12.01.2019

12.01.2019, पॊह (पौष) ज़ूनॖ पछॖ (शुक्ल पक्ष), शॆयम (षष्ठी) बटॖवार (शनिवार/शनिश्चरवार), श्री सप्तर्षि सम्वत 5094, राश मीन (चलान) ऋतु हेमन्त (चलान), द्रठपऻन्च़ुक (पंचक) (चलान)...अज़ छि कुमार शॆयम
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबात
**************************
1. मु: ज़मीन छि दऺग्य दऺग्य स्वन
    अ: ज़मीन छि मॆहनतॖ सॗत्य
         स्वन पऻदॖ करान
2. मु: ज़मीन आसमान कुनुय
         करुन
    अ: क्रकॖ नाद लागुन
3. मु: ज़ॖ गाडॖ छॆ नॖ अथस मंज़
         यिवान
   अ: अकी वख्तॖ यिन नॖ ज़ॖ कामि
        करनॖ/अकि वख्तॖ ह्यकव नॖ
        द्वन गुर्यॆन सवऻर्य कऺरिथ
4.मु:ज़ऺर्य बूज़ बहि वुहिर्य बडशाह
        मूद
   अ: वख्तॖ विज़ि नॖ ह्यस आसुन/
        मऺस्ती मंज़ रूज़िथ बेह्यस
        रोज़ुन
5. मु: ज़ुर तॖ ब्रोर ख्यथ ति म्यव
    अ: कोरि हुन्द शुर तॖ ब्रोर छु
         ख्यॆय ख्यॆय ति ना शुकॗर
         करान
**************************
1. लूर...... Stick
2. लॊंग..... Lame
3. लवुन...Worth of/To cost
4. लिवन....Spade
5. लिवुन...To rub with mud
                 To wash over
6. ल्यवुन...To lick/To taste
7. लूब.... Greed/Attraction
               Temptation
8. लूबवुन.... Attractive/
                   Beautiful
9. लॊट......Tail
10. लोटॖ.....A mug/A small
                  pot
**************************
        गीता ज्ञान : अध्याय-9 :
युस पऻपी पाफ त्रऻविथ दरि ध्यान
सु निश्चय कऺरिथ सादु छु बनान
तस ब्रह्मस रॊस कॆंह नॖ बासान
वॊन भगवानन गीता ज्ञान
**************************
रवख हि मकानॖ त्रऻविथ, ज़मीन जायदाद त्रऻविथ, बऺड्य आंगन त्रऻविथ प्यव असि पनुन ज़ुव बचावनॖ बापथ, पनॖन्यन शुर्यन हुन्द ज़ुव बचावनॖ बापथ, पनॖन्यन कोर्यॆन हुन्द अस्मत तॖ यज़थ बचावनॖ बापथ प्यव असि रातो राथ च़लुन कऺशीरि प्यठॖ तॖ लऺग्य योर छम्बन तॖ छारन, तापॖ क्रायन च़मेयि ल्वक्ट्यन ल्वक्ट्यन कमरन मंज़, कमरॖ क्याह यि दऺफ्यज़ि ति खत्यन मंज़। न रूद यॆति सु ब्रांद, न वुज़। त्रॊपरिथ छि रूज़िथ फ्लैटन मंज़। गऺज्य गाह छि करान ॳस्य यिमन फ्लैटन मगर क्याह। फोटू छि नॖ ह्यकान लऻगिथ लबन ति क्याज़ि लब मा गछ़ि ख़राब, बतॖ ख्यनॖ विज़ि यॊदवय कांह हून्य-म्यॆट त्रावान छु, स्व हून्य-म्यॆट न्यबर दऻरिथ दिनस छु नॖ व्यस्तार। ब्रांद रूद न कुनी तॖ ब्रांदॖ फश द्युन गव मऺशथॖय। दारिकिन्य ॴस्य हमसायस क्रख चिख दिवान, यॆति गऺयि दमफुट्य। न्वश न्यॆचुव छु नेरान वारॖकार पनॖनिस कारबारस। पथकुन छु रोज़ान मोल मऻज्य बंद कमरस मंज़ हूनि मऺशीदि हुन्द जिन ह्यु। न कऻन्सि सॗत्य कथ न कऻन्सि सॗत्य बाथ, न पनॖनि मनुक हक़ हमसायि। कॆंच़न गरन हॖन्ज़। हालथ वुछिथ छु वाकॖय जिगरस खंजि गछ़ान। शुर्यन छु काबॖतऻनॖ गछ़ान। गिन्दुन नॖ द्रॊकुन नॖ। ज़ॆनन वाल्यन हॖन्ज़ ज़िन्दगी छि बन्यॆमॖच़ मिशीन तॖ ब्यॆयि नॖ कॆंह। अंगस ॴशनावस निश वातुन छु मुहाल। सु माय मॊहब्बत गव ड्यॊल। रसॖ रसॖ रिश्तन छ़्यनान गऺयि तॖर, कति रूद मासतॖर तॖ प्वफतॖर। तॖरि सॗत्य यॊदवय अज़ मेलान छि तॖर ज़ानव ग़नीमथ, क्याह पता कल हो न हो।
**************************
"ओम् त्र्यम्बकं यजामहे सुगन्धिं पुष्टिवर्धनम, उर्वारुकमिव  बन्धनाद्, मृत्योर्मुक्षीय मामृतात"
यि मंत्र ति गछ़ि परुन दॊहय
**************************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**************************
 नऺविव तॖ फॊलिव
   भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)