16.07.2019

16.07.2019 हारॖ (आषाढ) ज़ूनॖ पछॖ (शुक्ल पक्ष) पुनिम (पूर्णिमा) बॊम्वार (मंगलवार)श्री सप्तर्षी सम्वत 5095, राश मकर (रऻच़ हॖन्ज़ॖ 4.32 बजि प्यठॖ), ऋतु वर्षा(ॳज़्यकि प्यठॖ)...अज़ छि गुरु पूर्णिमा ति
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: सऻलाब छु ऒन
    अ: सऻलाबस मंज़ छु प्रथ कांह
         चीज़ यीरॖ गछ़ान
2. मु: सऻरी न्याय छि सऺहल तॖ
         लानि न्याय छु महल
    अ: सऻरी न्याय छि सऺहल अमा-
         पॊज़ कॖस्मतुक न्याय अंज़-
         रावुन छु सख़
3.मु: सासन डास वथरुन नॖ वगुव
    अ: बॆ-वऺतीरॖ खर्चावुन
4. मु: सासन स्वन पिटारस
         च़ऻन्गिस नॖ तील रातस
    अ: रॊपियि मचि बऺर्य बर्य अमा-
         पॊज़ च़ऻन्गिस नॖ तील/महा
         कऺन्जूस
5. मु: सऻरी करान पान्यो पान्यो
         जुमल्यव नॖ कांह
    अ: प्रथ कऻन्सि पनॖन्य फिकिर
         तॖ कौमॖच नॖ कऻन्सि दग़
**************************
1. ज़ाथ......Caste/Self/Per-
                  son
2. ज़ातस प्यठ....On one's
            own responsibility/
            Personally
3. ज़ऻती....Personal/Innate
                Private
4. ज़ऻती तजरुबॖ.....Personal
                       Experience
5. ज़ऻती राय......Personal
                       opinion
6. ज़ऻती मामलॖ.....Personal
                           affair
7. ज़ऻती तऻलूक़ात....Personal
               relation/Personal
               contacts
8. ज़ाति पाक......God
9. ज़ऻती हऺसियत....Personal
                            status
10. ज़ऻतियाथ......Personal
**************************
        गीता ज्ञान  :अध्याय 14
 यॆलि दिहस यऺन्द्रयन तॖ अंत:कर्न
ज्ञानुक प्रकाश छु पऻदॖ सपदान
ज़ानुन गछ़ि तॆलि सतोग्वन छु बडान,
वॊन भगवानन गीता ज्ञान
**************************
ख़बर आयि ज़ि मोदी सऻब छु व्वंय संजीदगी सान सौंचान ज़ि कऻशिर बट्टॖ किथॖ पऻठ्य वातनावोख वापस कऺशीरि मंज़।यि कथ यॊदवय पऺज़ छि तॖ तॆलि आसन सऻन्य लीडर बऻय लऺग्यमॖत्य हिसाब लगावनस ज़ि क्याह छु मंगुन तॖ क्याह छु नॖ मंगुन। सौंचनि आसन बीठमॖत्य ज़ि सोरुय अयाल ह्यथ तरवा किनॖ अयाल थवोन यॆती तॖ जाय रटनि तरव तॖ पतॖ वुछव। संस्थायन मंज़ ति आसि लऺज्यमॖच़ दॖनन यि ख़बर बूज़िथ। अगर फ़र्ज़ करव तरुन प्यव वापस क्याह यिम दीवी-दीवता असि तोरॖ प्यठॖ योर ॳन्य यिम छा ब्यॆयि वापस तोर निन्य। आश्रम यीत्य यॆति बनऻव्य यिमन त्रॖहन वऺरियन तिमन क्याह छु करुन। मसलॖ रोज़ि ज़ि क्याह तॊत वऻतिथ गछ़्या अनंतनागुक अनंतनाग तॖ वरॖमुल्युक वरॖमुलॖय। क्याह यि गामॖ तॖ शहर हांछ़ लार्या ब्यॆयि तति यॊस यॆति बडॖ मुश्किल सान ख़तम गऺयॆ। शुर्यॆन हॖन्दि परनुक मसलॖ रोज़ि ब्यॆयि तति सुति नवि-सरॖ। नोकरी हुन्द मसलॖ रोज़ि, व्वथॖनॖ-बॆहनुक, ख्यन-च्यनुक, आव-गवुक मसलॖ रोज़ि नवि सरॖ तति। कॊत ताम रोज़ि मुनऻसिब त्रॖहॖय वऺहॖर्य पतॖ वापस गछ़िथ ब्यॆयि त्रॖह वऺरी लागॖन्य सम्बालनस तॖ सऺन्दरावनस। यि वॊन म्यॆ प्यॆठ प्यॆठ योत। हक़ीक़तस मंज़ योदवय वुछव तॖ बट्टॖ यी छ्वकॖनावनॖ अकि फिरि ब्यॆयि।
मोदी सऻबन मा आसि यि अंद सूंचमुत।
**************************
"नाथ ना पान ना परज़ोनुम
सदाय बूदुम ईकुय दीह
च़ॖ बो बो च़ॖ म्युल ना ज़ोनुम
च़ॖ कुस बो क्वस छु संदीह"
पऺरिव यि लल वाख ति दॊहय
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
  भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)