02.03.2021

02.03.2021, फाल्गुन (फाल्गुन) गटॖ पछॖ (कृष्ण पक्ष) च़ोरम (चतुर्थी) बॊम्वार (मंगलवार) श्री सप्तर्षि सम्वत 5096, नश्रत्र चित्र, राश तुला (दुहचि 4.29 बजि प्यठॖ), ऋतु शिशर (चलान)... अज़ छि संकट च़ोरम (संकट निवार्ण चतुर्थी) ति

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

     महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वाहा स्वधा नमोस्तुते

**************************

सन्तोष शाह "नादान" तरतीब व तशरिह कऺरमॖच़ किता्ंब नुंद रॆशिन्य श्रुक्य मंज़ॖक्य श्रुक्य ॳज़्यकि प्यठॖ :

           नुंदॖ रॆशॖन्य श्रुक्य

अवल ॳलिफ कुनुय अल्लाह

अवल पतॖ ॴखॖर ज़वाल नॖ तस

बे गव मुहम्मद रसूल अल्लाह

कयामॖच़ शफाअत करि उम्मतस

               अर्थात

यिथॖ अछरन मंज़ ग्वडॖन्युक ॳछुर छु ॳलिफ तिथॖ छु ज़गतुक पालनवोल दय ति कुनुय, युस नाशि रॊस छु। बे अछुर गव ख्वदायि सुन्द रसूल हज़रत मुहम्मद यसॖन्दि दऺस्य कयामॖच़ द्वह ज़गतस शफा सपदि।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

          ************

1. फऻशन (Fashion/Conduct/Custom/Habit/Method)

2. फऻसलॖ (Distance/Interval/Space/Gap/Resolution/Award/Settlement/Decision)

3. फऻज़िल (Surplus/Remainder)

4. फऻज़ (Gain/Profit/Benefit)

5. फाकॖ (Starvation/Fast)

                मुहावरॖ

1. मु: वुछुन गव अख तॖ बोज़ुन 

         गव ब्याख

    अ: तथ गछ़ि पछ़ करॖन्य यि

         पानॖ दीदॖ वुछि, या, ती पॊज़

         यी ॳछव वुछ

2. मु: वुछिथ च़लान लालन ज़ाल

    अ: मऻर्यमॊन्द आसुन

3. मु: वदनस ख्वश असनस 

         व्वश्य

    अ: यस नॖ ब्यॆयि सुन्द ख्वश

          आसि यिवान

       (पनॖन्य शुर्य ह्यॆछॖनऻव्यूख)

**************************

पंचान्ग:- हालांकि असि गऺयि लगबग दॊयत्रॖह वऺरी कऺशीर त्रऻव्यमॖतिस मगर कऺशीरि हॖन्ज़ याद छॆ नॖ वुनि ति मशान। मशि ति किथॖ पऻठ्य। यॆम्य ल्वकचार आसि गुज़ोरमुत तति, यॆम्य जवऻनी आसि कऺडमॖच़ तति, यॆमिसॖन्द्य पूर्वज आसन वऺथ्यमॖत्य, बीठ्यमॖत्य तति, यॆमिस पुशतैनी ज़मीन जायदाद ओस तति, यॆमिस ज़िरात, बागात ओस तति तमिस रोज़ि यि यादाशतॖच दग़ ललवॖन्य मगर नऺव पुय याने यिमन दॊयत्रॖहन वऺरियन मंज़ यिम कऺशीरि न्यबर ज़ायि-प्यायि,तिम छि अमि दगि निशॖ बेखबर। कऺशीरि मंज़ ॴस्य कदमॖ कदमॖ पतॖ मन्दर, प्रथ वर्गॖक्य कऻशिर्य बटॖ, याने ल्वकॖट्य प्यठॖ बठ्यन ताम ॴस्य मंदरन गऺछ़िथ शिव लिंगस पोन्य बावान रोज़ान। गणॖ च़्वदॖश्य द्वह गणपतयारॖ, श्रावनॖ पुनिम द्वह शंकराचार्य, प्रथ ज़ूनॖ पछॖ ॴठम द्वह च़ऺक्रीश्वरॖ, पॊखरीबलॖ, ज़्यॆठॖ ब्रसवारन ज़ी़ठ्यऻरॖ ओस कऻशर्यन बटन हुन्द मजमूह लगान तॖ बासान ओस ज़ि ॳस्य छि कऻशिर्य तॖ कऺशीर छि सऻन्य। जरमॖसतम द्वह ॴस्य गरन मंज़ कृष्ण जूलॖ बनावान, तीलॖ ॴठम द्वह ॴस्य यारबलन प्यठ कांगरि ख्वर ज़ऻल्य ज़ऻल्य जतूं तूं जतूं तूं करान रोज़ान। हेरच़ हुन्द खुमार ओस आसान अलगॖय। गामन मंज़ सोपोरॖ, वरॖमुलि, अनन्तनागॖ, हालॖ, त्रालॖ, पुलवामि, क्वलॖगामि वगैरा ति ओस बटन हुन्द जटॖ जोश तॖ चुर्यग्यॊश रोज़ान यिमन बड्यन दॊहन प्यठ। जायि हॖन्ज़ व्यछ़य ॴस नॖ, मन्दरन हॖन्ज़ कऺमी ॴस नॖ, दीन धर्मुक खयाल ओस, बॊड बॊड अयाल ओस, रस्मो रिवाज ओस, बासान ओस ज़ि व्वत्सव छु। मगर कऺशीर त्रऻव, छक्करनॖ आयि, अख लार अख दार।गाम शहर गव कुनुय। च़ॖ छुख नॖ च़ॖ, बॖ छुस नॖ बॖ। व्वंय छु नॖ कऻशुर बटॖ परज़ॖनावनॖ यिवान। ज़बऻन्य निशि ति गव। संस्कारव निशि ह्यॊतुन डलुन, बॊड परिवार थवनॖ निशि ति ह्यॊतुन दूर दूर च़लुन, पर ज़ऻच़ मंज़ ह्यॊतुन पनुन पान च़ानुन। कऻशिरिस कऻशुर वनुन छु अज़कल बासान क्याहताम ग्वनाह ह्यु। मोल मऻज्य छु नॖ पनॖनिस शुरिस पनुन प्वतकाल बावनॖच कूशिश करान न छु शुर कॊट ह्यॆछनॖच या ज़ानॖनॖच कूशिश करान। अंग्रीज़स मंज़ कऻशुर लीख्य लीख्य मोबाईलन प्यठ छु बासान ज़ि ज़न छि ॳस्य अंग्रेज़न हॖन्दिय औवलाद। पनुन अदब ह्यॊतुन रावुन। असि ह्यॊत नऺव्यसॖय माहोलस मंज़ ख्वर त्रावुन। असि ह्यॊत पनुन पान मऺशरावुन। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

भूषण कौल "दीप"

(बूज़िव ॳज़्युक म्योन सबक़ podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)