16.03.2021

16.03.2021, फाल्गुन (फाल्गुन) ज़ूनॖ पछॖ (शुक्ल पक्ष) त्रय (तृतीया) बॊम्वार (मंगलवार) श्री सप्तर्षि सम्वत 5096, नक्षत्र अश्वि, राश मेष (चलान) ऋतु बसंत (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

    महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

           नुंदॖ रॆशॖन्य श्रुक्य

ॳन्दरॖ क्रूद त्रावख नतॖ

न्यबरॖ क्रूल कन्दे

अन्तॖ मल कासख नतॖ

छॊन्य व्वथॖ बेठ कन्दे

        अर्थात

हे इन्सान! च़्यॆ छुथ ॳन्दॖर्य क्रूद पोलमुत, न्यबरॖ पान सजावनॖ क्या वसि नखॖ। यॊद क्रूद त्रावख युस आवरिय नॖ ज़ांह। श्वद तॖ साफ़ मनॖ ह्यकख संसऻर्य व्यवहार कऺरिथ नतॖ रोज़ख आच़ार व्यच़ार रॊस। यॊद नॖ व्यवहार ज्ञान प्रावख दय ज्ञान प्रावुन छुय नामुम्किन।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

            ********

1. काजिवठ (A mortar stone)

2. काजू (Cashew nut)

3. काद (A joint effort/Group of workers at work)

4. कादस गछ़ुन (To take part in grouplabour)

5. कार (Work/Labour/Action/Operation/Business/Function/Duty/Motorcar)

                मुहावरॖ

1. मु: मॆत्रो शत्रु मूद मॆतरस ति छु

         मरुन

    अ: मोत छु अटल, या, प्रथ

         कऻन्सि छु पतॖ ब्रोंह मरुन

2. मु: मीठ प्वंद तॖ ज़ीठ वुम्बॖर

    अ: रॖच़रिक्य अलामाथ,या,

         जान्यर आसनुक ॴशिर्वाद

3. मु: म्योन ॴसिथ च्योन गव

         मंगनॖ विज़ि अश्वद गव

    अ: जबॖर कऺरिथ कऻन्सि हुन्द 

          हक़ ख्यॊन

       (पनॖन्य शुर्य ह्यॆछॖनऻव्यूख)

**************************

पंचान्ग:- कऺशीरि प्यठॖ च़ऺल्यमॖतिस गऺयि असि व्वंय कऺरीबन अकत्रॖह वऺरी  पथकुन। सऺदियव प्यठॖ यिम लफॖज़ सऻन्य पूर्वज तॖ सऻन्य ज़िठ्य रूद्य वनान रोज़ान तिमन लफ़जन ह्यॊत असि यॊत वऻतिथ नॊव माने छ़ान्डुन। मिसालन पोश्तॖ, मुबारक, वदवॖ, सलऻम्य वगैरा। असि ह्यॆत्य कथन कून कडॖन्य, कऻक्य तॖ क्वदॖ कऻक्य ह्यॆतिन ॳस्य बनॖन्य, ह्वॊछीय सियासत ह्यॆच़ असि दगॖन्य, प्रान्यन कथन ह्यॊत असि फ्युर द्युन, पनॖन्य माजि ज़्यव ह्यॆच़ मऺशरावॖन्य, पर-ज़ऻच़ हॖन्द्य व्वत्सव ह्यॆत्य पानॖनावॖन्य, पर-ज़ऻच़ सॗत्य रिश्त बऺडरावॖन्य तॖ तिमन रिश्तन हुर्यॆर द्युन, पज़नॖ प्यॆठ्य वऻन्सि ताम पनॖन्य शुर्य अनहॗरीय थावॖन्य, शुर्य न ज़्यवरावॖन्य या यॊदवय ज़्यॆवरावॖन्य अख या ज़ॖ शुर्य आसनस मंज़ॖय तृप्ती थावॖन्य। बॊरुत गरन मंज़ वार तॖ व्यस्तार न युन तॖ ल्वकट्यन ल्वकट्यन गरन मंज़ ब्यॊन ब्यॊन रोज़ुन। पनॖन्यन अंगन ॴश्यनावन सॗत्य दूर्यॆर बऺडरावुन। असि ह्योत अ़ग्रीज़स मंज़ अंकल तॖ आंटी वऺन्य वऺन्य पनॖन्यन निज़दीकी ॴशनावन हॖन्ज़ माय महोब्बत तॖ मेछर छ़ॊकरावॖन्य तॖ छ़ॊटॖरावॖन्य। ब्रदर-इन-ला वऺन्य वऺन्य छु नॖ फिकिरी तरान ज़ि यि छा हऺहरॖ सॖन्ज़ कथ करान किनॖ बेमॖ सॖन्ज़। व्वंय छि ॳज़्यिक शुर्य मऻलिस वनान पापा तॖ बऺड्यबबस डैडी। माजि वनान ममा तॖ नानि वनान मऺमी। पताह छु नॖ लगान ज़ि असि क्याज़ि रूज़ पनॖन्य संस्कार ह्यॆछनस मंज़ कऺमी। ततॖ ग्रॊद छु गोमुत सऻर्यसॖय। ओंखरिस मंज़ जोंखुर छु बासान गोमुत सऻर्यसॖय। खुर्यलद कारोबारा छु ज़न बासान सऻनिस समाजस मंज़। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

 भूषण कौल "दीप"

(बूज़िव म्योन ॳज़्युक सबक़

podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)