13.03.2021

13.03.2021, फाल्गुन (फाल्गुन) गटॖ पछॖ (कृष्ण पक्ष) मावस (देवादेव) (अमावस्या) (देवादेव) बटॖवार (शनिवार/ शनिश्चरवार) श्री सप्तर्षि सम्वत 5096, नक्षत्र पूभा, राश मीन (शामन 5.56 बजि प्यठॖ), ऋतु शिशर (चलान) द्रठॖपऻन्च़ुक (पंचक) (चलान)...अज़ छि डून्य मावस...शामन छु थाल बरुन

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

      महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

           नुंदॖ रॆशॖन्य श्रुक्य

नफसी मोरुस तॖ वाय

अच़िथ रूदुम गटे

अथि द्यन यियिह्यम तॖ हाय

करतल छ़ॖनॖहऻस हटे

         अर्थात

नफसी खऻहिश गऺयम अज्ञान गटि किन्य ज़ोरावार। ज्ञानॖ किन्य ननि कऺडिथ ह्यकॖहस लाकम चीरॖ गन्डिथ छ़ुनहस हटि करतल तॖ करहऻन फन्ना।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

            *********

1. क़ऻफिलॖ (Multitude of travelers/Caravan)

2. कऻफियि (Rhymn in poetry)

3. क़ऻलिब (Mould/Frame)

4. कऻल्यबाफ (Carpet weaver)

5. कऻलीन (Carpet)

                    मुहावरॖ

1. मु: नबॖ चि तारॖ च़टनि

    अ: लायक़ ग्यवुन

2. मु: नऺटी फुटान तॖ यारबल छि 

         रोज़ान ॳती

    अ: लूख छि यिवान गछ़ान तॖ 

         जाय छि रोज़ान तऺती

3. मु: नच़ॖहऻ तॖ आंगुन छु छ़ॊट

         ग्यवॖहऻ तॖ ग्यव ख्यव ब्रऻर्य

         वनॖहऻ तॖ वन छुम दूर

   अ: न तगनॖक्य छ़्रठ

        (पनॖन्य शुर्य ह्यॆछॖनऻव्यूख)

**************************

पंचान्ग:- दपान जबार ह्वकुमरान सॖन्दिस वख्तस मंज़ आव बटन प्यठ स्यठाह ज़ुलुम करनॖ तॖ सु ओस यछ़ान बटन हॖन्दिस धर्मस मंज़ ख़लल त्रावुन तॖ तिहॖन्ज़ॖ कॆंह परम्परायि फुटरावनि तॖ पनुन आसुन बासनावुन तॖ सॗती लूकन मंज़ अख दऺहशथ पऻदॖ करुन। दपान जबारन वॊन बटन ज़ि फाल्गुनस मंज़ हेरथ मनावनॖ बजायि मनावॖन्य यि हेरथ हारॖ किस ऱयतस मंज़। बटन गव स्यठाह मुज़िर जबारॖन कथ मानॖन्य मगर क्याह करहऻन। नकार करनस ओसुख नॖ वार। दपान बटव मनऻव हेरथ हारॖकिस ऱयतस मंज़ मजबूरी मंज़ मगर हऻरऻनी हॖन्ज़ कथ गऺयि यिछ़ ज़ि दपान हारस मंज़ ति प्यव अछ़्यन शीन तॖ रूदॖ। यि शॆछ वऻच़ बादशाहस ताम ति। जबार खान गव परेशान तॖ सूंचुन ज़ि बटन हॖन्दिस अथ व्वत्सवस मंज़ छा यीच़ शक्ति। हैरत गऺयि तस यि वुछिथ। वनन वऻल्य छि वनान ज़ि शिव रात्रि हुन्द नाव छु अति प्यठय प्यॊमुत हेरथ यानि हऻरऻनी या हैरत। दपान जबार खान सुन्द न्यॆचुव मा ओस अकि लटि नावि सऻलस द्रामुत तॖ नाव पऺच्य व्यथि किन्य। वति वुछिन अख बटॖ कूर कथ ताम यारबलस प्यठ म्यॆच़ि सॗत्य अथॖ ख्वर छलान। कूर ॴसमॖच़ ॴस स्वन्दर दपान तॖ ॳमिस जबार खान सॖन्दिस न्यॆचविस आव दिल ॳमिस बटॖ कोरि प्यठ तॖ कॊरनस ठठाह। दॊपनस काश यि म्यॆच़ आसहऻ बॖ तॖ च्यऻनिस बदनस सॗत्य लगनुक तमाह नेरिहेम। यि ठठॖ बूज़ अमि बटॖ कोरि तॖ द्युतुन श्राप ॳमिस सऻलऻनियस। दॊपनस गछ़ च़्यॆ कोढ प्यॊन अथ पानस। दपान तऺमिस बटॖ कोरि हुन्द श्राप लॊग जबार खान सॖन्दिस न्यॆचविस तॖ ॳमिस प्यव कोढ सऻर्यसॖय पानस तॖ लॊग छ़ान्डनि यलाज यि ब्यमऻर्य च़ऺलरावनॖ बापथ। कांह यलाज गव नॖ कारगर। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ  

(बूज़िव म्योन ॳज़्युक सबक़

podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)