13.07.2019

13.07.2019, हारॖ (आषाढ) ज़ूनॖ पछॖ (शुक्ल पक्ष) बाह (द्वादशी) बटॖवार (शनिवार/ शनिश्चरवार),श्री सप्तर्षी सम्वत 5095, राश वृश्चिक(चलान)ऋतु ग्रीष्म (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: रातस वॊनमय लऻल नामॖ
         सुबहस दॊपथम लऻल क्या
         वाति मॊजलूनस
   अ: फिकिरि तऻर्य तऻर्य ति नॖ
        फिकिरि तरुन
2. मु: रऻछस दॊहा तॖ च़ूरस गऺरा
    अ: वुम्बरिहॖन्ज़ रऻछ छि रछ़ा
         ग़फ़लऺच़किन्य कॊलि गछ़ान
3. मु: रब तॖ सब हिशी कथा
    अ: यॆलि रॖतिस तॖ कृतिस
          फ़रखॖय रोज़ि नॖ
4. मु: रतस तॖ त्रॆशि
    अ: सख़ अदावत
5. मु: रॖतिस छि दऺह बऻग्य
    अ: जान कारस छि सऻरी
         व्वमेदवार आसान
**************************
1. ख़ाब....Dream/Delusion/
               Vision/Fantasy
2. ख़ाब वुछुन....Dream a
               dream/Have a
               dream
3. खाब ख़याल.... Delusion/
               Fantasy/Vision
4. खाब गछ़ुन....Not to be
               visible/Not to be
               seen
5. खऻतिमॖ......End/Conclu-
                       sion/Finish
6. खातून...... Lady
7. ख़ऻदिम.....Servant/Atten-
                    dant/Maid
8. ख़ऻरिज...Expelled/Struck
                  off/Dismissed/
                  Excluded
9. ख़ार.......Thorn
10. ख़ारॖ.... ...Great desire/
                 Strong longing
**************************
         गीता ज्ञान  :अध्याय 14
तमोग्वन अज्ञानॖ प्यठॖ व्वपदान,
मनुश मॊह ज़ालस मंज़ फ़सान
प्रमाद आलुछ़ न्यॆन्दॖर रावॖरावान
वॊन भगवानन गीता ज्ञान
**************************
मरुन ति छु मुश्किल अज़कल।कूर वऻच़ वापस अडॖवति प्यठय मगर मऻल्य ॴस ॳछ वटमॖच़। असि रूज़ यॆति व्यछ़य गोरन हॖन्ज़ ति। उतराखंडॖक्य, उतरांचलॖक्य या कॆंह बिहऻर्य छि सान्यन संस्कारन अंद वातनावान। कोताह ज्ञान छु तिमन, सऻन्य विधि कऻच़ाह ज़ानान छि तिम, ॳस्य ह्यकव अनुमान लगऻविथ। मगर असि ति ब्यॆयि चारॖ छु नॖ कॆंह। कऻम छि पकनावॖन्य। फ्लैटन मंज़ मरुन छु अख मुसीबथ। वारियाहान जायन वुछ म्यॆ ज़ि शवस छॆ नॖ श्रान दिनस सॊम्ब जाय। जायि छ़ोछर जु।
क्रिया करनॖ बापथ छि नॖ शुर्य नऺन्य। तिमन छे नॖ फुर्सथ पूरॖ द्वह करनॖ बापथ। म्वखसरॖ कथ छि ज़ि ॳस्य कऻशिर्य बट्टॖ छि दर-अज़ाबस लऺग्यमॖत्य। निभावान छि रस्म कुनि न तॖ कुनि रंग्य मगर मनस छु नॖ पूरॖ तसल्लाह मेलान। असि गव सऻर्यसॖय व्यॊठुय। मगर वनव कस, वऺनिथ ति नेरि क्याह। ॳछ वऺटिथ छु पकुन तॖ क़दम क़दम कडुन ब्रौंहकुन। बुथि क्याह छु ब्यॆयि डॆंशुन ख़बर ॳकिस भगवानस। पुशॖराव पान च़ॖति तस दयावानस
**************************
"अछ़्यन आय तॖ गछ़ुन गछ़े
पकुन गछ़े द्यन क्यो राथ
योरय आय तॖ तूर्य गछ़ुन गछ़े
कॆंह न तॖ, कॆंह नतॖ कॆंह, नतॖ क्याह"
पऺरिव यि लल वात ति दॊहय
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
 नऺविव तॖ फॊलिव
   भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)