08.03.2021

08.03.2021, फाल्गुन (फाल्गुन) गटॖ पछॖ (कृष्ण पक्ष) दऺहम (देवादेव) (दशमी) (देवादेव) च़ऺन्दॖरवार (सोमवार) श्री सप्तर्षि सम्वत 5096,नक्षत्र पूषा, राश मकर (रऻच़ हॖन्ज़ॖ 2.38 बजि प्यठॖ), ऋतु शिशर (चलान)...

अज़ छि द्यारॖ दऺहम

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

       महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

             नुंदॖ रॆशॖन्य श्रुक्य

द्युतुथ नरस गौर तॖ तुलरस मऻछी

द्युतुथ हुलम हऺलिस रोंठनस दछ

बुगि पऻरॖय चानि क्वदॖरऻच़ॖय

द्युतुथ रूसिस कॊस्तूरी रछ

             अर्थात

दय चानि दयगऺच़ छुस बॖ नमन करान। त्वहि बख्चुव नरकऻनिस मऺदरॆर, तुलरि माछ, दछि रऻठ दछ तॖ रूस कचि ख्वशबू रूप नाफॖ येमि संसऻरॖय

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

               ********

1. फराक (Separation)

2. फराक ज़द (Separated from one's sweet heart)

3. फराश (Carpet spreader/

 Servant/Tent-pitcher)

4. फराश खानॖ (Servant's room)

5. फराश बीन (French beans)

                मुहावरॖ

1. मु: न ख्यॊन पानॖ न ब्यॆयिस 

          द्युन ख्यनॖ

    अ: न पानॖ कऻम करॖन्य न 

          ब्यॆयिस दिन्य करनॖ

2. मु: न लॊट कुनि न हॊट कुनि

    अ: हिशर न आसुन,या, बे

         तरतीब कार

3. मु: न पीरॖ सुन्द न च़ूरॖ सुन्द

    अ: कऻन्सि सॗत्य नॖ रलुन

    (पनॖन्य शुर्य ह्यॆछॖनऻव्यूख)

**************************

पंचान्ग:- अज़ छि हुर्य दऺहम। ॳज़्यकिस दॊहस छु ब्याख नाव ति। यथ दॊहस छि वनान द्यारॖ दऺहम ति। अकि पराम्परायि मूजूब आसॖ ॳज़्यकि द्वह सारेय न्वशि पनुन गरॖ यानि वऻरिव गरॖ यिवान माल्यनि प्यठॖ यॊत तिम गछ़ान आसॖ अख ज़ॖ द्वह ब्रोंठ ज़ंगि मूजूब। वऻरिव गरॖ यिनॖ वख्तॖ आसॖ यिम न्वशि, नवि क्योहऻ प्रानि, श्वगुन बापथ अनान पानस सॗत्य च़ॊचि, नून, अतॖगथ, हेरच़ बोग, हारॖ, कांंगॖर तॖ ॳमिसॖन्दि यिनॖ पतॖ यानि मालिनि  डून्य परमूज़िथ ॴस्य यिवान सोज़नॖ कॊरि हुन्द वऻरिव डून्य फॊतरि मंज़ या ट्रंकन मंज़। तिम डून्य ति ॴस्य यिवान सोज़नॖ हतॖ वादॖ या सासन मंज़। तिमन डॊन्यन सॗत्य ओस यिवान सोज़नॖ च़ॊचि या रोठ रॊपॖ वरख लऻगिथ, ट्यॊक, स्यन्दॖर, नऻर्यवन, नवीद ब्यॆयि हेरच़ खऺर्च वगैरा। कांगॖर दपान ॴस्य नऺव न्वश खान्दरॖकि दॊयिमि वऺरी प्यठॖ अनान, ग्वडनकि वऺरियि नॖ। चूंकि गरॖ ॴस्य आसान बऻच़व सॗत्य बऺरिथ, ॳज़्यकि द्वह ओस यिमन गरन मंज़ रोज़ान च्युर्यग्यॊश, जटॖ जोश, व्वसॖ द्रॊस, श्वगलाह।  न्वश्यन कोर्यन शुर्यन कट्यन सॗत्य ॴस्य गरिक्य ज़िठ्य बऻच़ ति ल्वकुट लऻगिथ सारिनी सॗत्य हारन गिन्दान, तासस गिन्दान, असुनाह गिन्दुनाह करान रोज़ान। ॳज़्यकि द्वह ॴस्य कम कम व्यन्जन बनान यानि कऺल्यि, रोगनजोश, मछ़, दमोलव, च़ामन, बेतरी। मगर यिमन सारिनी चीज़न मंज़ आव कति कोर बदलाव। परम्परा बदल्यॆयि। हारॖ गऺयि गऻब, डून्य गऺयि द्रॊग्य, रिश्तॖ दूरेयि, बऻच़ छ़ॊकेयि, द्यारॖ दऺहमुक मतलब बदल्यव। ख़बर कऻन्सि छा ज़्वन ति ज़ि ॳज़्युक द्वह ओस यिवान ज़ानॖनॖ ब्यॆयि ति अकि नावॖ सॗत्य। नाव ओस बुनिल्य दऺहम। नॊवुय नॊवुय खान्दर यिमन बच्चन कॊरमुत ओस आसान, ॳज़्युक द्वह ओस तिहॖन्दि बापथ ख़ास माने थवान। अकॖलमंदन हॖन्दि बापथ छु इशारॖ कऻफी। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

भूषण कौल "दीप"

(बूज़िव ॳज़्युक म्योन सबक़ podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)