18.01.2019

18.01.2019, पॊह (पौष) ज़ूनॖ पछॖ (शुक्ल पक्ष) बाह (द्वादशी),शॊकुरवार (शुक्रवार/ जुम्मा), श्री सप्तर्षि सम्वत 5094, राश मिथुन (रऻच़ हॖन्ज़ॖ 11.31 बजि प्यठॖ), ऋतु शिशर (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबात
**************************
1. मु: युस युथ करि सु त्युथ सरि
    अ: युस युथ ब्योल ववि सु
         लोनि सुय फल
2. मु: युस म्यॆ ज़ाव सुय म्यॆ टोठ
         यस बॖ ज़ास तस बॖ टोठ
   अ: रिश्तॖ छु मतलबस प्यठ
        दऺरिथ आसान/मतलबी
        रिश्तॖ
3. मु: युस यस ज़ानि सु तस मानि
    अ: ज़ान गऺयि जहान्/ज़ान छि
         बऺड चीज़
4. मु: यस लॊग दब तस लारैयि
         रब
    अ: यस ग़लती गछ़ि तस छु
          सज़ा
5. मु: यस द्युन तगि तस तगि
          ह्यॊन ति
    अ: गाटुल छु नॖ गाटस मंज़
         गछ़ान
**************************
1. गब.....Leaf in bud/Part
2. गबॖ.... Local carpet/
               Mattress type
3. गऺब.... She sheep
4. गालुन...To melt/To dis-
                 solve
5. गाल.... Shame/To mix
6. गाम....Village
7. गऻमी....Villager/Rural
8. गऻन्ठ/गान्ठ...kite
9. गान्द/गन्द....Bad smell/
                       Rotten
10.गान्गल....In fix/Distur-
                   bance
**************************
        गीता ज्ञान  : अध्याय-10 :
ज़्यनॖ रॊस आदि रॊस युस म्यॆ ज़ानान
सारिनीय हुन्द ईश्वर मानान
सु ज्ञानॖवान पापव निश म्वकलान
वॊन भगवानन गीता ज्ञान
**************************
मऻलिस माजि प्यॆयि ह्यमथ करॖन्य तॖ पनॖनिस शुरिस कनन त्रावुन ज़ि ज़ऻच़ न्यबर खांदर करुन छु नॖ वऻजिब ति क्याज़ि गरस मंज़ छु रोज़ान ज़बऻन्य हुन्द व्वथॖवार, ख्यनस-च्यनस छु नॖ रोज़ान व्यस्तार, ॳकिस-ब्यॆयिस समजुन गछ़ान दुशवार, गरचि सभ्यतायि मंज़ यिवान दरार, माजि-ज़्यव रावान तिहन्दिस नव-ज़ात शुरिस। सु छु नॖ ह्यकान वऺनिथ ज़ि सु ॴरिम छा किनॖ पऻरिम छु। सु छु नॖ पनॖन ज़बान कऻशुर ह्यकान रऺछ़रऻविथ। गरस मंज़ छु माहोलस मंज़ स्यठाह तब्दीली नज़र यिवान व्वथनस बॆहनस मंज़, तोर तरीकस मंज़, रिश्तदऻरी निबावनस मंज़। सऻन्य कूर यॊदवय ज़ऻच़ न्यबर खान्दर करान छि तऺमिस ति छु ततिकिस माहोलस मंज़ मेलनस अख वख लगान। तम्यसुन्द शुर छु नॖ ह्यकान वऺनिथ ज़ि सु छा कऻशुर किनॖ तमि ज़ऻच़हुन्द यथ ज़ऻच़ मंज़ तससॖन्ज़ मऻज्य बागॖन्य आयि। गरस मंज़ छु ॳन्दॖर्य ॳन्दॖर्य द्यमऻगी तनाव रोज़ान। अख ॳकिस वऺनिथ छि नॖ ह्यकान स्व छि अलग कथ। मजबूरी मंज़ छि दोनवय दमफुट्य गछ़ान। यॆलि यि शुर बडान अख समस्या छि बनान ज़ि ॳमिस कस ज़ऻच़ सॗत्य गछ़ि खांदर। यि छु पनॖनिस समाजस मंज़ मसलॖहथ पऻदॖ करान। असि पज़ि नॖ शुरिस खुलॖ डील दिन्य ज़ऻच़ न्यबर खान्दर करनॖच बऺल्कि पज़ि असि तिछ़ वथ छ़ान्डॖन यॆमि सॗत्य ॳस्य ह्यकव पनुन गरॖ पनॖनि ज़ऻच़ मंज़ॖय बऺडरऻविथ तॖ पानॖवुन्य समुत थऻविथ तॖ पनॖन्यन शुर्यन ब्रौंहकुन साफ वथ हऻविथ।
**************************
"कर्पूर-गौरं करुणावतारं संसार-सारं भुजगेन्द्रहारम्।
सदा रमन्त हृदयारबिन्दे भवन भवानी सहितं नमामि।।"
पऺरिव यि मंत्र ति दॊहय
**************************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**************************
  नऺविव तॖ फॊलिव
    भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com  ति वुछिव)