺलिव असि सॗत्य। क्याह असि पज़्या तिहन्दिस आलवस कन थावुन?
**************************
"विषभय विनाषम दु:ख दरिद्र्यनाशम्। सकल सुख विकासम् श्री महागणेशं नमामि।।"
पऺरिव यि मंत्र ति दॊहय
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)