27.01.2019

27.01.2019, माघॖ गटॖ पछॖ (कृष्ण पक्ष), सतम (सप्तमी) आथवार (एतवार/रविवार),श्री सप्तर्षि सम्वत 5094, राश तुला (चलान),ऋतु शिशर)(चलान)
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबात
**********************
1.मु: यस दय दी तस कुस नी
   अ: दय सॖन्दिस दिनस छु नॖ
        कांह शऺरीक
2. मु: यस कोरि खांदर स्व
         कूर ल्वबरन
   अ: दिलचस्पी बगऻर कांह
         कऻम करॖन्य/वख्तस
         प्यठ नॖ कऻम करॖन्य
3.मु:यस वथ रावि तस हावन
       दऺह, यस कथ रावि तस
       हावि नॖ कांह
   अ: प्रथ कांह छु वथ रावन
      वऻलिस वथ हावान मगर
      कथ रावन वऻलिस ह्यॆकि
       नॖ कांह मदद कऺरिथ
4.मु: यस लॊग मरॖ मरॖ सु मरि
    अ: युस छु नॖ यछ़ान सु छु
         पथ रोज़ान
5. मु: यस लॊग करॖ करॖ सु
         करि
    अ: युस कॆंह करुन छु
          यछ़ान सु छु करान
**********************
1. गशुन....To rub/To
                 grind
2. गश्तॖ...To stroll/Walk
               Round/Beat
               (of Police)
3. गशर...Laziness/
              Slowness
4. गुफ्तगू..... Dialogue/
              Conversation
              Chit chat/Talk
              Discourse
5. गुज़ारुन....To pass
              time/To get
              along with
6. गुज़ारॖ... Livelihood/
              Course of life
7. गुज़ार बंद....Resource-
                      ful/Rich
8. गुज़र...... Octroi
9. गरकुली.....Homely/
               Domestic/Of
               one's family
10. गिरेबान....Collar (of
                      garment)
**********************
      गीता ज्ञान : अध्याय-10
यिम लगातार म्योनुय ध्यान दारान
तिमन छुस बॖ त्युथुय ज्ञान दिवान
ज्ञानॖ यूगॖ तिम म्यॆ प्राप्त सपदान
वॊन भगवानन गीता ज्ञान
**********************
अगर असि शुर्य छि नॖ अकि या दॊयि ह्यॊर थवॖन्य, अगर असि पनॖन्यन पनॖन्यन गरन मंज़ पनॖन्यन गरिक्यन बऻच़न सॗत्य पनॖनि ज़बऻन्य यानि कऻशिर्य पऻठ्य कथ बाथ छॆ नॖ करॖन्य, अगर असि पनॖन्यन शुर्यन ताम पनॖन्यन कॆंच़न किताबन मंज़ लीख्यमॖत्य मंत्र छि नॖ वातनावॖन्य,अगर असि पनॖन शुर्य कऻशुर लेखुन तॖ कऻशुर परुन छिनॖ ह्यॆछनावॖन्य, तॆलि छु नॖ म्यॆ बासान कांह फ़ऻयदॖ असि यिम जायि जायि हवन करॖन्य, असि कऻशिर्य ज़बऻन्य मंज़ वुन्यखताम लेछ्यमच़ॖ किताबॖ पनॖन्यन गरन मंज़ थावनुक छु नॖ कांह मक़्सद।
संस्थायि चलावनॖच छॆ नॖ कांह ज़रूरथ। यिम सानि ज़ऻच़ मंज़ पंच़ाहि अपोर तऺर्यमॖत्य छि तिम छि राम नाव स्वरान ति क्याज़ि तिमन छु पनॖन्यन संस्कारन हुन्द असर मूजूद मगर दरकार छु ज़ि सऻन्य शुर्य गऺछ़्य यि दरोहर ब्रौंठ पकॖनावन्य तॖ पनॖन प्रज़नथ बनऻविथ रोज़ॖन्य मगर असि मंज़ छे नॖ यछ़ा-पछ़ा कऻन्सि। सान्यव ज़िठ्यव यिम संस्कार असि ताम वातॖनऻव्य, तिम संस्कार छि नॖ ॳस्य ह्यकान वातॖनऻविथ पनॖन्यन शुर्यन ताम यॆमि मूजूब सऻन्य संस्कृती ह्यॆच़ॖन वारॖ वारॖ असि निशि दूर गछ़ॖन्य तॖ सऻन्य पहचान ह्यॆच़ॖन्य म्वकलॖन्य।सऻनिस शुरिस छु नॖ कांह सॊबूत पानस निश यि सऻबित करनॖ बापथ ज़ि कमि ज़ऻच़हुन्द छु ति क्याज़ि तमिस मंज़ छे नॖ स्व ज़बान।
सूंचिव सऻरी बड्य ल्वकॖट्य ज़ि असि क्याह पज़ि करुन पनुन आन बान तॖ मान बचावॖनॖ बापथ। कुनुय जवाब छु पनॖन कऻशिर्य ज़बान
**********************
"या देवी सर्वभूतेषु क्षान्ति रूपेण संस्थिता नमतस्यै नमस्तस्यै नमस्तस्यै नमोनम:"
पऺरिव यि मंत्र दॊहय
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
 नऺविव तॖ फॊलिव
  भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)