02.08.2019

02.08.2019,श्रावणॖ (सावन) ज़ूनॖ पछॖ (शुक्ल पक्ष) द्वय (द्विती)
शॊकुरवार (शुक्रवार जुम्मा),श्री सप्तर्षी सम्वत 5095, राश सिंह (दुहचि 9.28 बजि प्यठॖ)ऋतु वर्षा (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: हऻन्ज़स यॆलि छु दऺर्यावस
         अंदर वाव यिवान, पथ नम
         छु ब्रौंह नम करान तॖ ब्रौंह
         नम छु पथ नम करान
   अ: द्वलाबन मंज़ छु आदम
        पानस गतॖ-ग्यूर तुलान/
        परेशऻनी मंज़ ओरॖ-योर
        करान
2. मु: हऻन्ज़स ग्वब्यॆयि लॊलि
        दिच़ॖन दऻरिथ क्वलि
    अ: पनॖन्य कूर स्यठाह वऺसिथ
         गरस मंज़ दिन्य
3. मु: हाप्तस नम कासॖन्य
    अ: ज़ऻलिम हॊमॖरावुन
4. मु: हऻन्छ़ ज़ायो ग्वबुर शुतुल-
         बुजि दोरुस ॴस
    अ: मुसीबतुक हल सपदिथ
         पतॖ ब्यॆयि मुसीबथ युन/
         मुसीबतस प्यठय मुसीबथ
         युन
5. मु: हऻन्ठ गऺयि बरस गऻन्ठ दिथ
    अ: लावऻरिस जायदाद त्रऻविथ
          गछ़ुन
**************************
1. ताक़....Niche/Arch/Win-
               dow/Shelf/Odd
               number/Skilled/
               Expert
2. ताक़ सपदुन..To become
          expert/To be skilled
3. ताक़ व जुफ़..Odd or even
4.  ताक़थ.....Strength/Abi-
            lity/Power/Force/
           Energy/Capacity
5.  ताक़तवर....Strong/Pow-
                  erful/Energetic
6. ताक़थ करुन....To gain
                           strength
7. ताक़ती.....Strong/Power-
                    ful
8. तालॆह....Luck/Fortune/
               Lot/Destiny/Fate
9. तालॆह-मंद....Lucky/Fortu-
                       nate
10. तालॆह अज़मावुन....To try
                           one's luck
**************************
        गीता ज्ञान  :अध्याय 14
सु अविनऻशी पर्म ब्रह्म छुस बॖ,
अमृत रुपॖ सनातन धर्म छुस बॖय
पर्म आनन्दुक बंडार म्यॆ ज़ान
वॊन भगवानन गीता ज्ञान
**************************
बड खुशी हॖन्ज़ कथ छि ज़ि राथ यानि 01.08.2019 तॖ ब्रसवारि द्वह गुरुग्राम यानि गुडगांवॖ (हऺरियाणा) किस ताऊ देवी लाल पार्क, स्यक्टर 22-हस मंज़ आव सानि समाजुक अख फौजी जवान,मेजर सुशील ऐमा सॖन्दि नावॖ अख म्यमोरियल बनावॖनॖ। मेजर सुशील ऐमा-हस छु आमुत तऺम्यसॖन्दिस मरनोपरान्तस प्यठ भारत सरकारॖ दऺस्य  कीर्ति चकरॖ दिनॖ। मेजर सुशील ऎमा गऺयि शहीद 1999 मंज़ पऻकिस्तानस ख़लाफ़ ॳकिस लडायि मंज़। 
रातकिस अथ मॊकस प्यठ ॴस आमॖत्य मिलिट्री, पुलिस, तॖ हऺरियाणा सरकारॖक बऺड्य अफ़सर तॖ दिच़ॖख श्रद्धांजली सुशील ऐमा जियस यॆम भारतॖच आन बान तॖ शान रऺछ़रऻव्य पनुन पान वतनॖ बापथ छऺपि द्युत। सोन ति छु यिथिस महा प्वरुशस नमन। अथ प्रोग्रामस अंद वातनावनस मंज़ छु रूदमुत मेजर जनरल एस के राज़दान, अजय पंडिता, रोहित हाशिया तॖ त्युहुन्द पूरॖ टीमुक योगदान तॖ बनऻवॖख सानि समाजिच अख न मऺशरावन वऻज्य यादगार। व्यवस्था ॴस नफ़ीस तॖ कार्यक्रम रूद काम्याब।
**************************
"कॆंच़न दितिथम गुलाल यऺच़ॖय
कॆंच़न ज़ोनुथ दिनस नॖ वार
कॆंच़न छ़ॖनिथ नऻल्य ब्रह्महऺच़ॖय
भगवानॖ च़्यानि गऺच़ नमस्कार"
पऺरिव यि लल वाख ति दॊहय
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)