05.01.2019

05.01.2019, पॊह (पौष) गटॖ पछॖ (कृष्ण पक्ष), मावस (अमावस्या), बटॖवार (शनिवार/ शनिश्चरवार), श्री सप्तर्षि सम्वत
5094, राश धनु (चलान), ऋतु हेमन्त (चलान)....अज़ छि ख्यॆच़िमावस (यक्षामावसी) ति
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबात
**************************
1. मु: यंगॖ तॖ बंगॖ लगॖन्य
    अ: वुजऻरी गछ़ॖन्य/बद यछ़ुन
2. मु: यॆन्दॖर तॖ च़न्दॖर नच़ुन
    अ: ख्वशहऻली हुन्द इज़हार
3. मु: यॆन्दरस प्यठ न्यॆन्दॖर
    अ: सख मॆहनत करॖन्य
4. मु: युन गछ़ुन रोज़ुन मूजूद
    अ: कारवऻयी जऻरी रोज़ॖन्य
5. मु: यूत नॖ ब्रऻर्यर सॖन्दि ग्यव
        ख्यनॖ गछ़ान, त्यूत छु गछ़ान
         तऺम्यसॖन्दि लऺट गिलॖवनि
   अ: न्वख्सान ख्वतॖ छु न्वख्सान
        करन वऻल्यसॖन्ज़ि बॆशर्मी
        प्यठ अफ़सोस गछ़ान/अख
        ब्यमार पावुन तॖ पतॖ ख़बरि
        युन
**************************
1. लऻर.... Cucumber
2. लान्ज....Misfortune/
              Trouble/Disaster
3. लांजॖ रॊस्तॖ.... Out of mis-
                         fortune
4. लांज युन.....To be over-
              taken, by misery,
              To suffer
5. लावॖ दावॖ कडुन....To enjoy
6. लावॖ दावॖ नेरुन....To fulfill
                           the wishes
7. लाव्यर.... Delicacy/Fresh
                   ness
8. लऻज़िमदार....Honourable
                  man/Important
                  person
9. लऻज़्यमी...... Important
10. लऻन्य न्याय....Dispute
           between a husband
           and wife
**************************
          गीता ज्ञान : अध्याय-9 :
बॖय छुस सिर्यि रूपॖ किन्य गरमान
ऒबुर बऺनिथ बॖय रूद वालान
ज़िन्दगी मोत सत असत म्यॆ ज़ान
वॊन भगवानन गीता ज्ञान
**************************
नारस दिया नरि मोल मऻज्य। ॳस्य छि पशान ज़ि सऻन्य शुर्य किथॖ पऻठ्य फसान गयि ज़ऻच़ न्यबर खांदर करनस मंज़। म्यॆ बासान अख ख़ास वजह छु नोकरी। ति ज़न गव ज़ि सान्य शुर्य बनेयि खलि इन्जीनियर तॖ डाक्टर तॖ लऺग्य नोकरी प्राईवेट कम्पनियन मंज़ तॖ ह्यॊतनख तनखाहऻन ति जान मेलुन। यिम प्राईवेट कम्पनी छि ब्यॊन ब्यॊन जायन यानि पूने, बंगलोरॖ, नोयडा, मुम्बय, चिन्नय, वगैरा वगैरा। यिमन कम्पनियन छे नॖ सरकऻर्य दफ्तरन हॖन्द्य पऻठ्य होर-योर शाखायि ति कॆंह। कॆंच़न कम्पनियन छु स्यॊदुय रऻब्यतॖ तिमन कम्पनियन सॗत्य यिम व्यलायतस मंज़ छि। वजह छु गछ़ान सऻन्य शुर्य छि नॖ यछ़ान नोकरी त्रऻविथ खांदर करुन। ति ज़न गव ज़ि यॊदवय पूनेहस मंज़ नोकरी करनवऻलिस लऺडकॖसॖन्ज़ ट्यॆकिन मेलान छि तऺमिस कोरि सॗत्य य्यॊस नोकरी करान छि दिल्लि मंज़। दोयम मंज़ छु नॖ अख ति नोकरी त्रावनॖ बापथ तयार ताकि खांदरॖ पतॖ ह्यकन ॳकिसॖय जायि बिहिथ। इस्लिये छु नॖ यिमन मिलॖच़ार गछ़ान। खाल कऻन्सि मा गछ़ि मिलच़ार तिथपऻठ्य ज़ि द्वनवय यानि लऺडकॖ तॖ लऺडकी आसन ॳक्यसॖय जायि कऻम ति करान तॖ ट्यॆकिन ति रलान। यि त्रासदी वुछिथ छि सऻन्य शुर्य शायद हनीमतस ग़नीमत ज़ऻनिथ ज़ऻच़ न्यबर खांदर करनॖ बापथ मजबूर गछ़ान। कऺशीरि मंज़ अज़ त्रॖह वऺरी पथकुन ॴस नॖ यि हालथ। कथ रोज़ि जऻरी। रामॖ लगय च्यानि लीलाये।
**************************
"चैतन्यं शाशवतं शान्तं व्योमातीतं
निरंजनम, बिंदु-नादकलातीतं तस्मै श्री गुरवे नम:"
यि मंत्र ति गछ़ि दॊहय परुन...गुरु स्तुति
**************************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**************************
 नऺविव तॖ फॊलिव
  भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)