16.01.2019

16.01.2019, पॊह (पौष) ज़ूनॖ पछॖ (शुक्ल पक्ष), दऺहम (दशमी), ब्वदवार (बुधवार),श्री सप्तर्षि सम्वत 5094, राश वृष (रऻच़हॖन्ज़ि 8.07 बजि प्यठॖ), ऋतु शिशर (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबात
**************************
1. मु: ज़्वलॖ गऺयि ज़ि क्वलि गऺयि
    अ: पूरॖ ख़याल न थवनॖ सॗत्य
         छु न्वख्सान वातान
2. मु: ज़ॊवि हॖन्दि बापथ ज़ऺट
         नालॖ कडॖन्य
    अ: मोमूलि चीज़ॖ खऻतरॖ गछ़ि नॖ
         परेशान गछ़ुन
3. मु: ज़ोर छु सऺहलाब
    अ: ताक़तवोल इन्सान ह्यॆकि
         कॆंह ति कऺरिथ
4. मु: ज़्ववलि हुन्द गछ़ि ख्यॊन तॖ
         ज़ॆवलि हॖन्दि नॖ
    अ: ॳकिस ग़रीबस निश ख्यॊन
          छु ॳकिस ज़ॆवलि हॖन्दि
         गरि ख्यनॖ ख्वतॖ ज़्यादॖ जान
5. मु: ज़ॆठ्यन नर्यन बोश
    अ: आसनवऻलिस सऻरी यज़थ
          करान
**************************
1. गाटॖ....Deficit/Deficiency
              Damage
2. गाटॖ आसुन...To be at loss
3. गाटॖजार.... Wisdom/Wit/
                      Intelligence/
                      Knowledge
4. गाटॖ द्युन...To advise/To
               instruct/To guide
               To educate
5. गाटुल....... Intelligent/
                Wise/Talented
6. गाठ......River bank/Bath-
                 ing place
7. गाड......Fish
8. गाडॖ बतॖ.....Rice and fish/
                A ritual among
               Kashmiri Pandits
9. गाडॖ तील....Cod liver oil
10.गाडॖ हऻन्ज़.... Fisherman
**************************
       गीता ज्ञान  :अध्याय-10 :
         श्री भगवान वनान
भगवान अर्ज़नस वनान थाव कन
वनय सीर तॖ प्रभावॖ वऻल्य वच़न
यॆमि सॗत्य भक्तिस सपदि कल्याण
वॊन भगवानन गीता ज्ञान
**************************
ह्यॆच़ॖन ब्यॆयि छग लगॖन्य ति क्याज़ि गऺयि खांदर ब्यॆयि शुरु बटॖन। वारॖकारॖ गछ़न सानि कोरि बजाह तॖ लऺडकॖ बनन वारॖकार गृहस्ती। मगर सौंचुन छु तिमन लऺडकन तॖ लडकियन हुन्द यिम त्रॖहि अपोर तऺर्य मगर छि अनहॖहर्य। यॊत ताम म्यॆ ख़बर छि ज़ि तिहॖन्द्य मोल मऻज्य छि नॖ समजोतॖ करनॖ बापथ तयार। ति ज़न गव ज़ि ट्यॆकिन छि मेलान अख ॳक्यसॖन्ज़ मगर बाकय कथॖ छे नॖ वाठ ख्यवान। कुनि जायि छि लड़की तनख्वा ज़्यादॖ अनान तॖ लऺडकॖ छु अनान कम। कुनि जायि छु नॖ लऺडकॖ या लऺडकी ॳकसॖय जायि गरॖ करनॖ बापथ  पनॖन नोकरी त्रावनॖ बापथ तयार ति क्याज़ि प्राइवेट नोकरी छि दोनवय करान तॖ ॳकिस-ब्यॆयिस जायि तब्दीली गछ़ॖन्य छॆ नॖ मुम्किन तॖ त्रॆयिम वजह छु यि ज़ि लऺडकस तॖ लऺडकी छि पानॖवॖन्य क़द मीनिथ पकनॖच कूशिश करान। वागुज़ार छु नॖ यॊदवय लऺडकॖ ज़्यूठ पाहन आसि या लऺडकी छ़ॊट पाहन आसि। द्वनवऺनी गछ़ि मीच़ बराबर आसुन तॖ ब्याख वजह छु तऻलीम यानि कऺम्य कोताह छु पॊरुमुत। तथ ति गछ़ि नॖ कऺमी-पीशी आसॖन्य। यिमव माप-दन्डव मूजूब ति छि वारियाह तान अथॖ गछ़ान।
म्यॆ निश छि वारियाह लड़कन तॖ लऺडकियन हॖन्ज़ॖ क्वलावली यिमव माप-दन्डव खऻतरॖ प्यथ। त्यॆत्रॖहॖ च़ॊयत्रॖह वुहिर्य छि अनहुहॖर्य तॖ तिहुन्द मोल मऻज्य छु परेशान।
असि पज़ि कुनि न तॖ कुनि चीज़स च़्यफ ह्यॆन यॊदवय तान छु छ़ान्डुन। कथ छि जऻरी
**************************
"महाबले महोत्साहे महाभय विनाशिनी। त्राहि मां देवि दुष्प्रेक्ष्ये, शत्रूणां भयवर्धिनी।।"
यि मंत्र ति गछ़ि दॊहय परुन
**************************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**************************
  नऺविव तॖ फॊलिव
    भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)