28.03.2021

28.03.2021, फाल्गुन (फाल्गुन) ज़ूनॖ पछॖ (शुक्ल पक्ष) पुनिम (पूर्णिमा) आथवार (रविवार/ऐतवार), श्री सप्तर्षि 5096, नक्षत्र उफा, राश कन्या (चलान) ऋतु बसंत (चलान)...अज़ छि हूल्य ति

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

       महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

         नुंदॖ रॆशॖन्य श्रुक्य

दॊहस गुज़ोरुम नॊफलॖ हथा

रातस रूदुस ज़ागय

यॊद व्वंय करहम क्बूल्ययथा

नतॖ हून ज़न फ्यूरुस आगय

           अर्थात

द्वहस कऺरॖम इबादत स्यठा, रातस कऺरॖम बेदऻरी तॖ रूदुस ज़ागि तस दयस। यॊद व्वंय रथि खसि म्यऻन्य यि इबादत, तॆलि बनिह्यम तसॖन्ज़ कृपा, नतॖ छुस गरॖ गरॖ फेरवुन ज़न हून।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

               *******

1. खऺदॖर (Cotton-cloth)

2. खच (Crowd)

3. खचि (Tailless animal)

4. खडॖपंच (A leader/Chieftain/Guide)

5. खच़ाखच (Full of the capacity/Filled up to the brim/Stuffed together)

             मुहावरॖ

1. मु: लुकॖ बुज़्य जॆशनॖ

    अ: कांह कऻम बेमक्सद गछ़ॖन्य

2. मु: लशकरि शिकस

    अ: ॴनि शिकसलद

3. मु: लशकरि पतॖ तॖ पछाडि

         ब्रोंठ

    अ: मुकाबलॖ करनस मंज़ 

         सारीवी ख्वतॖ पथ तॖ च़लन

         वाल्यन ब्रोंह, या, बुज़दिल

         आसुन

     (पनॖन्य शुर्य ह्यॆछॖनऻव्यूख)

**************************

पंचान्ग:-राथ वुछ असि ज़ि कऺशीरि मंज़ कम कम फल यानि कुस कुस म्यवॖ छु व्वपदान। यिमव मंज़ॖ छि तिम ति कॆंह म्यवॖ थिम नॖ सानि नवि पुयि आसन वुछमती या ख्येमॖती मसलन ग्वरॖदऻल्य, क्यनॖबऺब्य, त्रेलॖ, शाह तुल्य, बम्च़ूंठ। यिम म्यवॖ छिनॖ यपऻर्यम्यन अलाकन मंज़ नज़रि यिवान। वऺलिव अज़ वुछव ॳस्य कऺशीरि मंज़ क्वस क्वस सब्ज़ी छि व्वनदान। सब्ज़ियन हॖन्द्य नाव कऻशिर ज़बऻन्य मंज़ छि - हाक (हाकस छि वारियाह कॖसॖम यानि कानुल, वारि हाक, बऺद्य हाक, वगैरा), म्वन्जि, मुजि (ज़्यॆछि तॖ गोल), मटर, ग्वगजि, अल (ज़ीठ, गोल), गाज़ॖर, सॊच़ल, पालक, व्वस्तॖहाक, नदॖर्य, नुनर, वान्गन, ओलव,टमाटर, गन्डॖ, रोहनॖ, लऻर (वारि लऻर तॖ बागॖ लऻर), पुदनॖ, मीथ्य, लीसॖ, हन्द, करेलॖ, त्वरेलॖ व्वपलहाक, बुम, फूल गो़बी, बंदगोबी, नील्य मर्चॖवांगन, वगैरा। कऺशीरि मंज़ ॴस अख प्रथा चलान सऺदियव प्यठॖ सु गऺयि यि ज़ि कॆंह सब्ज़ी आसॖ यिवान ह्वखॖनावनॖ ऱयतॖकऻलिस तॖ आसॖ यिवान ख्यनॖ वंदस मंज़ तिक्याज़ि वंदस आसॖ नॖ मेलान सब्ज़ी शीन प्यनॖ म्लखॖ। अज़कल यॊदवय सब्ज़ी वंदस मंज़ छि कऺशीरि वातान न्यॆबरॖ ब्यॆयव जायव प्यठॖ मगर ह्वखनावनॖच प्रथा छि वुनि ति जऻरी। तिम सब्ज़ी आसॖ अलॖ हचि, वांगन हचि, करेलॖ, हॊख्य फूलगोबी।  यिमव सब्ज़ियव मंज़ॖ छि वारियाह तिम सब्ज़ी यिम असि बालॖ यपारि ति मेलान छि रोज़ान हालांकि ब्यॊन ब्यॊन नावॖ सॗत्य छि ज़ानॖन यिवान। म्यॆ छि व्यनती ज़ि पनॖन्यन शुर्यन करॖनऻविव यिमन कऻशिर सब्ज़ियन सॗत्य ज़ान पहचान। अमि अलावॖ छि कऺशीरि मंज़ मेलान मासाहारी ख्यन ति मसलन गाडॖ, ह्वगाडॖ (पचॖ ह्वगाडॖ, रज़ॖ ह्वगाडॖ), न्यॆनि यानि कटॖ मांज़। ब्यॊन ब्यॊन कॖसमॖच दालॖ यानि म्वंगॖ, करॖ,चन्नॖ, वारिमुठ वगैरा। यिमव दालव मंज़ॖ ॴस वारिमुठ दाल ख़ास मुकाम हऻसिल कऺरिथ।  कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी।

**************************

*त्रिवेणी* प्रोग्रामस मंज़ कऺरिव शिरकत 12,13 तॖ 14 अप्रैल 2021, नाव कऺरिव दरॖज जे के विचार मंच सदऺस्यन दऺस्य

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

 भूषण कौल "दीप"

(बूज़िव ॳज़्युक यि म्योन सबक़

podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)