26.01.2019

26.01.2019, माघॖ गटॖ पछॖ (कृष्ण पक्ष), शॆयम (षष्ठी) बटॖवार (शनिवार/ शनिश्चरवार), श्री सप्तर्षि सम्वत 5094,राश तुला (रऻच़ हॖन्ज़ि 2.38 बजि प्यठॖ), ऋतु शिशर (चलान)...अज़ छि साहिब सतम ति
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबात
**********************
1. मु: च़लॖहऻ तॖ छुम नॖ वार
         रोज़हऻ तॖ छुसय बार
    अ: न रोज़नस वार तॖ न
         गछ़नस/प्रथ तरफ़ॖ
         मुश्किलॖय मुश्किल
2. मु: च़लवॖन्यन ब्रौंह तॖ
         लारवॖन्यन पथ
    अ: बुज़दिल तॖ बॆमन्दछ
 3. मु: च़लॖहऻ चानि दादि च़ॖ
          ह्यथ सॗत्य
    अ: यॆस निश तंग सुय
          सॗत्य सॗत्य
4. मु: छ़ऺरॖय मऺट छि वज़ान
    अ: न आसनस मंज़
         ज़्यादॖ आसनॖक्य दम
         दिन्य
5. मु: च़कि तलॖ कडॖन्य कथ
    अ: राज़ मोलूम करुन
**********************
1. गुर....Horse/Trigger
2. गुरॖ....Brown
3. गुरुट....Brownish
4. गुरॖट्य म्यॆच़...Brown
                       clay
5. गुरुन...Small fish
6. गुरुस....Buttermilk
           without cream/
           Residue of
           skimmed milk
7. ग्रॊच़ुन....Shaking
         liquid in a vessel
8. ग्रेन.....Current
9. ग्रूस.....Farmer       10. ग्रॗस्यबाय..Peasant's
                     wife
**********************
      गीता ज्ञान  :अध्याय-10
म्यानि प्रभावुक तॖ ग्वनन हुन्द कीर्तन
लगातार कऺरिथ संत्वष्ट सपदन
म्यॆ वासुदीवस मंज़ वास करान
वॊन भगवानन गीता ज्ञान
**********************
कऺशीरि मंज़ अज़ त्रॖह च़तजिह वऺरी ब्रौंठ ॴस्य कऻशिर्य बट्टॖ गरॖ बऻच़व सॗत्य ब्वरुत आसान। ज़ॖ त्रॆ बऻय, अख ज़ॖ ब्यॆनि, मोल मऻज्य, नान्य बुड्यबब, बायन हॖन्ज़ॖ ज़नि, तिहिन्दि शुर्य, रवख हि मकान, शोर-गुल, क्रख-चिख यकजाह रोज़ुन, दॖरकाकॖन्यन हुन्द समुत, शुर्यन हुन्द पलुन बडुन अलगॖय माहोल ओस आसान। यूत मेछर तॖ ज़ेछर तिमन गरन मंज़ बोज़नॖ ओस यिवान, त्यूतुय टेछर तॖ छ़ॊचर छु व्वंय नज़र यिवान प्रथ कऻशिर्य बट्टॖ गरस मंज़ कऺशीरि न्यबर नीरिथ। अख या ज़ॖ शुरहेनॖ, जायि छ़ॊछर, फ्लैट खऺत्य हि, न ब्रान्द न आंगुन, न वॊट न कऻनीय, न डबि कुठ न दीवानखान, न वुज़ च़ु पूर मकानॖ। मोल मऻज्य ॳकिस जायि, शुर कॊट ब्यॆयिस जायि, गरॖ त्रॊपरिथ अंदरकुन बिहुन। न हक़ न हमसाय, अजीब अजीब माहोल व्वंय वुछनस मंज़ यिवान। सऻन्य ज़िठ्य यि नॊव वातावरन वुछिथ दम फुट्य, वनन हय तॖ वनन कऺमिस, वनन हय तॖ वनन क्याह। यिमन गरन मंज़ नॖ शुर नज़रि यिवान तति छि लबॖ ख्यॆनि यिवान। व्वंय कति नान्य शुरिस पनॖनिस फऺरिस तल रऺटिथ पऺरियन हॖन्ज़ॖ कथॖ बोज़नावान। याद यॆलि यॆलि प्यवान छु सु ब्रूंठिम दौर, ॳछन मंज़ छु नॖ ऒश रुकान। दिलस छि बूज़िथ तॖ च़ीनिथ थफ हिश लगान मगर हक़ीकत छि यी ज़ि ॳस्य छ़ॊकेयि वारॖ वारॖ। सान्यन शुर्यन तरि नॖ यि दूर्यर फिकिरी तॖ न तगि असि व्वंय तिमन हऻविथ द्युन ज़ि यथ ॴस्य वनान दान तॖ यि गयो ज़्युन।
**********************
"या देवी सर्वभूतेषु तृष्णा रूपेन संस्थिता नमतस्यै नमस्तस्यै नमस्तस्यै नमोनम:"
पऺरिव यि मंत्र दोहय
**********************
 नऺविव तॖ फॊलिव
    भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)