28.01.2019

28.01.2019, माघॖ गटॖ पछॖ (कृष्ण पक्ष), ॴठम (अष्टमी), च़ऺन्दॖरवार (सोमवार), श्री सप्तर्षि सम्वत 5094, राश तुला (चलान),ऋतु शिशर (चलान)
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबात
**********************
1. मु: यॆड बापथ दीन बदलुन
    अ: तमाह बापथ ईमान
         रावरावुन
2. मु: यज़थ छु पनॖन्यन
         अथन मंज़
    ॶ: पनॖनिस दस्तारस पानॖ
          थफ करॖन्य
3. मु: यज़तॖच हार बेज़ती
         हॖन्ज़ खार छॆ नॖ बराबर
    अ: इन्सान छु यज़तॖ ब्वछ/
         यज़तस छु क़दॖर
4. मु: यॆच़ गॖयि म्यॆच़
    अ: ज़्यादॖ आसनस छु नॖ
         क़दॖर/ज़्यादतीय छि
         बेक़दरी
5. मु: यस वऺछ़ नऺर तऺम्य
         ख्यॆयि लूकॖहॖन्ज़ लऺर
   अ: जिस्मऻनी ताक़तुक ज़ोर
     ताक़तुक बे-जा इस्तिमाल
**********************
1. गुल.....Flower
2. गुलाब...Rose
3. गुलाम...Slave
4. गुलज़ार...Garden/
                 Flower beds
5. गुलरेज़...Shedding
             flower petals
6. गुलक़न्द...Conserve
             of roses/Candi
             ed/Roses
7. गुलकोज़.... Glucose
8. गुल म्यूठ.... Wedding
                      present
9. गुलोबन्द.... Scarf/
                      Muffler
10. गुलोब......Globe
**********************
     गीता ज्ञान :अध्याय-10 :
बॖ अनुग्रह कऺरिथ तिहॖन्दि अंत:कर्ण
ज्ञानॖ रूपॖ च़ांगि छुस गाशरावान
अज्ञानॖ गटॗ छुस दूर करान
वॊन भगवानन गीता ज्ञान
**********************
गरॖ ब्वरुत आसुन छु बेहद ज़रुरी। ब्वरुत माने बऻच़व सॗत्य। खान्दऻन्य बून्य यॊदवय बऺड तॖ फॊज्यमॖच़ आसि शॆहजार छु तथ बोनि तल ज़्यादॖ मेलान। यॊदवय ॳस्य पथ कुन नज़र त्रावव तॖ वुछनस तल छु यिवान ज़ि सान्यन गरन मंज़ ॴस्य  नॖ सति ॴठि कम शुर्य ॳकिस मऻलिस माजि आसानॖय तॖ तिम यॆलि बडान ॴस्य ओस बासान ब्वरुत गरा ह्यु। शुर्यन यॆलि खांदर ॴस्य करान तॖ गरचि नरि-ज़ंगॖ तॖ परि-पखॖ आसॖ ब्यॆयि बडान तॖ फऻलान। अंद्य-पऺख्य शुर्य ॴस्य पनॖनिस मऻलिस माजि हॖन्द्यन सॊम्बरऻव्यमॖत्यन अरमान यछ़ तॖ पछ़ बरान रोज़ान हालांकि तमि वख्तॖ ॴस कमऻय कम मगर तथ कम कमायि ॴस बरकथ ज़्याद। सान्यव ज़िठ्यव ॴस्य कम कमायि मंज़ तॖ शुर्य तन्दलि मंज़ ॴलीशान मकानॖ कऺशीरि मंज़ खडा कऺर्यमॖत्य। यि ओस यकुत, यि ओस मेछर, यि ओस लोल, यि ओस पान्यर, यि ओस यज़थ, यि ओस विश्वास, यि ॴस यछ़ तॖ पछ़। यिमन मकानन मंज़ कऺशीरि मंज़ सोन ल्वकचार छु द्रामुत तिम मकानॖ ॴस्य नॖ सरकारन दितिमॖत्य बऺल्कि सान्यन ज़िठ्यन हॖन्ज़ मॆहन्तिहुन्द फल, खूनॖच कमऻय, यिम चीज़ ॴस तॆलि मुम्किन यॆलि सऻरी सऺमिथ ॴस्य। तॆलि ति ॴस्य शुर्य परान लेखान। सानि ज़ऻच़ मंज़ छु नॖ वुन्युख ताम कांह ति नाखांदॖ रूदमुत।अल्बतॖ सानि माजि ब्यॆनि आसॖ कमॖय पाहन परिमच़ॖ। सान्यन मर्दन हुन्द कमाल ज़ऻनिव ज़ि कुन्य नरि प्यठ यीत्य शुर्य पालॖन्य तॖ यीच़ गरॖवेठ सॊम्बरावॖन्य तॖ गर बऺड्य बऺड्य बनावॖन्य। अज़कल छि सऻरी कमावान तोति छुख बुथ अवेज़ान।
**********************
"या देवी सर्वभूतेषु जाति रूपेण संस्थिता नमतस्यै नमस्तस्यै नमस्तस्यै नमोनम:"
पऺरिव यि मंत्र ति
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
 नऺविव तॖ फॊलिव
    भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)