04.08.2019

04.08.2019,श्रावणॖ (सावन) ज़ूनॖ पछॖ (शुक्ल पक्ष) च़ोरम(देवादेव)(चतुर्थी) आथवार (रविवार एतवार) श्री सप्तर्षी सम्वत 5095,राश कन्या(सुबहॖचि 9.27 बजि प्यठॖ), ऋतु वर्षा (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: मान मऻनी छि गऻमॖच़ राज़-
         दऻनी फ़ना
    अ: मान मऻनी सॗत्य वुजारॖ
          गछ़ुन
2. मु: मऻज्य गऺयि ओल मोल गव
         च़्रोल
    अ: मऻल्यसॖन्दि ख्वतॖ छु माजि
         हुन्दुय थज़र तॖ बजर मानॖनॖ
         आमुत
3. मु: मालि मुफुत दिल बेरहम
    अ: ब्यॆयि सॖन्दि चीज़ुक बे-
       रहमी सान इस्तिमाल करुन
4. मु: मऻज्य गऺयि स्वनॖसॖन्ज़ यॆट
         रऺन्य गऺयि ब्वकॖवऺट
    अ: माजि ख्वतॖ ज़नानि लोल
         बरुन
5. मु: मऻर्यमन्द्यन ब्रऻर्य ज़ागि
    अ: खानॖमाल्यन छि आसान
          हथ बलायि पतय
**************************
1. ॴबिद.....Worshipper/
             Devotee/Pious/
             Saint
2. ॴजिज़.... Incapable/
             Frustrated/Help-
             less/Powerless/
             Humble/Meek
3. ॴजिज़ युन....Be frustrat-
             ed/To be helpless
4. ॴब.....Fault/Blemish/
                Defect
5. ॴबस वुरुन तुलुन....To
                criticize/To
                maligne
6. ॴदिल....Humble/Kind-
              hearted/Sincere/     
              Merciful/Upright/
              Just
7. ॴदी.....Habitual/Accus-
            tomed/Just before
8. ॴरक़...Sweat/Perspira-
                 tion
9. ॴश.....Luxury/Pleasure
             Happiness/Com-
             fort/Delight
10. ॴश आराम....Comfort/
             Pleasure/Rest/
             Ease
**************************
         गीता ज्ञान  :अध्याय 15
 यथ सम्सार रूप कुलिस अविनऻशी वनान, युस प्वरुष अथ
तत्वॖ सान ज़ानान,
सु वीदुक असल मतलब ज़ानान
वॊन भगवानन गीता ज्ञान
**************************
लऺज्य असि कऻशिर्य बट्टन ब्याख कऻम राथ उतॖरॖ प्यठॖ। स्व गऺयि कऺशीरि मंज़ बदलवॖन्य हालातन साम ह्यॆन्य। बानॖ हतस ठानॖ दीज़ि ज़्यॆवि हतस कऺर्यज़ि क्याह। यॆमिस यि ख़यालस मंज़ आव तऺम्य ह्यॊत तमी अंदाज़ॖ मोबायलस प्यठ व्हाटसापॖ दऺस्य बखान करून। ॳक्य ल्यूख यऻसीन मऺल्यकस मुतलक, ॳक्य ल्यूख महबूबायि जी मुतलक़, त्रॆयिम नी  हिसॖ कऺरिथ जॊम्मू कशमीरस। तऺम्यसॖन्दि मूजूब छु ज्यॊम अलग स्टेट बनावुन तॖ कऺशीर्य तॖ लद्दाख छु बनावुन यूनियन-टॆरिट्री। मतलब दऺह छि दऺह कॖसमव कथॖ करान तॖ गऺयि वारियाहन ग्रुपन मंज़ॖ यिमन पॊज़ अपुज़ कथन हुन्द आदान-प्रदान करान। हडकंप ह्ययु ह्यॊतुन मचुन। यिमव कॆंच़व म्यानव बायव फुटॖज्य ह्यॆच़ेये गन्डॖन्य कऺशीरि वापस तरनॖ बापथ, तऺम मॖच़रऻव फिलॖहाल यि फुटॖज्य ब्यॆयि तॖ ब्यूठ ॳकिस लबि ताकस कुन। सौंचस प्यॆयि सऻरी ज़ि अमापॊज़ यि हलचल क्याज़ि मचेयि। अमरनाथ यात्रा रुकऻवॖख अडॖवती, यात्रीयन दॊपुख कऺशीरि प्यठॖ नेरुन रातो रात, सऻर करनि आमॖत्य विज़िटरन दॊपुख कऺशीरि न्यबर नेरुन। फौजी दस्तॖ आयि रवानॖ करनॖ कऺशीरि। यिमव हर्कतव सॗत्य छु बासान ज़ि कॆंह न तॖ कॆंह गड बड छु कुनि न तॖ कुनि कूनस कऺशीरि मंज़ गछ़नवोल। ततिक्यन लीडरन लऺग्य छ़्रठ हि, बेतऻबी बडेयख मगर वुनि आव नॖ नज़रि कॆंह। सान्यन संस्थायन ति प्यॆयि म्यॆ बासान  पनॖन्यन व्यच़ारन फ्युर द्युन तॖ कऺशीरि वापसी हुन्द ख़याल तामथ मुलतवी करुन तॖ वुछुन ज़ि कति व्वथि तॖ कति ब्यॆहि चलवॖन्य हालाथ मध्यनज़र थऺविथ। अफ़वाव निश रोज़न दूर। फ़ज़ूल कथन दिमव विराम तान्यथ तॖ दयस मंगव रुतुय रुत।
**************************
"न प्यायस तॖ न ज़ायस
न ख्यॆयम हंद तय न शोन्ठ
श्यन छस पथ तय
सतन छस ब्रौंठ"
पऺरिव यि लल वाख ति दॊहय
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
 नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)