15.01.2019

15.01.2019, पॊह (पौष) ज़ूनॖ पछॖ (शुक्ल पक्ष),नवम (नवमी),बॊम्वार (मंगलवार),श्री सप्तर्षि सम्वत 5094, राश मेष (चलान), ऋतु शिशर (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबात
**************************
1. मु: यसस्न्ज़ कांगॖर तऻम्य-
         सॖन्दिस फऺरिस
    अ: पनुन चीज़ छु ॴख़ॖर
        पानसॖय इस्तिमालस यिवान
2. मु: यकुर मऻरिथ अथन फख
    अ: कुनि तिथिस कारस ज़ंग
        त्रावॖन्य यॆमि अंदरॖ नॖ लान्ति
         सिवाय कॆंह ति लारि
3. मु: यॆलि डलस दरवाज़ॖ छि यलॖ
         गछ़ान तॆलि छु नॖ कऻन्सि
         हुन्द बोज़ान
    अ: ताक़तस तॖ गाटॖजारस निश
          छु नॖ कांह दरान
4.मु: यॆलि यि शूबि तॆलि ति करुन
   अ: वख्तस प्यठ कऻम करॖन्य
5. मु: यॆलि कन तॆलि नॖ स्वन यॆलि
         स्वन तॆलि नॖ कन
    अ: बे-मॊकॖ कांह चीज़ हऻसिल
          सपदुन
**************************
1. लूर.....Stick/Cane/Rod
2. लूर तुलॖन्य....To attack/To
             assault/To charge
3. लूर लायिन्य.....To throw
             stick at someone
4. लूर वायिन्य....To use stick
                            in attack
5. लूर हावॖन्य.....To frighten
6. लोरि कुटुन.....Small stick
7. लूख......        People
8. लूकॖ अरसाथ.....Countless
               people/A great
              number of people
9. लूकॖ बऻथ......Folk song
10. लूकॖ कथ....Folk tale
**************************
        गीता ज्ञान  : अध्याय-9 :
म्यॆ दिथ मन बखॖत्य सान कर पूज़ा
प्रणाम कर म्यॆ मंज़ लाग आत्मा
पान पुशराव म्यॆ कुन थव ध्यान
वॊन भगवानन गीता ज्ञान
**************************
असि मंज़ छि कॆंह ब्यॆनि बऻय कुनि कुनि चीज़स यछ़ तॖ पछ़ थऺविथ पनुन विश्वास बऺडरावनॖच कूशिश करान रोज़ान ति ज़न गव ज़ि ज़ूनॖ पछॖ ॴठम छि पताह व्वंय ज़ि यि छि फ़ाकॖ ॴठम। मगर यॆलि यि ॴठम प्यवान छि ब्वदॖवारि द्वह, अमि ॴठम हुन्द महत्व छु बडान तॖ छि वनान ज़ि अज़ छि ब्वदॖ-ॴठम। यिथय पऻठ्य शिशर सऻन्क्रात अगर प्यवान छि च़ऺन्दॖर्यवारि द्वह अमि दुहुक महत्व छु बडान। अथ पतॖ क्याह पज़र छु या क्युथ थज़र छु यि ह्यॆकि कांह ग्यऻनीय वऺनिथ। शिशर सऻन्क्रात ॴस कऺशीरि मंज़ बडॖ हावॖ-बावॖ सान मनावॖनॖ यॊत ताम म्यॆ याद छु। ॳज़्यकि द्वह ॴस्य कांगॖर मनसावान यि सूंचिथ ज़ि सान्यन प्यॆत्रन आसि स्वर्गस मंज़ वंदस तॗरि मंज़ कांगरि हुन्द ज़रूरथ प्यवान। नवज़ाथ शुर्यॆन ॴस्य कलस प्यठ शुशरबोग लागान । यि शिशरबोग ओस ज़रबाब कपरस मंज़ त्रामुव पौंसॖ, गुह्य प्यूंत, क्रुन तेल, ह्यथ शुर्य सॖन्ज़ि टोपि प्यठ त्रॊप दिथ लागान यि ज़ऻनिथ ज़ि युथ नॖ ॳमिस शुरिस बूत प्रॗतन हॖन्ज़ नज़र लगि। यिथय पऻठ्य ॴस्य नवि न्वशि ति शिशरबोग लागान ज़ि युथ नॖ ॳमिस कांह बद नज़र पोरि। शिशर साल ॴस्य करान। रंगॖदार कांगॖर ॴस न्वशि ब्रौंहकनि थवान तॖ अंग-ॴश्यनाव ॴस्य अथ मंज़ कॆंह पौंसॖ ति त्रावान। दूम दामॖ सान ओस यि द्वह मनावनॖ यिवान मगर व्वंय छु नॖ म्यॆ बासान ज़ि ॳस्य छि यि रीथ पालान। मकर सऻन्क्रऻच़ प्यठ ॴस्य सूमयार मंदरॖ हब्बॖकऺदल कऺशीरि मंज़ लूख श्रान करॖनि यिवान सुबहऻय प्रभातन। मेलॖ ओस लगान वख्त अकि।
**************************
"सर्वे भवन्तु सुखिना सर्वे सन्तु निरामया। सर्वे भद्रानि पश्यन्तु मा कश्चिद दु:खम् भवेत"
यि मंत्र ति गछ़ि दॊहय परुन
**************************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**************************
 नऺविव तॖ फॊलिव
   भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)