03.08.2019

03.08.2019 श्रावणॖ (सावन) ज़ूनॖ पछॖ (शुक्ल पक्ष) त्रय (तृतीय) बटॖवार (शनिवार/ शनिश्चरवार) श्री सप्तर्षी सम्वत 5095, राश सिंह(चलान) ऋतु वर्षा (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: नार छा थवान सार
    अ: नार छु अकॖल डालान
2. मु: नारॖय छु जन्नत नारॖय छु
         जहनमॖ
    अ: नारॖ की ज़ॖ बुथ्य, तॊत ति तॖ
          तुरुन ति
3. मु: नार छु मार
    अ: नारॖ सॗत्य छि तबऻही गछ़ान
4. मु: नारॖ विज़ि क्रूर खनुन
    अ: गऻर वख्तॖ या नामुनऻसिब
         वख्तॖ कऻम करॖन्य
5. मु: नारॖ द्राव स्वन
    अ: स्यठाह प्वख्तॖ आसुन
**************************
1. ज़ऻलिम..... Cruel/Tyrant/
                     Unjust
2. ज़ऻहिर.... Obvious/Clear/
                   Evident/Plain/
                   Visible/Explicit
3. ज़ऻहिर सपदुन..To appear/
                Come to light/To
                be disclosed/To
              become manifest
4. ज़ऻहिर करुन....To reveal/
               To disclose/To
               pretend
5. ज़राफ़त.....Wit/Irony/
              Humour/Wisdom
6. ज़रीफ़....Witty/Irony/
                  Wise/Humour
7. जुलुम.... Oppression/
              Cruelty/Tyranny/
              Harm/Injustice
8. ज़ुलुम सपदुन...To be tyra-
             nnised/To be sub-
             jected to hardship
9. ज़ुलुम करुन...To oppress/
                   To do wrong to
10. ज़ुलुमगार..Cruel/Unjust/
                       Oppressive
 **************************
       गीता ज्ञान :अध्याय 15
          श्री भगवान वनान
यि सम्सारॖ रूप पीपल कुल आसवुन, मूल ह्यॊर कुन तॖ लंग ब्वन कुन
ब्रह्मॖ रूपॖ लंजि वीदॖ रूपॖ पन आसान
वॊन भगवानन गीता ज्ञान
**************************
ज़र ज़ऺन्य तॖ ज़मीन छि त्रॆय चीज़ यथ सम्सारस मंज़ यथ मंज़ यि आदम छु वलनॖ आमुत कूनि न तॖ कुन्य रऺन्ग्य या प्रथ कुनि रऺन्ग्य। ल्यकॖ थ्वकॖ, हाथा-पऻयी, मारा मऻरी पानॖवुन्य, या ॳकिस ब्यॆयिस सॗत्य छि यिमय त्रॆ चीज़ सबब। ज़र तॖ ज़ऺन्य कथ छेडव नॖ अज़, अज़ छेडव कथ ॳस्य ज़मीनि मुतलक। त्वहि सारिनी छि ख़बर ज़ि दिसम्बर 1992-तस मंज़ लूहरावेयख  बाबरी मस्जिद तॖ तनॖ प्यठॖ वुन्युख ताम यानि 26 वऺर्यन मंज़ गव नॖ फऻसलॖ ज़ि ॳमि इमारतॖ तलॖच ज़मीन कऺम्यसॖन्ज़ छि मतलब मुसलमानन हॖन्ज़, ह्यॆन्द्यन हॖन्ज़, ईसायि्यन हॖन्ज़ किनॖ कऻन्सि हॖन्ज़ॖय छॆ नॖ। सासॖ बऺद्य कॖसॖ छि ज़मीनि हॖन्दी यिम विवादस तल छि। संस्थायन मंज़ ति छु वाद-विवाद ज़मीनस प्यठ चलान जायि जायि। सानि ज़ऻच़ मंज़ ति लऺज्य कऺमिसताम सॖन्ज़ नज़र तॖ कॆंह संस्थायि आयि ह्यनॖ अथ ज़मीनकिस चकरस मंज़। कश्यप कऺशमीर सभा, गुरु ग्राम संस्थायि कऺर ज़बर्दस्त मॆहनत तॖ जुव च़ॊट ॳमि संस्थायक्यव सदस्यव कॆंह कालॖ प्यठॖ तॖ मीजिख कामयाबी अख ज़मीन च़कुल ह्यनस मंज़ हर्याणा सरकारस निशि पनॖनि संस्थायि बापथ। यि ज़मीनि च़कुल छु पालम विहारस मंज़, क़रीबन बाह शथ वर्ग गज़। मगर व्वंय छु प्यॊमुत मसलॖ ज़ि अथ ज़मीनस प्यठ बनावुन छु क्याह। मन्दर बनावुन छा, कॊम्यनिटी हाल बनावुन छा किनॖ ब्यॆयि कॆंह। यि ज़मीन च़कुल, योत ताम म्यऻन राय छि, छु बडॖ जान जायि युस त्र्यन तरफन यलॖ छु, सडकि प्यठ छु, कूनुक प्लाट छु तॖ बॊड ति छु। मगर संस्था छि द्वन तॖ च़्वन मंज़ ज़ि अथ ज़मीनस किथॖ पऻठ्य यी शूब अनॖन। गुरु ग्राम किस कश्यप कश्मीर सभाय हुन्द अख लाईफ म्यम्बर आसनॖ मूजूब तॖ पनॖनि समाजुक अख आम इन्सान आसॖनॖ मूजूब छि म्यऻन राय ज़ि अति बनि अख कॊम्यूनटी सैंटर यॆमि सॗत्य सऻर्यसॖय समाजस वख्तॖ वख्तॖ फऻयदॖ वाति बऺड्य द्वह लूक्य द्वह मनावनॖ सॗत्य। बाकय गऺयि ज़िठ्यन हॖन्ज़ मर्ज़ी मगर न्याय गॊछ़ युन अंज़रावनॖ जल-जलॖय
**************************
"यि क्याह ॴसिथ यि क्युथ रंग गोम
बेऱग कऺरिथ गोम लगॖ कमि शऻठय
तालव राज़दानि अबख छान प्योम
जान गोम ज़ान्यम पान पनुनुय"
पऺरिव यि लल वाख ति दॊहय
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)