23.01.2019

23.01.2019,माघ, गटॖ पछॖ (कृष्ण पक्ष), त्रय (तृतीय) ब्वदवार (बुधवार),श्री सप्तर्षि सम्वत 5094, राश सिंह (चलान),ऋतु शिशर (चलान)
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबात
**********************
1. मु: युस स्वरुपन बुछ सु छु
         गासॖ रज़न खॊच़ान
    अ:यस ख्वरस तल त्यॊंगुल
         गव सु छु त्यम्बिर्यन
         खॊच़ान
2. मु: युस हदॖ डॊल सु रूद
    अ: हदॖ न्यबर नॆरुन गव
         रावनस बराबर
3. मु: युसॖय खॆयि सेर सुय
         सपदि सीर
    अ: माक़ूल आमदनी वोल
         छु आसान ख्वश
4. मु: युसुय ज़बर खॆयि सुय
         मरि
    अ: जुरुम करनवऻलिस छु
         सज़ा ज़रूर तुलुन
5. मु: युसुय ज़ेनि सुय हारि
         युसुय हारि सुय ज़ेवि
    अ: यॆमिस हारनॖच त्वछ़
         आसि सुय छु ज़ेनान
**********************
1. गर....If
2. गरॖ....Home/Origin
             Family/House
             Residence
3. गरॖ गरॖ ...From door
                 to door
4. गरा.....At one time/
           For some time
5. गरथ.... Structure/
                Design
6. गडुर..... Goiter
7. गडॖ......Water pot
8. गुदरुन...To happen/
                  To occur
9. गुदोम....Tether/Rope
                 for animal
10. गुदाम....Godown
**********************
      गीता ज्ञान :अध्याय-10 :
युस ज़ानि म्यॆ ईश्वर सॖन्ज़ विबूती
ब्यॆयि तोति सान म्यऻन्य यूगॖ शक्ती
सु बेशक़ छु बख्ति यूग प्रावान
वॊन भगवानन गीता ज्ञान
**********************
दऺदॖवनॖ दॊहुक यानि 19.01.1990-तुक दोद युस बटन हुन्द प्रेस वाल्यव होव वारियाहव चन्नॖलव प्यठॖ कांह असराह छु नॖ बासान सरकारस गोमुत आसि ति क्याज़ि अज़ ताम वोत असि यिथय पऻठ्य विलज़ार करान मगर तोति छु नॖ सरकारस कॖतॖ कॖतॖ गछ़ान। सऻरी तिम मुल्ज़िम यिमव सऻन्य बऻय ब्यॆनि पनॖन्यन गरिक्यन बऻच़न निशि छ़्यन नी कऺरिथ छि वुन्युख ताम आज़ाद फ़ेरान। भगवान दी तिमन पनुन सज़ा पानय अज़ नय तॖ पगाह मगर सोन सरकार दिल्लि मंज़ या कऺशीरि मंज़ क्याज़ि छु ॳछन पऺट गन्डिथ बिहित यी त्वर नॖ फिकिरी। सऻरी छि वनान या अंदाज़ॖ लगावान ज़ि असि कऻशिर्य बट्टन छॆ नॖ कुन्य कथ, कुन्य आवाज़, कुन्य जाय या कुनी संस्था। असि छि गऻमच़ॖ ल्वक्चि ल्वक्चि पनॖ डेंजि यिम मॖच़ॖरावनॖ छि आमच़ॖ तॖ यिमन छु नॖ यिवान कुनुय गन्ड दिनॖ। सरकार ति छु यिमन ब्यॊन ब्यॊन डेंज्यन ठिला ठिला कडान तॖ पकान। ॳस्य ति ब्यॊन ब्यॊन कुल्यन हॖन्ज़व शाखव प्यठॖ चिरिव चिरिव करान रोज़ान। व्वंय छि असि कॆंह राय तॖ मशवरॖ दिवान ज़ि शस्त्र अथस मंज़  तुलनु रॊस छु नॖ चारॖ कॆंह। मगर बट्टॖ युस श्राकपुच तुलनस छु परिहेज़ करान सु तुल्याह शस्त्र अथस मंज़। वख्त करि फऻसलॖ।
**********************
"या देवी सर्वभूतेषु बुद्दि रूपेण संस्थिता, नमतस्यै नमस्तस्यै नमस्तस्यै नमोनम:"
पऺरिव यि मंत्र दॊहय
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
  नऺविव तॖ फॊलिव
    भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)