07.08.2019

07.08.2019 श्रावणॖ (सावन) ज़ूनॖ पछॖ (शुक्ल पक्ष) सतम(देवादेव), सप्तमी, ब्वदवार (बुधवार)श्री सप्तर्षी सम्वत 5095, राश तुला (चलान) ऋतु वर्षा (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: खऺर्ये पॊठये पऺतिम मॊठये
    अ: यॆलि कॖस्मत यावरी करान
         छु, प्रऻन्य बऺदी छि मशान
2. मु: खऺरिस राज डायन गर्यन
   अ: नाकारॖ इन्सानस सुन्द असर
         रॊसूख छु नॖ ज़्यादॖ कालस
         रोज़ान
3. मु: खऺरिस हय पकिहे पनॖनि
         व्वडि कासिहे खऺर
    अ: यस नॖ पानस खऻर करुन
          तगि तस वनान
4. मु: खरि कुजि अम्बॖर्य पैवन्द
    अ: यथ नॖ व्वमेदॖय आसि तस
          ति बनुन
5. मु: खसॖवुनिस ज़ीर वसवुनिस
         दकॖहऻन
    अ: बऺडिस मॊहनिविस पतॖ पतॖ
        पकुन तॖ ल्वकटिस दकॖ द्युन
**************************
1. क़ऻबिज़.....Possessor/
             Occupant/Seizing
2. क़ऻबिल.....Capable/Quali
              fied/Competent
3. क़ऻबलि येतिबार....Trust
              worthy/Worthy/
        Deserving/Credible
4. क़ऻबलि येतिराज़....Objec-
                             tionable
5. क़ऻबलि तऻरीफ़....Praise
                              worthy
6. क़ऻबलि दीद.....Able to see
7. क़ऻबलि अमल...Actable
8. क़ऻबलि ग़ोर....Worth con-
                          sidering
9. क़ऻबलि क़दॖर.    Respect-
                            able
10. क़ऻबलि क़ऺबूल...Accept-
                              able
**************************
        गीता ज्ञान  :अध्याय 15
यि सम्सारॖ रूपी पीपल कुल, मॊह
ममता वासना रूपॖ दूर बिल्कुल,
अथ वऻराग रूपी हऺथ्यार च़टान
वॊन भगवानन गीता ज्ञान
**************************
वुनि छि ज़ितिन सूरॖ बनि मंज़ॖय।
कथ फऺतिस तलॖय। बानन छु वारिहा रऺग्य वुनि ठानॖ प्यठॖय। हमि यि तनाव वारॖ वारॖ। वख लगि। राथ गऺयि यि बिल दपान पास पूरॖ पऻठ्य राज्य सभायि तॖ लोक सभायि मंज़ॖ ति। व्व़ंय कुस कऺमिस सॗत्य क्वस लडऻय लडि कथ क़ोनूनस तहत, वख करि फऻसलॖ। हालस ख्यॆयि हून्य बस्तॖ खलर। कऺशीर्य तॖ ज्यॊम बन्यॆयि यूनियन टॆरिट्री अकि तरफ़ॖ तॖ लद्दाख बन्येयि दॊयमि तरफ़ॖ। वाकॖय हऻव ह्यमथ मोदी जियन तॖ ॳमित शाह सऻबन यि कऻम सर-अन्जाम दिनस मंज़। अज़ नय तॖ अदॖ कर। यि ओस यि दऺपज़ि ति बोनि मुहुल तारुन, यॊदवय यॆमि लटि अथ कथि वाठ लगिहेनॖ, यि म्यॊंद रोज़िहे चलवुन ज़ानि दय कॗतिस कालस ब्यॆयि।
व्वंय छु वुछुन कऻशिर्य बटस क्याह म्यूल यि धारा 370 तॖ 35A ख़तम करनॖ सॗत्य। कऺमिस क्याह कोताह फ़ऻयदॖ यी कऻशिर्य बटस तॖ कऻशिर्य मुसलमानस तॖ अम्युक असर क्याह प्यैयि सऻनिस सरकारस अंदरॖ न्यॆबरॖ अथ प्यठ करव व्यच़ार तॖ कऻशिर्य बटस वापस कऺशीरि गछ़नस मंज़ सपद्या यि कारामद तॖ कथ हदस ताम। यिति वुछव ॳस्य यिनॖ वाल्यन दॊहन मंज़।
**************************
"कामस सॗती प्रय नो बऺरॖम
क्रूधस द्युतुम पवनुन फेश
लूभस मूहस च़रन च़ऺटिम
त्रॆशना च़ऺजिम गऺयस ख्वश"
पऺरिव यि लल वाख ति दॊहय
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
 नऺविव तॖ फॊलिव
 भूषण कौल "दीप"   
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)