08.01.2019

08.01.2018,पॊह (पौष) ज़ूनॖ पछॖ (शुक्लॖ पक्ष) द्वय (द्विती), बॊम्वार (मंगलवार), श्री सप्तर्षि सम्वत 5094, राश मकर (चलान), ऋतु हेमन्त (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबात
**************************
1. मु: रज़ दऺज़ मगर वर द्रास नॖ
    अ: हून्य लऺटिस छु नॖ वर नेरान
         यस मूलॖय हॊल आसि तस
         छॆ नॖ पनॖनहऻन च़लान
2. मु:रस मीनिथ तॖ नाटॖ गऺन्ज़रिथ
    अ: तूलिथ तॖ मीनिथ/कमॖय
3. मु: रऺह दार गुरिस छि पनॖनी
         कॊठ्य फुटान
   अ: युस शख़्स कऻम करनस
         मंज़ मऻहिर आसि, तस छि
         ज़्यादॖ कऻम मटि खसान
4. मु: ज़ॖ तॖ ज़ॖ गऺयि च़ॊर
    अ: समतिस मंज़ छु बजर/
         इतिफ़ाकस छु ताक़त
5. मु: ज़ऺट हय दॖनि मऺट यी बरनॖ
    अ: अमीर आसनुक इज़हार
         करुन/अमीरी हावॖन्य
**************************
1. लऺस्य...... Buttermilk
2. लऺश्य..... A kind of wood
                 used for lighting
                 purpose
3. लऺश्य क्यलुम....Wax that
              comes out of the
              wood
4. लऺश्य दिन्य.....To burn
5. लऺश्य गन्डॖन्य....To be
                         Jealous of
6. लऺश्य लगॖन्य....To be burnt
7. लऺडी शाह......Folk singer
8. लुतुफ़........Pleasure/
             Enjoyment/Grace/
             Taste/Elegance
9. लतीफ़....... Delicious/
                    Elegant/Fine
10. लतीफ़ॖ....Joke/Pleasan-
                     try
**************************
         गीता ज्ञान : अध्याय-9 :
यिम बख्त्यॖ म्यॆ फल फूल करान अर्पण
निष्काम बावॖ यि ब्रौंठॖ कनि थावन
बॖ सगुन रूप दऻरिथ ख्यवान
वॊन भगवानन गीता ज्ञान
**************************
पिक निकॖच कथ ॴस राथ चलान। यिम मोबायलस प्यठ ब्यॊन ब्यॊन ग्रुप बनिथ छि तॖ तिमन ग्रुपन मंज़ सदस्य पानॖवुन्य दुह्यकिस दॊहस छि आसान वार्तालाप करान रोज़ान, म्यॆ तॊर फ़िकिरी ज़ि तिम सऻरी छि नॖ अख ॳकिस सॗत्य वऻकॖफ़ आसान। बस बहसॖ-बहसय छि मगर रोज़ान करान ब्यॊन ब्यॊन ख़यालन प्यठ अदॖ यॆमिस यूत तगान छु। कांह छु होछी स्यासत दगान रोज़ान, कांह छु पनॖन दिलॖक्य बाव छकान रोज़ान, कांह छु वुनि ति कऺशीरी-हन्द्य बारव दिवान रोज़ान, कांह छु येति बिहिथ कऺशीरि मंज़ फुट्यमॖत्यन मंदरन हॖन्ज़ कथॖ करान रोज़ान, कांह छु वुनि त्रॖहि वुहिर्य पतॖ ति कऺशीरि वापस गछ़नॖक्य सबीलॖ छ़ान्डान रोज़ान ख़ास कऺरिथ तिम यिम ॴखरी मुकामस कुन न्यसॖफ ज़ंगॖ कऺडिथ छि बिहिथ यॆति। वनुन छुम यि ज़ि यॆनॖ यि व्हाटसाप वजूदस मंज़ आव असि छु बासान ज़न अल्लादीनुन जिन असि लॊब। यिम नॖ तोरॖ वछ़ॖ तिम कथॖ ति छि ॳस्य यथ व्हाटसापस प्यठ रौज़ान करान। ॳथ्य दौरानस मंज़ प्यव खयाल केंच़न ग्रुपन मंज़ जान जान शऻयिस्तन सदस्यन ज़ि क्याज़ि करव नॖ पिक निकॖच ति कथा। यी सौंचान सौंचान द्युत दॊयव त्रॆयव ग्रुपव अथ खयालस प्रोखुट रूप तॖ ह्यॊतुख कथि बात्यहुन्द रूप रंग बदलावुन। Oct. 29 Festival ति छु युथॖ अख ग्रुप यॆम अमि ग्रुपॖक्यन सदस्यन पानॖवुन्य मिलच़ार पिक निक किस रूपस मंज़ करनावनुक संज़ ह्यॊत करुन तॖ पऺतिमॖ श्यॆमि जनवऺरी 2019 तॖ आथवारि द्वह मील्य कॆंह पानवुन्य फ़रीदाबादॖ हारी-पर्बॖतॖ तॖ पतॖ सैंट्रल पार्कि, स्यक्टर बाहस मंज़। कथ छि जऻरी। त्वहि ईश्वर करुन यऻरी
**************************
"वन्देहं सच्चिदानन्दं भेदातीतं जगद् गुरुम्, नित्यं पूर्णं निराकारं निर्गुणं सर्व-संस्थितम्"
पऺरिव दॊहय यि मंत्र ति...गुरु स्तुति
**************************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**************************
 नऺविव तॖ फॊलिव
    भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)