05.08.2019

05.08.2019,श्रावणॖ (सावन) ज़ूनॖ पछॖ (शुक्ल पक्ष) पऻन्च़म(देवादेव)(पन्चमी) च़ऺन्दॖरवार (सोमवार),श्री सप्तर्षी सम्वत 5095,राश कन्या (चलान)
ऋतु वर्षा (चलान)...अज़ छि नाग
पऺचमि तॖ कुमार श्यम ति
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: लांज़ुक बार छु यॆचि प्यठ
    अ: ज़िम्मवऻरिसॖय प्यठ छि
         ज़िम्मवऻरी आसान
2. मु: लाख लाख निन्य तॖ बाख
         बाख दिन्य
    अ: नी नी ति बारव दिन्य/
         ॴसिथ बऺसिथ ति नाशुकॖ-
         रऻनी करॖन्य
3. मु: लऻव ब्वद गऺयि सऻव ब्वद
    अ: ल्वकचि उम्रि मंज़ गाटॖजार
        ल्वकटिस छु जलद फिकिरि
        तरान
4. मु: लानतन टोक नऻल्य गछ़ुन
    अ: हंगॖ तॖ मंगॖ शाहमतस मंज़
         वलनॖ युन
5. मु: लाल शिनऻसीय ज़ानि
         लालॖच क़दॖर
    अ: क़दॖरदानॖय ज़ानि मालॖच
         या कामि हॖन्ज़ क़दॖर
**************************
1. ग़ऻब.....Absent/Invisible/
           Vanished/Conceal-
           ed
2. ग़ऻब करुन....To hide/To
           make something
           disappear
3. ग़ऻब गछ़ुन...Vanish/To
                      disappear
4. ग़ऻबियानॖ.... Absentia/
                      Invisibly
5. ग़ऻबथ......Back biting/To
              speak ill of others
6. ग़ऻर....Outsider/Stranger
7. ग़ऻर जऻनिबदार...Neutral
8. ग़ऻर हऻज़िर.....Absent
9. ग़ऻर हऻज़िरी.... Absence
10. ग़ऻर ज़िम्मदार...Irrespon-
                             sible
**************************
        गीता ज्ञान  :अध्याय 15
 यिम योनी रूप लंजि ह्यरॖ ब्वनॖ फऻलान, मनशॖ लूकस वासनायि हुन्द मूल वऺहरान
कर्मव अनुसार मॊह ममतायि मंज़ फ़सान
वॊन भगवानन गीता ज्ञान
**************************
इन्सान छु बिज़ऻती बॆताब। अफ़वाहन छु नॖ वुनि ति थख। लऺगिथ छि सऻरी क़यासकऻरी मंज़ ज़ि क्याह, क्याज़ि, कर, कति, कऺमिस कॊत-ताम।मगर नज़रि गव नॖ कॆंह ति वुन्यखताम। अल्बतॖ अख चीज़ आव वुछनस मंज़ ज़ि कऺशीरि मंज़ ॴस्य समेमॖत्य सऻरी मुसलमान लीडर कऻन्सि ॳक्यसॖन्दिस गरस मंज़ हालातन साम ह्यनॖ बापथ।शाल शाल हर करान टुन्गि विज़ि कुनी। ती वुछ म्यान्यव ॳछव व्हाटसापस प्यठ त्रऻव्यमॖत्य फॊटुवव दऺसय। अख चीज़ बास्यव म्यॆ ज़ि कऺशीरि मंज़ छि मुसलमानन ति वारियाह तनज़ीमॖ कॆंह कोनूनी तॖ कॆंह गऻर-कोनूनी।अख जान सिफत छु यिमन ज़ि अकि कूनॖ प्यठ छि आवाज़ कांह अख दिवान तॖ माजि हॖन्द्य काहवय पॊथॖर्य छि प्यवान वऻतिथ तॖ यकजऺह्यती हॖन्ज़ मिसाल छि बनान।यि ग्वन छु नॖ सानि ज़ऻच़ मंज़।ग्वडॖ छॆ नॖ असि आवाज़ॖय न्यॆरान। यॊदवय न्यॆरि ति सारिनॖय कूनन ताम छॆ नॖ वातान।यॊदवय वाति ति, अकि कनॖ छि बोज़ान दॊयिमि कनॖ छि त्रावान। असि मंज़ छि दऺह सेठ तॖ काह मेठ। तवय छि शायद लगान असि वखतॖ वखतॖ च़्येठ। तति मील्य सऻरीय मुसलमान लीडर तॖ कॊरुख कुनुय मसोदॖ तयार बूज़ुम।अथ मसोदस मंज़ छु तिमव फऻसलॖ दपान कॊरमुत ज़ि तिम करन रऻछ धारा 370/35ए-हस,तिम मानन नॖ ज्येमि-कऺशीरि हिसॖबटऻय करॖन्य वगैरा वगैरा। असि गऺयि त्रॖह वऺरी कऺशीर त्रऻव्यमॖतिस, सानि दऺस्य बन्याव नॖ अख ति सऺहीअजन्डा वुन्युखताम। सऻरी छि असि मंज़ पनॖन्य पनॖन्य च़ॊट गरमावनस मंज़ लऺगिथ ब्यॊन ब्यॊन संस्थायन मंज़ तॖ पनुन पनुन ब्यॊन ब्यॊन अजन्डा ह्यथ। तवय छॆ नॖ यिवान असि कांह अथ वथ तॖ व्वंय छि असली कथ मर्कज़ी सरकारस अथीय तॖ वुछव त्युहुन्द तीर कमि अंदॖ चलि तॖ तमि सॗत्य कुस गलि तॖ कुस बलि।
रामॖ लगय च्यानि लीलाये
**************************
"रुत तॖ क्रुत सोरुय पज़्यम
कनन नॖ बोज़ुन ॳछन नॖ बाव
ओरुक दॊपुन यॆलि व्वंदॖ वुज़्यम
रत्नदीफ प्रज़ल्यम वरज़ॖन्य वाव"
पऺरिव यि लल वाख ति दॊहय
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com)