13.01.2019

13.01.2019, पॊह (पौष) ज़ूनॖ पछॖ (शुक्लॖ पक्ष) सतम (सप्तमी) आथवार (एतवार/रविवार), श्री सप्तर्षि सम्वत 5094, राश मीन (चलान), ऋतु हेमन्त (चलान), द्रठॖपऻन्च़ुक (पंचक) (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबात
**************************
1. मु: यॆम्य कॊर आर सु गव ख़ार
    अ: कुनि विज़ि छु आर करनस
         खुर यिवान
2. मु: यमॖ यितम तॖ नितम
    अ: ज़िन्दगी निशि बेज़ऻरी हुन्द
         इज़हार
3. मु: यॆलि पीरन हिसाब मंगन
         कॖटॖ पीरन नठ अच़ि ज़ंगन
    अ: कमज़ूरी छि ॴख़रस नऺन्य
         गछ़ान
4. मु: यॆलि च़ॖ बादशाह आसॖहऻक
         तॆलि आसॖहऻ बॖ वऺज़ीर
   अ: अकीय शांदॖ श्वॊंगुन/अकीय
        नालॖ ज़ऺट कडॖन्य
5. मु: यॆलि ओसुम ल्वकचार तॆलि
         ओसुम नॖ म्वकॖजार
    अ: ज़िन्दगी हॖन्द्यन रॖत्यन
         दॊहन हुन्द नॖ हॖज़ तुलुन
**************************
1. लोसॖ गरॖ.... Maternity
                      home
2. लोलॖ सान..Affectionately
3. लोलॖ शऻयरी...Romantic
                        poetry
4. लोलॖ हॊत...With affection
                     With love
5. लोल बरुन....To love
6. लोंचल..... Angular
7. लोव.......Bundle of grass
8. लॊबर लो लो.....Meaning-
             less song/Worth-
             less song
9. ल्वच़र.....Lightness/
                  Softness
10. ल्वच़र लगुन....To get
             insulted/To be
             disgraced
**************************
       गीता ज्ञान : अध्याय-9 :
सु जल्दी धर्मात्मा छु बनान
आदि परम शऻन्ती छु प्राप्त सपदान
भक्त म्योन छु नॖ नष्ट गछ़ान
वॊन भगवानन गीता ज्ञान
**************************
गऺयि ब्यॆयि अकि फिरि प्रॖछ़गऻर शुरु ज़ि हेरथ कऺच़िमि छि। त्र्यॆमि मार्च किनॖ च़ूर्यमि मार्च। यि मस्लॖ गव अमि किन्य खडा ति क्याज़ि कॆंच़न कलन्डरन मंज़ छि त्र्यॆमि मार्च हेरथ आमॖच़ हावनॖ मगर सानि जंत्री यानि विज्येश्वर (ओंकार नाथ जियिन) पंचान्गॖ हिसाबॖ छ़ि हेरथ च़ूर्यमि मार्च 2019 फागुन गटॖ पछॖ त्रुवाह तॖ च़ऺन्दॖरवार आमॖच़ हावनॖ। चूंकि ॳस्य कऻशिर बट्टॖ छि अमीय जंत्री हिसाबॖ पनॖन बऺड्य द्वह मनावान, असि पज़ि नॖ दॊयिम्यन कलन्डर्न कुन ज़्वन थवुन। पऺतिमि लटि ति गऺयो कथ ताम बऺडिस दॊहस प्यठ यि मस्लॖ खडा तॖ म्यॆ करेयो ओंकार नाथ जियस फ़ोन जवाब द्युतनम म्यानि जंत्री मंज़ हऻविथ तिथि छु सऺही बाक़ी छॆ नॖ म्यॆ पता कॆंह। गूर वन्याह ज़ांह ज़ि म्योन द्वद छु ख़राब। असि ति कांह ब्यॆयि चारॖ छु नॖ इस्लिये पज़ि ॳछ वऺटिथ पछ़ करॖन्य पनॖनी जंत्री प्यठ। मुम्किन छु ज़ि गणितस मंज़ आसि कॆंह फ़रॖख यिवान यमिच असि ब्वय छॆ नॖ बऺहस कऺरनॖ सॗत्य नेरिनॖ कॆंह हऻसिल। मऺशरऻविव बब कलन्डर, साईं कलन्डर, सतीसर पंचान्ग वगैरा वगैरा तॖ पऺकिव पनॖनि पन्चांगॖ हिसाबॖ तॖ रूज़िव तनाव-मुक्तॖ।
**************************
"शान्ताकारं भुजगशयनं पद्मनाभं सुरेशं, विश्वाधारं गगनसद्रशं मेघवर्णं शुभाड्गंम।लक्ष्मीकान्तं
कमलनयनं योगिभिर्ध्यानगम्यं वन्दे विष्णुं भवभयहरं सर्वलोकैकनाथम्।"
पऺरिव यि मंत्र ति दॊहय
**************************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**************************
 नऺविव तॖ फॊलिव
   भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)