31.01.2019

31.01.2019, माघॖ गटॖ पछॖ (कृष्ण पक्ष) काह (एकादशी) ब्रसवार (वीरवार/ब्रहस्पतवार), श्री सप्तर्षि सम्वत 5094, राश धनु (शामन 6.39 बजि प्यठॖ), ऋतु शिशर (चलान)
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबात
**********************
1. मु: च़ूर गऺयि नंगॖ हंगॖ तॖ मंगॖ
    अ: बॆख़बर पऻठ्य कऻन्सि
         हुन्द कांह क्वकार नॊन
         गछ़ुन
2. मु: च़ूरन समखान चंदॖ च़ूर
    अ: हिविस हिवुय अगादि
         गछ़ान
3. मु: च़ूरस नय मूर आसि
         सन कति श्रॆप्यस
    अ: च़ूरस छु मार ख्यॊन
          ज़रूरी
4. मु: च़ूरस च़्वन यारन हॖन्ज़
         लार
    अ: मुजरिम या ॴब्दार छु
         पनॖन्यन क्योहऻ परद्यन
         खोच़ान
5. मु: च़ॖनि फ्वति त्यॊंगुल
    अ: सु युस ज़िठ्यन हुन्द
         नाव मन्दॖछावि/गरॖ
         बार वुजारॖ करनवोल
**********************
1. गंड....Knot
2. गंडॖ.... Onion
3. गंडॖनावुन...To get
             something tied
4. गंडुन.... Betrothal
             ceremony/To
             tie
5. गंदुख..... Sulphur
6. गंदख-डऺब्य....Match
                         box
7. गंदख-तुज...Match
                       stick
8. गनुन....To become
              thick/To deep/
              Dense
9. गनॖ...... Sugarcane
10. गनॖरस....Cane juice
**********************
      गीता ज्ञान :अध्याय-10
च़ॖ ज़ीवन पऻदॖ करनवोल ब्रह्म
ज़गत स्वामी दीवन हुन्द दीव तॖ परशोतम
तॊह्य पानय पानस ज़ानान
वॊन भगवानन गीता ज्ञान
**********************
शुर्य गछ़न कमज़कम त्रॆ हऻन आसॖन प्रथ मऻलिस माजि तॆली हॆकि सानि ज़ऻच़ हुर्येर सपदिथ संख्यायि मंज़। गरन मंज़ ति रोज़ि शुर्यॆन हुन्द शॊगुला। असि पज़ि पनॖन्य बच्चन वुह्य प्यठॖ पंच़ॖह वुहरिस ताम खांदर करुन। पंच़ॖह्य वुहर्य ह्यॊर छु बच्चॖस खा़दरुक शौख कम ह्यवान गछ़ुन। सु छु पतॖ ज़्यादॖ पौंसस लोर गछ़ान तॖ गर-गृहस्ती कुन छु तस कम रुजाव रोज़ान। अख प्रोन मुहावरॖ छु त्रॖह गव सॖह चतजिह गव पतजी तॖ शॆठ गव ब्रेठ। माने त्रॖह वुहरिस ताम ओस लऺडकस या लऺडकी खांदर कऺरिथ त्रॆ च़ोर शुर्य आसान ज़ामॖत्य तॖ पानस सॗत्य सॗत्य ॴस्य तिमन ति रछान तॖ गरॖच ज़िम्वऻरी ति सम्बालान। मगर अज़कल यॆलि लऺडकॖ या लऺडकी त्रॖह, दॊयत्रॖह या च़ॊयत्रॖह वुहुर आसि अनॖहूरुय, सु कर बनि मोल या मऻज्य सु कर रछि पतॖ शुर्यन तॖ सु कर सम्बालि पनुन गर-गृहस्त। इस्लिये तऺमिस खांदरॖच त्रिष्णा कम तॖ रॊपियन हॖन्ज़ त्रिष्णा ज़्यादॖ रोज़ान। असि पज़ि नॖ पनॖनिस शुरिस ज़ऻच़ न्यबर खांदर करनस इजाज़त द्युन। ज़ऻच़ न्यबर खांदर करनॖ सॗत्य छि वारियाह द्यमऻगी मसलॖ पऻदॖ सपदान यिम बयान् छि कम यिवान करनॖ मगर च़ेनॖनॖ यिवान ज़्यादॖ। गरस मंज़ तनाव रोज़ान, ज़बऻन्य रऺन्ग्य, स्वबऻव्य रऺन्ग्य, रसमव रिवाजव रऺन्ग्य वगैरा वगैरा।
**********************
"या देवी सर्वभूतेषु शक्ति रूपेण संस्थिता नमतस्यै नमस्तस्यै नमस्तस्यै नमोनम:"
पऺरिव यि मंत्र ति
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
 नऺविव तॖ फॊलिव
  भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)