31.07.2019

31.07.2019 श्रावणॖ (सावन) गटॖ पछॖ (कृष्ण पक्ष) च़्वदह (देवादेव) चतुर्दशी, ब्वदवार (बुधवार),श्री सप्तर्षी सम्वत 5095, राश कर्कट (दुहचि 9.14 बजि प्यठॖ) ऋतु वर्षा (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: यार ज़ागान छ़लस तमऻक्य
         चिलिम च्यॆयि तॖ च़लि
    अ: ख्वद ग़र्ज़ी हॖन्ज़ अलामथ
2. मु: यारस मऻज्य मॊई तॖ लूकॖ
         सासा, यार मूद तॖ कुनि नॖ
         कांह
   अ: यारसॖय सॗत्य छि यारऻनी तॖ
      रिश्तॖ, यार मूद तॖ रिश्तॖ छ़्यॊन
3. मु: युपस शुप डखॖ
    अ: ख़र्च ज़्यादॖ आमदनी कम
4. मु: यथ वावॖ हालि च़ॊंग कुस
         ज़ालि
    अ: मुसीबतस मंज़ जुर्रतॖच
         कऻम अन्जाम दिन्य
5. मु: यथ कलस नॖ ग़ऻरथ स्व
         गऺयि अल
    अ: इन्सानस गछ़ि ग़ऻरथ
         आसुन
**************************
1.  स़ऻबिर.... Patient/Endur-
                   ing for bearing
2. स़बॖर......Patience/Endu-
                 rance
3. स़ाबन..... Soap
4. स़ाबऺनि चऻट्य....A cake of
                soap/Soap bar
5. साहब....Boss/Term of
              respect/Courtesy
6. साहबि इकॖबाल....Lucky/
                            Fortunate
7. स़ाहबि कमाल....Perfect/
                   Accomplished
8. स़ादिक़.....True/Sincere/
                   Faithful/Just
9. स़ाफ़.......Clean/Clear/
                   Bright (sky)/
                   Plain/Simple
10. स़ाफ़ इन्कार करुन....To
                    refuse point
                    blank
**************************
        गीता ज्ञान  :अध्याय 14
 मान अपमान दोस दुश्मन समान
अबिमानॖ रॊस आसान सु कर्मॖवान
तस प्वरुशस ग्वनातीत वनान
वॊन भगवानन गीता ज्ञान
**************************
 मानॖनॖ छु यिवान ज़ि रातुक फऻसलॖ छु अख एतिहासिक फ़ऻसलॖ कि मुसलमानन हुन्द तीन त़लाक़ बिल आयि पास करनॖ राज्य सभाय मंज़ बहुमत वोटव सॗत्य। बिलि हॖन्दिस विरोधस मंज़ ॴस्य 84 वोट तॖ हक़स मंज़ ॴस्य 99। सऻन्य कोनून ति छि यॊदवय वुछव तॖ हऻरान करान वख्तॖ वख्तॖ। च़ॊयशीतन वोटरन हॖन्ज़ राय रूज़ बालाय ताक़स तॖ नमनमतन हॖन्ज़ राय खऺच़ क्रायि पाकस। यिथी फ़ासलॖ आयि वुन्युखताम करनॖ वारिहान मोकन प्यठ। सियासत छि स्यठाह गन्दॖ चीज़। खऻर।व्हाटसापस प्यठ वुछ म्यॆ राथ, त्वहि ति आसिवॖ च़्यूनमुत, ज़ि तीत्य आसन नॖ मुसलमान ख्वश गऻमॖत्य यीत्य यि ख़बर बूज़िथ कऻशिर्य बट्टॖ गऺयि। प्रथ ग्रुपस मंज़ आव मुबारक फिरनावनॖ अख ॳकिस। म्यॆ तॊर नॖ फिकिरि ज़ि असि कुस ज़्युत लॊब यि बिल पास गछ़नॖ सॗत्य। शायद मा आसिनॖ म्येय च़ऻरिस समज आमुत मगर सानि फऻयदॖच ॴसा अथ मंज़ कथ कॆंह। म्यॆ छु याद यिवान ज़ि असि बटन करेयोख ग्यस्ट-कन्ट्रोल कऺशीरि मंज़ वारियाह समय ब्रौंठ, युस सऻनिस फ़ऻयदस मंज़ ओस, मगर च़ूरि छ़्यपि, फुटॖरोव सु क़ोनून असि पनॖनि ख्वदग़र्ज़ी किन्य। वनॖनुक मुद्दा छुम ज़ि ॳस्य छि ब्यॆयिस वुछिथ व्वटॖ तुलान तॖ पनुन गर्दनि मल छु नॖ बोज़नॖ यिवान। यिम वोट अथ बिलि ख़लाफ़ ॴस्य तिम कयाह सना करन व्वंय। वुछव ॳस्य ति तमाशा किथ पऻठ्य छु चलान ज़माना
**************************
"आंच़ऻर्य बिचऻर्य व्यच़ार वॊनुन
प्राण तॖ रुहुनॖ ह्यॆयिव मा
प्राणस बुज़िथ मज़ा च़ॖहुन
नदुर छुय तॖ ह्यॆयिव मा"
पऺरिव यि लल वाख ति दॊहय
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
 नऺविव तॖ फॊलिव
   भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)