12.07.2019

12.07.2019 हारॖ (आषाढ) ज़ूनॖ पछॖ (शुक्ल पक्ष) काह (एकादशी) शॊकुरवार (शुक्रवार/ जुम्मा), श्री सप्तर्षी सम्वत 5095, राश वृश्चिक (दुहचि 9.53 बजि प्यठॖ), ऋतु ग्रीष्म (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: डबॖ डबॖ गव वडॖ-रब
    अ: मशहूर स्यठाह तॖ ह्यॊन
         द्यॊन कमॗय
2. मु: डेंजि तऺल्य पन तॖ पनॖ तऺल्य
         डींज्य
    अ: ओरुक योरुक वऺनिथ बरा-
         बऺरी अनॖन्य
3. मु: डॊम्ब्य शुर्यन खॊकॖ-ब्रऻर्य
    अ: तस रोब हावुन यस नॖ
         व्यच़ानॖय आसि
4. मु: ड्यकॖ टिकॖ
    अ: सरताज/हावुन लायख
5. मु: डंगॖ सॖह
    अ: गरस मंज़ॖय ज़ऻलिम मूजूद
         आसुन
**************************
1. छातॖ..... Umbrella
2. छान....Carpenter/Strain
3. छानॖबाय... Carpenter's
                     wife
4. छानुन....To strain/To fil-             
              ter/To percolate/
              To investigate/To
          examine/To explore
5. छापॖर......A kind of haw-
                    ker's basket
6. छावुन....To use/To enjoy
7. छतुन...To become old
               (Graying of hair)
8. छेकरस...At the end/At
             the eleventh hour
9. छुट्टी...... Holiday
10. छुर्य..... Knife/Dagger
**************************
       गीता ज्ञान :अध्याय 14
 रजोग्वन रागॖ रूपॖ कामना करान, ज़ीव आत्माहस कर्मन मंज़ लगावान, ब्यॆयि कर्मॖ फलॖच आशा थवान
वॊन भगवानन गीता ज्ञान
**************************
राथ सुबहऻय यॆलि म्यॆ मोबाइल वुछ तॖ नन्यॊम ज़ि म्यऻनिस ॳकिस मित्रस ॴस मऻज्य कालॖ शामन रऻच़ हॖन्ज़ि काह बजे पूरॖ सपद्यॆमॖच़। यि मित्र छु म्यॆ सॗत्य व्हाटसापस प्यठ कथ बात करान रोज़ान।अख ॳक्यसुन्द गरॖ छि नॖ आमॖत्य गऻमॖत्य ज़ांह, सु कति रोज़ान तॖ बॖ कति रोज़ान यिति छॆ नॖ ख़बर असि अख ॳकिस मगर व्हाटसापस प्यठ छि तिथॖपऻठ्य गुफ्तॖगू करान रोज़ान ज़न ति छि ॳस्य ल्वकॖचारॖ प्यठॖ अख ॳकिस  ज़ानान। म्यॆ बासान यिहऻय पान्य-यार ज़ऻनिथ ओस ॳम्य म्यऻनिस नम्बरस प्यठ यि ख़बर सूज़मॖच़। म्यॆ आव नॖ ताब तॖ म्यॆ कॊर ॳमिस फ़ोन तॖ प्रुछ़मस पय पताह तॖ नन्योम ज़ि काह बजे दुहचि ओस तऺम्य समय थोवमुत दाह-संस्कार करनॖ बापथ। वुनि ओसुस बॖ सखरानॖय ॳमिस मित्रस निश गछ़नॖ बापथ ज़ि ब्यॆयिस ॳकिस मित्रॖ सुन्द फ़ोन आम। नन्यॊम ज़ि ब्यॆयिस ॳकिस जायि ति छु अख ज़ऻन्यकार वुन्य वुन्य स्वर्गस गोमुत नोयडाहस मंज़। अमिस स्वर्रगवऻसिस छु नॖ गरस मंज़ कांह त्युथ यॆमिस ख़बर छि ज़ि क्याह छु करुन आसान अथ मॊकस प्यठ। म्यॆ ज़ोन मुनऻसिब ज़ि ऊर्य  ग्वडॖ गछ़ुन तॖ यिमन वथ हावॖन्य। ऒत वऻतिथ नन्योम ज़ि ॳमिसॖन्ज़ कूर मा ॴस कैनाडा प्यठॖ आमॖच़ तॖ ॴस मऻलिस तीमारदऻरी करान रूज़मॖच़ पऺतिम्यव कॆंच़व दॊहव प्यठॖ तॖ राथॖय ॴस वापस कैनाडा बापथ द्रामॖच़ तॖ यपऻर्य सपुद यि पूरॖ। तऺमिस कऺरॖख ख़बर। तमि कॊर ऒडुय सफ़र तॖ फीर वापस योर कुन। चूंकि तऺमिस लगिहे कॆंह काल वातनस मंज़, यिमव दॊप ज़ि दाह-संस्कार करव तम्यसॖन्दि वातनॖ पतय। तोताम सोम्बरोवॖख मरन-सामग्री वगैरा। बॖ आस तीतिस कालस ग्वडनिकिस मित्रस मीलिथ तॖ तऺम्यसॖन्ज़ मऻज्य कऺर शुमशानस कुन रवानॖ।कथ जि जऻरी
**************************
"आयस वते गऺयस नॖ वते
स्यमंज़ स्वथि लूसुम द्वह
चंदस वुछुम हार नॖ अथे
नावॖ तारस दिमॖ क्याह बॖ"
पऺरिव यि लल वाख ति दॊहय
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)