06.01.2019

06.01.2019, पॊह (पौष), ज़ूनॖ पछॖ (शुक्लॖ पक्ष), ऒक्दॊह (प्रथमा/प्रतिपदा) आथवार (एतवार/रविवार), श्री सप्तर्षि सम्वत 5094,राश मकर (रऻच़ हॖन्ज़ि 12.24 बजि प्यठॖ), ऋतु हेमन्त (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबात
**************************
1. मु: रॖतिस छि दऺह बऻग्य
    ॶ: जान कारस छि सऻरी व्वमे-
         दवार आसान
2. मु: रतस तॖ त्रेशि
    अ: सख़ अदावथ
3. मु: रब तॖ सब हिशी कथा
    अ: यॆलि रॖतिस तॖ क्रॖतिस
          फ़रखॖय रोज़ि नॖ
4. मु: रऻछिस दॊहा तॖ च़ूरस गऺरा
    अ: वमरिहॖन्ज़ रऻछ छि रछ़ा
          ग़फलऺच़ किन्य क्वलि
          गछ़ान
5. मु: रातस वॊनमय लऻलनामॖ
         सुबहऻस दॊपथम लऻल क्या
         वाति मॊजलूनस
   अ: फिकरि तऻर्य तऻर्य ति नॖ
         फिक्री तरुन
**************************
1. लथ....A kick/Foot
2. लथ दिन्य.....To kick/To
                         abandon
3. लऺट.....Tail/End
4. लटावॖन्य....To run away/
               To leave/Sneak
               away
5. लठ........Disease
6. लठॖ........A type of cloth
7. लठुर......Lock of hair/
                  Tasselled tag
8. लचुर.... Foolish/Stingy/
                Vulgar/Outcast/
                Simpleton
9. लचकदार.... Flexible/Soft
             Elastic/Adoptable
10. लऺट्य तारुख....Comet
**************************
        गीता ज्ञान :अध्याय-9 :
यिम वीद वऺन्यमॖत्य स्वकाम कर्म करान
तिम यऺगॖन्य कऺरिथ स्वर्ग प्रावान
प्वनि कर्मव स्वर्गुक स्वख बूगान
वॊन भगवानन गीता ज्ञान
**************************
क्याह वजह छु ज़ि सऻनिस समाजस मंज़ अज़कल युस त्रॖह वुहुर अपोर ति त्वर, सु ति वुनि अनुहूरॖय। बॖ छुस चलावान "वरमाला" पनॖनि मोबायलॖ प्यठॖ पनॖनि समाजॖक्यन लऺडकन/लऺडकियन बापथ ति क्याज़ि युथ तिमन पनुन वर छ़ान्डनस आसऻयिश यी तॖ पनुन पसंद-दीदा लऺडकॖ या लऺडकी ह्यकन यॆमि मोबायलॖ दऺस्य छ़ऻन्डिथ बिना कुनि ह्वदहरि तॖ बिना कांह पौंसॖ ख़र्चिथ। मगर यथ वरमालायि मंज़ गऺयि म्यॆ नज़रि च़्वयत्रॖह वुहॖर्य लऺडकॖ तॖ लऺडकी यिमन नॖ वुनि खांदरॖय छु कॊरमुत छु। सु कर सना करि खांदर तॖ कर ज़्यन तस शुर्य तॖ कर बडन तिम तॖ कर करन गरॖ तॖ ज़ानन गृहस्ती। यिमय त्रॖह वऺरी पथकुन यॊदवय नज़र त्रावव, च़्वॊयत्रॖह वुहरिस शुरिस ॴस आसान त्रॆ-च़ोर शुर्य ज़ामॖत्य तॖ अज़कल छु त्रॖह, दॊयत्रॖह, च़ॊयत्रॖह वुहुर लऺडकॖ तॖ लऺडकी ति बासान शुरुय असि। तवय छि शायद सऻन्य ज़ऻच़ मंज़ अज़कल शुर्यन हॖन्ज़ संख्या कम ति क्याज़ि त्रॖह, दॊयत्रॖह या च़्वयत्रॖह वुहरिस बच्चस छु नॖ शायद पतॖ शुर्य ज़्याद या कम थावनुक मन ति करान। बाकय वजूहात शुर्य न ज़्यॆवरावनक्य ति छि सॗत्य सॗत्य पकान। पनॖनि ज़ऻच़ मंज़ यूत दूर ताम शुर खांदरॖ रॊस थवुन छु नॖ म्यऻन्य किन्य वऻजिब। यि करनॖ सॗत्य छु सोन समाज वारॖ वारॖ श्रॊकान तॖ छ़ॊकान। सान्यन शुर्यन हॖन्द्य शुर्य छि नॖ असि नज़रि यिवान ति क्याज़ि तिम छि पानय शुर्य ज़्यॆवरावनस डोल दिवान।
कर्मॖलीखाये कर नमस्कार
**************************
"शिष्यानां मोक्षदानाय लीलया देहधारिणे, सदेहेपि विदेहाय तस्मै श्री गुरवे नम:"
पऺरिव यि मंत्र ति दॊहय....गुरु स्तुति
**************************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**************************
  नऺविव तॖ फॊलिव
    भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)