11.01.2019

11.01.2019, पॊह (पौष) ज़ूनॖ पछॖ (शुक्ल पक्ष),पऻन्च़म (पन्चमी) शॊकुरवार (शुक्रवार/जुम्मा), श्री सप्तर्षि सम्वत 5094, राश मीन (रऻच़ हॖन्ज़ि 2.2 बजि प्यठॖ), ऋतु हेमन्त (चलान), द्रठपऻन्च़ुक (पंचक) (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबात
**************************
1. मु: यॆम्य छ़ुन ॳकिस पुलहोर तॖ
         ब्यॆयिस पऻज़ार सु गव बर-
         ख़ुरदार
   अ: स्यॊद सादॖ रोज़नस मंज़ छु
        फ़ऻयदॖ
2. मु: यॆम्य वुछ नऺरिस तॖ दऺलिस सु
         गव ख़ार
    अ: यॆम्य दुनियाहस मंज़ कऻम
         करनस आर कॊर सु लगि नॖ
         कुनि
3. मु: यॆम्य लूकॖहॖन्ज़न म्यॆचन तॖ
         टुकॖरन प्यठ नज़र थऻव सु
         गव वऻरान
    अ: पानॖ कऻम न करनवोल छु
         वऻरान गछ़ान
4. मु: यॆम्य रॊछ पान तऺम्य रॊछ
         जहान्
    अ: युस पानस रछि सु रछि
          जहानस
5. मु: यॆम्य खऺन्य ब्यॆयिस गंग तस
         स्यॆदेयि पनॖनी ज़ंग
    अ: बदस छु बदकुय बुथ वुछुन
         प्यवान
**************************
1. लम......A hill slope
2. लमुन....To drag/To pull
3. लमनावुन....To get pulled
4. लऺम्य लऺम्य....Hardly/With
                       difficulty
5. लऺन्ड......Lame (Woman)
6. लंग........Thigh/Branch
                   of a tree
7. लंगुन...... Limping
8. लॊंगुन......A wooden pot
                    being used for
                    measurement
9. लंजि लंजि फेरुन..To move
               from one place
               to another
10. लम्बरदार....Village head
                         man
**************************
      गीता ज्ञान : अध्याय-9 :
सारिनॖय ज़ीवन मंज़ बॖ ह्युवुय रोज़ान
न म्यॆ कांह टोठ या अटोठ आसान
मगर पनॖन्यन बखत्यन बॖ नॊन बासान
वॊन भगवानन गीता ज्ञान
**************************
यॆलि ॳस्य कऺशीरि प्यठॖ च़ऺलिथ आयि ॳस्य आयि छऺक्करनॖ जायि जायि। बिहिन सॊम्ब जाय बीठ्य सऻरीय छ़ान्डनि। गामॖक्य शहरॖक्य अमीर ग़रीब कम पायिक थद्यि पायिक सऻरी लऺग्य छ़्यपन जाय छ़ान्डान। कांह ओस कऻन्सि ज़ानान या ओस नॖ ज़ानान सु मऺशरऻविथ ह्यॊत असि वारॖ वारॖ समुत करुन, अख ॳक्यसुन्द अथॖ रटुन तॖ ॳकिस ब्यॆयिस सॗत्य ज़ान पहचान करॖन्य। अमि बगऻर ओस नॖ चारॖ ति कॆंह। यि ब्रख ओस च़ालुन यिथॖ तिथॖ तॖ गऺयि च़ालान। ह्यॊत ॳस्य वारॖ वारॖ ख्वर डऺखरावुन तॖ ह्यच़ॖ असि नरि ज़ंगॖ वाहरावॖनि। नवि सरॖ ह्यॆत्य हमसायि छ़ान्डॖन्य, नवि सरॖ प्यॆयि तिम अज़मावॖन्य, नवि सरॖ अख ॳकिस प्यठ ॳछ वऺटिथ विश्वास करुन, अख ॳकिस अकार बकार युन। यॊत वऻतिथ गव मऺशथॖय कुस छु वरमुल्युक तॖ कुस छु अनन्तनागुक। कुस छु रॗन्यवार्युक तॖ कुस छु कावॖडार्युक। असि प्यॆयि नऺव ज़ान पहचान करॖन्य तॖ अज़ गऺयि असि व्वंय त्रॖह वऺरीय तॖ वुनि ति यॊदवय कांह अनज़ान कुनि जायि मेलान छु, पृछ़ॖगऻर छि वुनि ति करान रोज़ान। ति क्याज़ि होश हवासय रूद नॖ असि च़लनॖ पतॖ वऺरी-बद्यन। ब्वयी रूज़ नॖ कुस कति छु बऺसिथ। भगवान सुन्द शुखुर छु ज़ि ॳस्य ह्यॆतिन मेलॖन्य अख ॳकिस हवनव दऺस्य। कीर्तनव दऺस्य, तॖ पिक निकॖ दऺस्य।
रूज़िन यि मिलच़ार बरक़रार। ॳथ्य मंज़ छु असि ॴखॖर वार तॖ व्यस्तार।
**************************
"देहि सोभाग्यम् आरोग्यं देहि मे परमं सुखम, रूपं देहि जयं देहि
यशो देहि द्विषो ज्वहि"
परिव यि मंत्र दोहय
**************************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**************************
 नऺविव तॖ फॊलिव
   भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)