09.01.2019

09.01.2018, पॊह (पौष) ज़ूनॖ पछॖ (शुक्लॖ पक्ष), त्रय (तृतीय), ब्वदवार (बुधवार), श्री सप्तर्षि सम्वत 5094, राश कुम्भ (दुहचि 1.14 बजि प्यठॖ), ऋतु हेमन्त (चलान)...ॳज़्यकि प्यठॖ गछ़ि द्रठॖपऻन्च़ुक (पंचक) शुरु।
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबात
**************************
1.मु :यॆम वॊन पॊज़ तऺमिस कऺडॖख
        ॳछ
   अ: पॊज़ च़ालुन छु दुशवार
2. मु: यॆमिस गॊबुर तऺमिस नॖ बतॖ
        यॆमिस बतॖ तऺमिस नॖ गॊबुर
    अ: कुनि न तॖ कुनि रऺंग्य व्यछ़य
         आसॖन्य
3. मु: यॆम द्युत ॴस सु दी खोस
    अ: पऻदॖ करन वोल छु रीज़ॖक
         ति दिवान
4. मु: यॆम ह्यॊत सु हॊत
    अ: शकॖ ब्यमारि छु नॖ कांह ति
          यलाज
5. मु: यॆम रॊट तऺम्य खॊट
    अ: पर्दॖदऻरी हुन्द कार
**************************
1. लकब..A title/A surname
2. लकब खारुन...To praise/
                   To give honour
3. लऺकवॖ...Facial paralysis
4. लफ़ॖज़......Word
5. लफ़ॖज़ ब लफ़ज़...Word by
                              word
6. लफ़ंगॖ.....Bad character/
                  A braggart
7. लफ़ंगिल... Hooligan/
                     Hoodlum
8. लऺकॖर......Wood/Timber
9. लख्यन.... Symptoms/
            Sign/Indication/
            Symbol
10. लखचुन.....Mole
**************************
        गीता ज्ञान : अध्याय-9 :
हे अर्ज़न च़ॖ युस कांह ति कर्म करान
तप हवन करान दान दिवान
यि सोरुय म्यॆ अर्पण कर प्रेमॖ सान
वॊन भगवानन गीता ज्ञान
**************************
वाकय ओस यि पिक निक। गरॖ ॴठ दऺह ॴस्य। शुर्य जवान बऺड्य तॖ बुज़र्ग मिलऻवथ ॴस्य करीबन नफ़र त्रॖह पांच़त्रॖह। प्रथ ॳक्य गरन ओस ऒनमुत गरी बनऻविथ ख्यन-च्यन यानि शीर्य-चाय, मॊगॖल्य-चाय, लिप्टन-चाय, कान्दॖर्य-वानॖचि च़्वचि, बतॖ, तऺहर, वष्नऺव्य यानि च़ामन, मटर-च़ामन, मुजि-च्यॆटिन, नॆनि यानि रोगनजोश, मछ़, क्वकुर तॖ प्यठॖ सॊहन-पापडी वगैरा वगैरा। बॆहनॖच व्यवस्था ॴस आमॖच़ करनॖ बडॖ नफ़ीस पऻठ्य। पार्कि मंज़ बॊड मेज़, मेज़स प्यठॖ कपरुव मेज़पोश, ब्यॆयिस मेज़स प्यठ ख्यन-खॊरदनी हुन्द सामानॖ वतीरॖ सान आमुत थवनॖ। कोरि न्वशि लऺडकॖ तॖ जवान लऺगय बऻगरावस। बासान ओस ज़ि ज़न छि ॳस्य कुनि निशात बागस मंज़ बिहित। असुना-गिन्दुना कॊर, कथा बाथा कऺर, अख ॳक्यसुन्द बुथ वुछ। मोबायलस प्यठ यिमन सॗत्य वार्तालाप करान ॴस्य, तिहॖन्ज़ आवाज़ ॴस कनन ताम वातान मगर यि ॴस नॖ पता लगान ज़ि अम्मा यि नफ़र कुस छु या क्वस छि। यॆम पिक निकन कऺड सॊ फुठ। अख ॳक्यसुन्द दीदार कॊर रु ब रु। मन गव ख्वश। नऺज़दीकी बडेयि। प्रेम बड्याव। ब्यॆयि दुबारॖ यिथय पऻठ्य मिलच़ार बऺडरावनॖच व्वमेद बडेयि। यिथय पऻठ्य छि ब्यॆयि ति अख ज़ॖ संस्थायि यिम अथ पिक निकस मंज़ आस्था थऺविथ छि ज़ुवॖ जानॖ सान थॊद वऺथ्य वऺथ्य कऻम करान तॖ तमी दऺस्य समाजिच सीवा करान। तम्युक ज़िक्र करव ब्रौंहकुन।
**************************
"परात्परतरम् ध्येयं नित्यम् आनन्दकारणम्, हृदयाकाश मध्यस्थं शुद्दस्फटिक सन्निभम्।"
परिव यि मंत्र ति दॊहय...गुरु स्तुति
**************************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**************************
   नऺविव तॖ फॊलिव
     भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)