19.01.2019

19.01.2019, पॊह (पौष) ज़ूनॖ पछॖ (शुक्ल पक्ष), त्रुवाह (त्रयोदशी), बटॖवार (शनिवार/ शनिश्चरवार),श्री सप्तर्षि सम्वत 5094, राश मिथुन (चलान), ऋतु शिशर (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबात
**************************
1. मु: ज़्युठ ॴसिथ कूंछ़ गछ़ुन
    अ: ज़िठिस यज़थ रावुन
2. मु: ज़्यवॖय छि तारान ज़्यवॖय
         छि मारान
    अ: ज़्यॆवि सॗत्य छु जान ति
          यिवान वनॖनॖ तॖ ख़राब ति
3. मु: ज़ीय छय हीय
    अ: ज़ेनॖनॖ मेनॖनॖ सॗत्य छु गरॖबार
         फ्वलान
4. मु: ज़्यॆवि छॆ नॖ ॳडिज
    अ: ज़्यव फिरॖन्य छॆ नॖ मुश्किल
         ज़्यव बदलावनस छॆ नॖ तऻर
         लगान
5. मु: ज़्यव छि शमशीर
    अ: ज़्यॆवि सॗत्य ह्यॆकि वारियाह
         अतुर गऺछ़िथ
**************************
1. गाह.....Light/Splendour/
               Sunshine
2. गाव.....Cow
3. गान.....Shed
4. गऻव गान...Cowshed
5. गुर......Horse
6. गुर्य तबेलॖ....Horse stable
7. गाह बॆगाह/गाहे....Occa-
           ssionally/At any
           time
8. गाह त्रावुन....To shine/To
                  make manifest
9. गाह प्यॊन...To be illumi-
                nated/Splendid
10. गाव चावॖन्य....To milk
                            the cow
**************************
       गीता ज्ञान  : अध्याय-10
यत्न करनॖच शक्ति तॖ ज्ञान।
प्रावान क्षमा पज़र यऺन्द्रय मन वश
थवान
ज़ानुन स्वख द्वख उतपती प्रलय समान
वॊन भगवानन गीता ज्ञान
**************************
ज़ऺर्य बूज़ बहि वुहिर्य बडशाह मूद। अज़ गऺयी अठोवह पूरॖ तॖ कुनत्रॖहविम वऺरी प्यव व्वंय ह्यॊतुन सॖरॖ-गॖरॖ गछ़ुन असि ज़ि यकुत आसुन छु सख़ ज़रूरी। वुन्युख ताम ॴस्य पनॖन्य पनॖन्य च़ॊट गरमावान सऻरीय ब्यॊन ब्यॊन तॊन्दरन मंज़ मगर शालॖ सॖन्ज़ कुनी टुंग ॴसनॖ। वुनि ति छि कॆंह हून्य लऺट्यसॖन्द्य पऻठ्य तऺथ्य हजरस मंज़ दफ अमापॊज़ कूशिश छि जऻरी ज़ि सऻरीय बटॖ समहऻन इकॖवटॖ तॖ ॳक्यसॖय रज़ि लमहऻन तॖ द्यवॖ पनुन मक़सद गछ़िहे पूरॖ। बूज़ुम कॆंच़व संस्थायव छि हामी बऺरमॖच़ ॳक्यसॖय छत्तरि तल रूज़िथ मसलॖ हल करन बापथ। यॊदवय यि पज़र छु भगवान दीनख सबूर तॖ नऺविन तॖ फॊलिन। यॊदवय कॆंह नादान छि वुनि अलगॖय अथॖ वुशनावान पनॖनि कांगरि प्यठ तिमन पज़ि अहम् त्रऻविथ बाकियन संस्थायन सॗत्य अथॖवास कऺरिथ पकुन तॖ पनुन दम हावुन सॖह सॖन्द्य पऻठ्य। इकवटॖ रोज़नस मंज़ छु ताक़त।
यी हाल छु असि पनॖन्यन गरन मंज़ ति अज़कल नज़र यिवान। यिमन गरन मंज़ बऻच़ सऺमिथ छि तिम छि ख्वशकॖस्मतवऻल्य। भगवान कऺर्यनख बजाह। मगर यिमन गरॖन हॖन्द्य बऻच़ ब्यॊन ब्यॊन छि तिम गरॖ छि बासान परॖछ़्यॆन छि, खऻल्य-खऻल्य हि। जायि हॖन्ज़ व्यछ़य छा वजह किनॖ व्यच़ारन हुन्द ब्यॆन्यर छु यि किनॖ ब्यॊन गरॖ करनुक तमाह छु, कॆंह न तॖ कॆंह छु। कति तिम पांछ़ शॆ ॴठ नव शुर्य, अज़ यिमन अख ज़ॖय तिमन ति खुर्य। फीस-वीस बऺर्य-बऺर्य पेरैंट बरहम, दम करु दम, दमॖकाका दम।
**************************
"शरणागतदीनार्तपरित्राणपरायणे
सर्वस्यार्तिहरे देवि नारायणि नमोस्तुते"
परिव यि मंत्र ति
**************************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**************************
नऺविव तॖ फॊलिव
  भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)