22.01.2019

22.01.2019, माघॖ गटॖ पछॖ  (कृष्णॖ पक्ष), द्वय (द्विती) बॊम्वार (मंगलवार),श्री सप्तर्षि सम्वत 5094, राश सिंह (रऻच़ हॖन्ज़ॖ 11.31 बजि प्यठॖ), ऋतु शिशर (चलान)
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबात
**********************
1. मु: युस फॊल सु फॊल
         ग्वनचै
    अ: ड्यकॖ बजर छु आसान
         अवलय सॗत्य सॗत्य
2. मु: युस नॖ पनॖनिस ज़ुवस
         खॊच़ि सु कति खोच़ि
         ब्यॆयि सॖन्दिस ज़ुवस
   अ: युस नॖ पनॖनिस ज़ुवस खोच़ि
     सु छु करान ब्यॆयि सॖन्दिस
      ज़ुवस मशकॖ
3. मु: युस यस दारि सु तस
         होरि   
    अ: कर्ज़दारस छु द्यारॖ
         वऻलिस कुन दारॖ होर
         करॖन्य
4. मु: युस युहुन्द गरॖ च़ाव सु
         तहन्ज़ि माजि ज़ाव
    अ: ॳछ साफ़ तॖ अथॖ
          साफ़ आसॖन्य छि
          यज़तॖच निशऻनी
5. मु: युस युथ आसि तस
         त्युथ बासि
    अ: दिलस मुतऻबिक़ अमल
         सादस छि सऻरी साद
         बासान, च़ूरस छि सऻरी
         च़ूर बासान
**********************
1. गछ़......Go
2. गछ......Decoration
                Morter work
3. गुछ....A bunch/
              Cluster
4. गदा....Poor/Beggar
5. गॊद... Hole
6. गदॖ..... Mattress
7. गऺज्य...Earthen fire
              place
8. गुटनॖ...A type of trou-
              ser
9. गटॖ....Darkness/
             Misery/Gloom/
             Dusk
10. गटॖकार...Cloudness
         Obscurity/Shade
         Darkness/Gloom
**********************
        गीता ज्ञान:अध्याय-10
सथ महारॆश्य तॖ च़ोर अमि ब्रोंठिम
संकादिक तॖ च़्वदह छि यिम
यि सम्सारॖच प्रज़ा तिहंज़ॖय ज़ान
वॊन भगवानन गीता ज्ञान
**********************
ऊतरॖ कुनवुहमि जनवऺरी 2019-मि द्वह आव Holocaust Day यानि दऺदॖवनॖ द्वह मनावनॖ राजगाटॖ, सैंट्रल पार्कि कन्नाठ प्लेसॖ, गुडगांवॖ सुबॖ प्यठॖ शाम ताम मगर वुछनस तल आव ज़ि ॳस्य कऻशिर्य बटॖ ॴस्य नॖ ज़्यादॖ सम्यॆमॖत्य यिमन ब्यॊन ब्यॊन जायन। कम नफ़री आसनुक वजह छु म्यॆ बासान ज़ि ॳस्य या सानि यिम संस्थायि छॆ नॖ वुनि ति पायस प्यवान। वुनि ति यि दफ्ज़ि ति त्रॖहॖय वुहिर्य पतॖ ति छिनॖ पानॖवुन्य यकुत थविथ पकान। बासान छि असि छि वाकय काहन गाव रऻवमॖच़। सैंट्रल पार्कि मंज़ ओस कश्मीर सम्मति तॖ पनुन कश्मीर संस्थायव बडॖ दूम-दामॖ सॗत्य मॆहनत कऺरमॖच़ तॖ 1990-तुक दऺदॖवनॖ लूकन ताम हावनुक बन्दोबस्त कॊरमुत मगर नफ़री वुछन वऻल्य ॴस्य वारियाह यानि त्रॆ च़ोर हथ मगर तिमन मंज़ ॴस्य कऻशिर बटॖ मसाह हथ डॊड हथ तॖ बाकय ॴस्य व्वपरॖय। राजगाटस प्यठ ति ओस युथुय तमाशा। नफ़र त्रॖह-च़तजी यिमन मंज़ शुर्य दऺह पंदाह तॖ ज़नानॖ पांछ़-दऺह तॖ दऺह-पंदाह मर्द। हालांकि प्रसवऻल्य ॴस्य वारियाह अल्बतॖ तिमन दऺदॖवनॖच व्यथा बोज़नावन वाल्यन हॖन्ज़ तेदाद ॴस स्यठाह कम दफ़ ज़ि ना आसनस बराबर। ज़ानि दय यिमन संस्थायन क्याह अडचन छि यिवान इकॖवटॖ पकनस मंज़। ज़ानि दय क्वस रुकावठ छि यिवान असि बटन पानॖवुन्य मिलच़ार करनस मंज़। म्यॆ छु बासान ज़ि व्वंय छु दऺदॖवनुक दोद सारिनी मॊठॖमुत। हालांकि दपान छि द्राग छु च़लान दाग़ नॖ। तमि हिसाबॖ गॊछ़ नॖ यि दोद या यि दग़ असि मशिन्य मगर शायद मा छिनॖ यछ़ान ॳस्य तिमन ज़ख्मन बार बार क्रोल तुलुन तवय छि नॖ यछ़ान यि दऺदॖवन द्वहुक मातम मनावुन
**********************
"या देवी सर्वभूतेषु चेतनेत्य भिधीयते, नमस्तस्यै नमस्तस्यै नमस्तस्यै नमोनम:"
पऺरिव यि मंत्र ति दॊहय
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
 नऺविव तॖ फॊलिव
  भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)