05.07.2019

05.07.2019 हारॖ (आषाढ) ज़ूनॖ पछॖ (शुक्ल पक्ष) त्रय(देवादेव)(तृतीय)शॊकुरवार (शुक्रवार/जुम्मा)श्री सप्तर्षी सम्वत 5095,राश सिंह (रऻच़ हॖन्ज़ॖ 12.17 बजि प्यठॖ) ऋतु ग्रीष्म (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: थ्वकन अथॖ दारॖन्य
    अ: ताब्यादऻरी करॖन्य/नाज़-
         बरदऻरी करॖन्य
2. मु: थ्वकि प्यठ रिकिन्य
    अ: मॊमूली चीज़ॖ सॗत्य या
         ग़लती सॗत्य न्वकसान
         वातुन
3. मु: थ्वकॖ जोद
    अ: अपुज़ वाठ
4. मु: थ्वख निशानॖ
    अ: जल्दी करनॖ खऻतरॖ कऻन्सि
          वनुन/जल्द म्वकलनवोल
          चीज़
5. मु: थ्यकन थऻज्य
    अ: पनॖन्य बऺडीमी हावॖन्य/
         पानस तऻरीफ़ करॖन्य
**************************
1. थऺज्य-काद..... Plantation
           of paddy in a group
2. थऺन्य......Butter
3. थऺर.......Bush
4. थर.......Back/Behind
5. थुर.......To make
6. थऻल्य.....Plate
7. थख......Rest/Respite
8. थकावठ....Tiredness/
          Fatigue/Weariness/
          Exhaustion
9. थदुन......Be high/To rise
                  Go higher
10. थकुन....To get tired/To
                  be wearied
**************************
      गीता ज्ञान  :अध्याय 13
युस क्षेत्र तॖ क्षेत्रगिय राज़ ज़ानान
ज्ञानॖ नेत्रव प्रकृती ग्वनव मुक्त डेंशान
सु महात्मा छु परमात्माहस प्रावान
वॊन भगवानन गीता ज्ञान
**************************
इन्सान छु पनॖनि वुम्बरि मंज़ चमत्कारन प्यठ चमत्कार वुछान रोज़ान। ॳमिस इन्सानस पनॖन्य ज़िन्दगऻनी ति छि पानस मंज़ अख चमत्कारा। मगर नादान छु, अज्ञऻनी छु, अहंकऻरी छु फिकरी छुस नॖ तरान तॖ यॆमिस फिकरी तरान सु छु चमत्कऻरी बनान। अज़ वुछ म्यॆ टी वी-यस प्यठ अख चमत्कऻरी धाम युस जयपोर (राजस्थान) प्यठॖ चतजीह मील दूर छु तॖ अथ धामस मंज़ छि दपान तिम लूख यिमन लऺकॖवॖ आसि गोमुत तॖ डाक्टरव ति आसि जवाब द्युतमुत ॳकिस हफ्तस यिथ ठीख गऺछ़िथ वापस पनॖन्यन पनॖन्यन गरन वापस गछ़ान। नॖ दवा न डाक्टर, केवल कुसताम तील तॖ क्वसताम विभूति प्यवान इस्तिमाल करॖन्य तॖ ब्यमार छु ठीख गछ़ान। क्वदरयतुक कऺरिशमॖ। ज्वाला दीवी हॖन्ज़ अखण्ड ज्यॊत ति छु अख चमत्कार। यिथी यिथी छि वारियाह चीज़ यिम चमत्कारॖ सॗत्य बऺरिथ छि। असि मूर्खॖन छु नॖ फिकरी तरान। कऺशीरि मंज़ ति छु बूज़मुत ज़ि सान्यव संतव, ऋश्यव मुनियव ति छि कम कम चमत्कार कऺर्यमॖत्य। ऋषॖपीर ॴल्यकऺदलुक ति छु ओसमुत तिमव मंज़ अखा। ऋश्यवऻर स्व कऺशीर्य छि प्यवान याद विज़ि विज़ि। ख्यनॖ विज़ि, च्यनॖ विज़ि, कांह ति कथ आसि तॊताम छॆ नॖ पूरॖ सपदान यॊत्ताम नॖ कऺशीरि हॖन्ज़ ज़िकॖर आसि। यिति छु अख चमत्कारा ज़ि ॳस्य छि अज़कल मोबायलॖ दऺस्य अख ॳकिस ख़बर-अतर ह्यवान। युथुय चमत्कारा गछ़्या ज़ांह ज़ि ॳस्य मॖच़रावव ॳछ तॖ वुछव पनुन पान कऺशीरि मंज़ ग्रायि मारान। हऻर्ययऻय च़ॖ गछ़ तय कऺशीरि ताम, तॊत वऻतिथ हालातन ह्यतॖ साम, वुछतय च़ॖ तति ठीख-ठाख छा म्यॊन गाम, बॖ गछ़हऻ गरॖ करहऻ आराम।
**************************
"वन्दे लम्बोदरं देवं वन्देsहं गुरुपादुकाम्।
स्वस्थं साक्षात शिवं वन्दे गुरुदेवं भवार्तिहम।।"
पऺरिव यि मंत्र ति दॊहय
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
 नऺविव तॖ फॊलिव
  भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)