05.03.2021

05.03.2021, फाल्गुन (फाल्गुन) गटॖ पछॖ (कृष्ण पक्ष) सतम (सप्तमी) शॊकुरवार (शुक्रवार/जुम्मा/भार्गवार) श्री सप्तर्षि सम्वत 5096, नक्षत्र अनू, राश वृश्चिक (चलान) ऋतु शिशर (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

      महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

            नुंदॖ रॆशॖन्य श्रुक्य

पॊज़ दपान पन ज़न नटख

अपुज़ दपान लगिय रस

मुहम्मद त्रऻविथ इबलीस रटॖख

ख्वदाय दितुय तॖ खटक कस

             अर्थात

सतुक व्यवहार छु स्यठाह कठ्युन

मगर छु तारवुन। अपुज़ वर्ताव गव शेतान (इबलीस) नालॖ रोज़ुन यॆमिकिन्य हज़रत मुहम्मद सॖन्ज़ि वति डलिथ छु पऻन्य पानय तम्युक ज़िम्मॖवार बंदॖ आसान

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

              *********

1. फऺतलॖ (Wick)

2. फतारथ (Talk chatter/Silly)

3. फितरथ (Temper/Habit/Tendency/Temperament/Character)

4. फटाफट (Instantly/Quickly/Immediately/At once)

5. फहश (Obscenity/Indecency)

                 मुहावरॖ

1. मु: वख्तस यिवान म्वछि तॖ

         वख्तस नॖ यिवान क्वछि

    अ: कुनि कथि प्यठ नॖ रोज़ुन,

         या, ॳती अख तॖ ॳती 

         बयाख कथ

2. मु: वख्तुक कार गव बख्तुक

         बादशाह

    अ: वख्तस प्यठ छु सोरुय

         शूबान

3. मु: वऻन्लिजि प्यठ व्वखुल

    अ: नामुम्किन कऻम करॖन्य

       (पनॖन्य शुर्य ह्यॆछॖनऻव्यूख)

**************************

पंचान्ग:- ॳम्य ॳमीर शखसन वॊन पनुन ख़याल साधस तॖ प्रुछ़नस ज़ि क्याह यि छा मुम्किन ज़ि बॖ निमॖ पनॖनि वऻन्सि हॖन्ज़ कमऻय पानस सॗत्य स्वर्गस ताम यॆलि बॖ मरॖ। साधुहन कॊर व्यच़ारा पनॖनिस मनस सॗत्य ब्रिन्ज़िस खन्डस तॖ प्रुछ़नस ज़ि च़्यॆ कऺमिस प्रुछ़ुथ यि सवालॖ ब्यॆयि तॖ तिमव क्याह जवाब द्युतुय। ॳम्य शखसन दॊपनस ज़ि बॖ फ्यूरुस जायि जायि यि सवालॖ प्रॖछ़ान मगर बॖ तुलहोस फोति कॆंच़व लूकव, कॆंच़व मोन ज़ि म्यॆ छु द्यमाग ख़राब गोमुत। दोपुख ज़ि अज़ ताम छु नॖ कांह ति गोमुत कॆंह ह्यथ यॆलि तऺमिस अंत समय आव तॖ न ह्यॆकि कांह पानस सॗत्य कॆंह निथ यॆमि ब्रोंह कुन ति। मगर बॖ छुस नॖ यछ़ान यि धन दौलत पथकुन त्रावॖन्य ति क्याज़ि यथ ख्यन यॆति पंज़्य तय हापथ यानै नाहकॖक अंग ॴश्यनाव। साधुहन  प्रुछ़नस ज़ि च़ॖ छुखा पनॖनि वतनॖ न्यबर ज़ांह गॊमुत कुन। शखसन वॊननस आ बॖ छुस द्वन त्र्यन मुलकन आमुत फीरिथ। स्यठाह जान गव। वॊनॖनस साधन। यथ मुलकस ति गोख च़ॖ, तति आसीय कॆंह पौंसॖ टूंक खर्चोवमुत याने कॆंह रॊपियि आसनय गऻमच़ खर्च यिमन जायन। तिमन जायन छे नॗ रॊपियि चलान। जवाबस मंज़ वॊन ॳम्य शखसन। त्यॆलि क्याह छु चलान। प्रुछ़नस साधन। प्रथ मुलकस मंज़ छि तति ची मुद्रा चलान। याने कुनि जायि डालर, कुनि जायि पौंड, कुनि जायि यन तॖ कुनि जायि दीनार वगैरा। साधुहन प्रुछ़नस ज़ि सु डालर या पौंड किथ पऻठ्य म्यूलुय च़ॆ। म्यॆ करि पनॖनि वतनॖचॖ रॊपियि जमाह बैंकस मंज़ तॖ तथ इवज़ मील्य म्यॆ डालर या य्यॊस मुद्रा म्यॆ ज़रूरथ ॴस। साधुहन समजोव यि ॳमीर इन्सान ज़ि यिथ पऻठ्य प्रथ ववतस छि पनॖन्य पनॖन्य मुद्रा आसान तॖ स्व मुद्रा हऻसिल करनॖ बापथ छु ज़रूरी ज़ि च़ॖ करख पनॖनि रॊपियि ग्वडॖ जमाह बैंकस मंज़ तॖ तमि बदलॖ मेली च़्यॆ तमि मुलकॖच मुद्रा यथ मुलकस च़ॖ गछ़ुन यछ़ान छुख। ॳमीर इन्सान गव हयबुंगु ह्यु तॖ ब्यूठ पानस सॗत्य सोंचनि ज़ि अमा पॊज़ यि साध छु शायद कथ डालनॖचच कूशिश करान। सोंचनि लॊग ज़ि साध सॖन्दिस सवालस तॖ म्यऻनिस खयालस छु नॖ वाठॖय कुनि। यि छु क्याहताम ऊट पटांग वनान। खऻर यॊत ताम छुस बॖ आमुत, पूरॖ कथ बोज़नस छु नॖ हरजॖ कॆंह। यि सूंथिथ ब्यूठ ॳमिस साधु सुन्द प्रवचन बोज़नि यिथ शखस। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

भूषण कौल "दीप"

(बूज़िव म्योन ॳज़्युक सबक़

podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)