14.01.2019

14.01.2019, पॊह (पौष) ज़ूनॖ पछॖ (शुक्ल पक्ष) ॴठम (अष्टमी), च़ऺन्दॖरवार (सोमवार), श्री सप्तर्षि सम्वत 5094, राश मेष (दुहचि 12.51 बजि प्यठॖ), ऋतु शिशर....अज़ म्वकलि द्रठॖपऻन्च़ुक तॖ अज़ छि शिशर/मकर सऻन्क्रात ति
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबात
**************************
1. मु: ज़ंगि रऻद्य ऒन तॖ ज़्यॆवि
         रऻद्य न्यू
    अ: ॳक्य च़ॊट ज़ुव तॖ ब्यॆय
         न्यू तम्युक फल
2. मु: ज़नानि ॳकिस प्रॖछ़ुख
         रॖच़रॖय छुया दॊपनख शुरिस
         आम कॊठ
   अ: ज़नान छि शुरिस कॊठ यिनॖ
       विज़ि स्यठाह आवॖर रोज़ान/
     कॊठ यिनॖ विज़ि शुरिस ज़्यादॖ
     ख़याल प्यवान थवुन
3. मु: ज़नानि हुन्द पॊछ़ गरि गरि
         गॊछ़ मर्दॖ सुन्द पॊछ़ लऻग्य-
         तोस क्रॊछ़
    अ: ज़नानि छु मालिन पॊछ़
         ज़्यादॖ टोठ आसान तॖ मर्दॖ
         पॊछ़ छुस ख़रान
4. मु: ज़नानि रॊस मर्द जऺच़ रॊस
         हून
    अ: मर्द लवि नॖ ज़नानि वरऻय
         हार ति
5. मु: ज़ुव ऒर तॖ जहान ऒर
    अ: यॆलि पानॖ वारॖ आसि तॆलि
       छु सोरुय दुनिया वारॖ बासान
**************************1. लोव....Fresh/New
2. लोस....Earth-worm
3. लोसॖ... Woman with
                recent delivery
4. लोसुन....To set/To dis-
               appear/To be
               shattered/To be
               fatigued
5. ल्वतुन..To be light/To be
            relieved of burden/
            Be refreshed
6. ल्वगाथ.... Dictionary
7. ल्वबुर.....Cow dung cake
8. ल्वय......Bronze/Alloy of
                 copper and tin
9. ल्वरॖ.....Immatured/Easy
               go lucky
10.ल्वकचार....Childhood
**************************
       गीता ज्ञान  : अध्याय-9 :
वेश शूदर तॖ चंडाल सान
युस कांछ़ा शरन छुम गछ़ान
सु बेशक पर्म गऺती प्रावान
वॊन भगवानन गीता ज्ञान
**************************
हमसाय छ़ान्डनस ति द्रायि असि कऻशिर्य बट्टन वऻन्सा अख यानि यिमय कुनत्रॖह-त्रॖह वऺरी तॖ वुनि तहि छि छ़ऻन्ड दिनस लऺग्यमॖत्य। कॆंह जायि छि नज़रि गछ़ान यॆत्यन कऻशिर्य बट्टॖ छि बासान समिथ हि छि मगर रऺलिथ मीलिथ छि नॖ।रलावनॖच तॖ मिलावनॖच कूशिश छि करान कश्यप कशमीर सभा गुडगांव वऻल्य। यिमव ह्यॊत फ़ेरुन महलॖ महॖलॖ यानि स्यक्टर-स्यक्टरॖ तॖ वुछान ज़ि कत्यन छु बट्टॖ रूज़िथ तॖ तऺमिस सॗत्य राब्तॖ कऻयिम करान। यि छि अख खुशी हॖन्ज़ कथ ज़ि गुडगांव वऻल्य छि यि मुहिम ह्यथ पकान तॖ हमसायि छ़ान्डनॖच कूशिश करान। वैशाली मंज़ या शालमऻरगार्डनस मंज़ या फ़रीदाबादस मंज़ या नोयडाहस मंज़ ति छि बटस पानवुन्य रलावनॖच मिलनावनॖच कूशिश जऻरी। कऺशीरि यपोर यिथ गव शहरस तॖ गामस म्युल। कुस छु गामुक तॖ कुस छु शहरुक यि सौंचुन गव ख़तम यॊत यिथ। अल्बतॖ ज़बऻन्य हॖन्ज़ि बोल-चालि तलॖ छि यि फ़रख ननान। मगर तथ कुन छु नॖ ज़्वन दिनुक ज़रूरथ असि वुन्यक्यनस। असि छु यकुत थवुन। अख ॳकिस हमसाय बनुन तॖ पनॖन संस्कृति पनॖन रीत रिवाज बरक़रार थवॖन्य। यिमव सारिवॖय चीज़व ख्वतॖ छु ज़रूरी पनॖन माजि-ज़्यव कऻशिर्य ज़िन्दॖ थवॖन्य। यि छि सऻन्य प्रज़नथ सऻन्य पहचान। सान्यन शुर्यन हॖन्ज़ पहचान छि तिहॖन्ज़ ज़्यव। पनॖन्यन पनॖन्यन गरन मंज़ रूज़िव पनॖन्यन शुर्यॆन सॗत्य कऻशिर्य ज़बऻन्य मंज़ कथबाथ करान ताकि तिमन तरि बऺडिथ फिकिरी ज़ि त्युहुन्द पॊतकाल क्याह ओस तॖ तिम कमि ज़ऻच़ हॖन्द्य ब्योल छि।
**************************
"यं ब्रह्मा वरुणेन्द्ररुद्रमरुत: स्तुन्वन्ति दिव्यै: स्तवैर्वेदे: सांगपदक्रमोपनिषदैर्गायन्ति यं सामगा:। ध्यानावस्थिततद्गतेन मनसा पश्यन्ति यं योगिनोयस्यान्तं न विदु: सुरासुरगणा देवाय तस्मै नम:"
यि मंत्र ति पऺरिव दॊहय
**************************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**************************
   नऺविव तॖ फॊलिव
    भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)