18.03.2021

18.03.2021, फाल्गुन (फाल्गुन) ज़ूनॖ पछॖ (शुक्ल पक्ष) पऻन्च़म (पऺचमी) ब्रसवार (ब्रहस्पतिवार/गुरुवार/वीरवार),श्री सप्तर्षि सम्वत 5096, नक्षत्र भर, राश वृष (दुहचि 5.21 बजि प्यठॖ) ऋतु बसंत (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

        महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

           नुंदॖ रॆशॖन्य श्रुक्य

यॆति ति म्यॆच़ॖय तति ति म्यॆच़ॖय

म्यॆच़े करतम गुलज़ार

सोरुय त्रऻविथ रॊटुख म्यॆ च़ॖय

म्यॆ च़ॖय हावतम दीदार

            अर्थात

यॆरिलूक्य ति छु ख़वदा परि लूकस मंज़ ति छु तऺम्यसॖय निश वातुन। युस इन्सान सोरुय मऺशरिथ तस दयस ज़िकरि तॖ फिकरि याद करि तस हावि सु पनुन दीदार।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

            *********

1. कारखानॖ (Factory/Mill/System/Business)

2. कारदार (Manager/Officer/Incharge)

3. कारवऻई (Action/Trial/Proceedings)

4. कारसाज़ (Helper/God)

5. कारगर्दगी (Work performance/Out put/Efficiency)

                मुहावरॖ

1. मु: म्वय ति यॆती तॖ म्वयखानॖ

         ति यॆती

    अ: प्रथ कांह चीज़ मॊय्यसर

         आसुन

2. मु: म्वॊंगॖ खार ख्यथ ति फाकय

    अ: ना शुकुर गुज़ार, या, यस

          नॖ यड यी

3. मु: मॊदुर दऻन च़ॊकि नॖ च़ॊक 

         दऻन मॊदरि नॖ

    अ: खऺसलथ छॆ नॖ हरगिज़

          बदलान

       (पनॖन्य शुर्य ह्यॆछॖनऻव्यूख)

**************************

पंचान्ग:- राथ वुछ असि हफतॖकयन दॊहन हॖन्द्य नाव कऻशिर ज़बऻन्य मंज़। अज़ वुछव ॳस्य कऻशिर ज़बऻन्य मंज़ ऱयतन हॖन्द्य नाव। त्वहि सारिनी छु पताह ज़ि ॳकिस वऺरियस मंज़ छि बाह ऱयथ आसान। ब्यॊन ब्यॊन ज़बऻन्य मंज़ छु यिमन ऱयतन हॖन्द्य नाव ब्यॊन ब्यॊन तऺरीकॖ यिवान ह्यनॖ। सु गव ज़ि अंग्रीज़ पऻठ्य, ह्यॆन्दी पऻठ्य, उर्दू पऻठ्य वगैरा वगैरा। कऻशिर्य ज़बऻन्य मंज़ ति छि यिमन ऱयतन हॖन्द्य नाव आमॖत्य थावनॖ।  सानि जंत्री मंज़ छि यिमन ऱयतन हॖन्द्य नाव आमॖत्य हावनॖ ह्यॆन्दी पऻठ्य। वऺलिव ॳस्य वुछव यिहॖन्द्य नाव कऻशिर्य ज़बऻन्य मंज़। नाव छि यिथकऺन्य - 1.च़िथ्थॖर (चैत्र) 2. वह्यक (वैशाख) 3. ज़्येठ (ज्येष्ठ) 4. हार (आषाढ) 5. श्रावुन (श्रावण) 6. बऻदॖर्यप्यथ (भाद्र) 7. ॴशिद (आश्विन) 8. कार्तिक (कार्तिक) 9. मॊंजहोर (मार्ग) 10. पॊह (पौष) 11. माग (माघ) 12. फाल्गुन (फाल्गुन)। त्वहि पज़ि यिति याद थवुन ज़ि यॊदवय यिमन दॊहन तॖ ऱयतन हॖन्द्य नाव म्यॆ वऺन्य कऻशिर पऻठ्य मगर यिमन मंज़ छि कॆंह द्वह या ऱयथ तिम ति यिम अंग्रीज़ॖ अलावॖ बदलॖ नावॖ सॗत्य ति छि यिवान ज़ानॖनॖ। मसलन ब्रसवार (वीरवार/गुरुवार), शॊकुरवार (जुम्मा/भार्गववार), बटॖवार (शनिवार), आथवार (ऐतवार) तॖ ऱयतन मंज़ छि च़िथ्थॖर (चैत), वह्यक (बैसाख), श्रावुन (सावन), बऻदॖर्यप्यथ (भादून), कार्तिक (कतक), मॊंजहोर (मगर)। सान्यन शुर्यन पज़ि यिम नाव पनॖनि ज़्यवि प्यॆतिस प्यठ याद थवॖन्य। यॊदवय सऻनिस पंचान्गस मंज़ छि वऺरियस बाह ऱयथ हऻविथ मगर हर त्रॆयि वॖहॖर्य पतॖ छु सानि पंचान्गॖ मूजूब वऺरियस मंज़ यिवान त्रुवाह ऱयथ ति। यानि अख ऱयथ द्वयि लटि यथ ॳस्य वनान छि अधिक मास। ॳस्य छि ॳकिस वऺरियस मंज़ द्वयि लटि थालस बुथ वुछान। ग्वडनिचि लटि छि वुछान सोंतुकि द्वह युस विक्रमी सम्वत हिसाबॖ यिवान छु पहला चित्र तॖ दॊयिमि लटि छि वुछान ॳस्य थालस बुथ नवरॆह द्वह युस यिवान छु च़िथ्थॖरॖ ज़ूनॖ पछॖ ऒक्द्वह द्वह। अमि अलावॖ छु श्री सप्तर्षि सम्वत हिसाबॖ सान्यन वऺर्यक्यन ऱयतन मंज़ कॆंह तिथि रावान या कॆंह तिथि द्वयि लटि यिवान रोज़ान। अथ छि ॳस्य वनान द्वह रावुन या द्वह लबुन। हालांकि द्वह छु नॖ रावान या लबान, यि छु तिथि रावान या द्वयि लटि यिवान। अमि व्वस्थाय मुतऻबिक छु सोन ऱयथ बाकॖय प़चान्ग क्यन ऱयतन सॗत्य बराबर मॆल ख्यवान रोज़ान। हालांकि प्रथ पऺचान्गॖ हिसाबॖ छु वऺरी शुरु गछ़नुक तिथि ब्यॊन ब्यॊन। अंग्रीज़ छु जनवरी प्यठॖ तॖ सोन यानि श्री सप्तर्षि सम्वत छु नवरेह प्यठॖ यानि च़िथ्थरॖ ज़ूनॖ पछॖ ऒक्द्वह प्यठॖ। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

 भूषण कौल "दीप"

(बूज़िव म्योन ॳज़्युक सबक़

podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)