17.01.2019

17.01.2019, पॊह (पौष) ज़ूनॖ पछॖ (शुक्ल पक्ष),काह (एकादशी), ब्रसवार (वीरवार/ ब्रहस्पतवार), श्री सप्तर्षि सम्वत 5094, राश वृष (चलान),ऋतु शिशर (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबात
**************************
1. मु: ज़्यादॖ ज़नानन पां कामन तॖ
         च़र्यन मर्दन बतॖ कामन
    अ: यथ गरस मंज़ ज़्यादॖ
          ज़नानॖ या मर्द आसन तति
          छि कऻम करनस मान मान
          लगान
2. मु: ज़्यादॖ गगरायन नॖ रूद तॖ
         छ़र्यन कथन नॖ सूद
    अ: ज़्यादॖ गगरायव सॗत्य छु नॖ
         रूद प्यवान तॖ फ़ज़ूल तॖ
         छ़रि कथॖ करनस छु नॖ कांह
         मतलब
3. मु: ज़्यादॖ कशनस छु ज़्यादॖ
         रथ यिवान
    अ: ज़्यादॖ एहतियात करनस छु
          ज़्यादॖ खुर
4. मु: ज़्यादॖ कथन नॖ सूद
    अ: बे-हद कथन छु नॖ कांह
         फ़ऻयदॖ
5. मु: ज़्यूठ गव क्रूठ ज़्यूठ गव
         ब्यूठ
   अ: कुनि कामि या कथि ज़्येछर
         दिनॖ सॗत्य छॆ नॖ कऻम अंद
         वातान
**************************
1. गाड.....Guard
2. गागॖर.... Metallic pitcher
3. गाज़ॖर.... Carrot
4. गारुन.....To look for/To
               search/To search
               for
5. गारॖ.....Kneaded mud/
              Mortar
6. गाज़....Dressing gauze/
               Thin cloth
7. गासॖ....Grass
8. गासॖ बनॖ...Heap of grass
9. गाश.....Light/Lustre/
                Sunshine
10. गाशुर...Lovely/Elegant
**************************
       गीता ज्ञान  : अध्याय-10
बॖ यॆमि मायायि छुस प्रकठ सपदान,
महारॆश्य तॖ दीवता छि नॖ ज़ानान
रॆश्यन दीवन हुन्द आदि कारन म्यॆ ज़ान
वॊन भगवानन गीता ज्ञान
**************************
लगाम दिन्य छि ज़रूरी। पनॖन शुर्यन तॖ तिहन्ज़न हदरॊस ज़्यादॖ यछ़ायन/चाहहतन। लगाम दिन्य छि ज़रूरी पनॖन्यन शुर्यन पनॖनि ज़ऻच़ न्यबर पनॖन हमसफर छ़ान्डनस। लगाम छि दिन्य मऻलिस माजि पनॖनिस मनस ज़्यादॖ लालच करनस। लगाम दिन्य छि ज़रूरी यॊदवय असि पनॖन सभ्यता छि रछॖन्य। यॊदवय असि ज़बऻन्य हुन्द व्वथॖवार छु बचावुन। पनॖन पहचान तॖ प्रज़नथ छि बचावॖन्य। लगाम दिन्य छि स्यठाह ज़रूरी। अगर नॖ ॳस्य पानॖ यिम क़दम तुलव असि यी नॖ कांह बचावस। बस कॆंच़व वऺरियव पतय यी नॖ बट्टॖ अथि कुनी। यि कथ छि असि याद थवॖन्य ज़ि सोन पंचांग छु पांछ़ सास च़ुनमथ वरी प्रोन माने कि ॳस्य गऺयि नॖ गऻब बॖल्कि रूद्य पनॖन ज़ाथ बचावान रोज़ान। सु ति आव वखॖत यॆलि कऺशीरि मंज़ म्वच़ॆययि ॳस्य काह गर बस काह गरॖ। मुसीबतॖक द्वह तिम ति च़ऻल्य बट्टव मगर पनुन सीनॖ दोरुख तिमन अज़ाबन तॖ आयि वुन्युख ताम पनॖन आन बान तॖ शान ज़िन्दॖ थऺविथ। कुनवुहशथ तॖ नमतुक ब्रख रूद नॖ कम पायि कॆंह मगर यि ओस असि पनुन दम खम तॖ त्रोव यि क़हर ति पथकुन मगर यॆती छॆ नॖ नॆन्दॖर त्रावॖन्य। सऻन्य शुर्यन च़ाव न्यॆबरिम हवा तॖ म्यूल पौंसॖ मगर तिमन छु वतहावुक ज़रूरत युस तमिसॖन्दि मऻलिस तॖ माजि सिवा ह्यॆकिनॖ ब्यॆयि कांह बऺनिथ। तिमन गछ़ि डर रोज़ुन ज़ि पर-ज़ऻच़हॖन्ज़ लऺडकॖस या कोरि छे नॖ सान्यन गरन मंज़ जाय। यि भय छु तिमन थवुन यान्य तिम गरि न्यबर नेरान छि पनॖन तऻलीम प्राप्त करनॖ बापथ होर योर जायन। मऻलिस माजि छु कमर कसुन, दर्यर दवुन, तॖ पनुन कऻशुर गृहस्त बचावुन।
**************************
"माया कुण्डलिनी, क्रिया मधुमती काली कलामालिनी, मातन्गी विजया जया भगवती देवी शिवा शम्भवी। शक्ति शंकर वल्लभा त्रिनयना, वाक- वादिनी भैरवी।। ह्रींकऻरी  त्रिपुरा पराअपरमयी माता कुमारी-इति-असि।।"
पऺरिव यि मंत्र ति दॊहय
**************************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**************************
  नऺविव तॖ फॊलिव
    भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)