27.03.2021

27.03.2021 फाल्गुन (फाल्गुन) ज़ूनॖ पछॖ (शुक्ल पक्ष) च़्वदह (चतुर्दशी) बटॖवार (शनिश्चरवार/शनिवार), श्री सप्तर्षि सम्वत 5096, नक्षत्र पूफा, राश कन्या (रऻच़ हॖन्ज़ॖ 1.19 बजि प्यठॖ),ऋतु बसंत (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

      महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

           नुंदॖ रॆशॖन्य श्रुक्य

बंगि कऻनिस अम्बर छ़ॊटुय

वीरि कऻनिस फल नो बोवे

ग्वरॖ कऻनिस अम्बर मॊटुय

वतॖ कऻनिस अन्दॖवह पॆयॆ

         अर्थात

यिथॖ बंगि मूर छि जलद हॊखान, तिथॖ छुनॖ वीरि मूरि फल कॆंह बॊवान। ग्वरॖ रॊस अज्ञऻन्यस छि बदनऺसीबी नाल व्वलान। सु छु अंज़ऻन्य दय सॖन्ज़ि वति निशि हमेशॖ दूर रोज़ान।  तिथिस वतॖ कऻनिस छु ॳछन ऒन प्यवान।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

            **********

1. खपचॖ कडॖन्य (To hack to

pieces)

2. खटारॖ (Worn out/Out dated/Exposed)

3. खटॖ (Sour)

4. खटुन (To hide/Keep secret/Conceal)

5. खजर (Breadth/Extension/Width)

               मुहावरॖ

1. मु:  लूटस तॖ जोशस बऻजवऺठ

    अ: नाकारॖ छु नाकारस सॗत्य

          रलान, या, बुरॖ काम्यन

          मंज़ हिसॖदऻरी

2. मु: लॊग न तॖ जॊग आव पॊत

         फीरिथ

    अ: कुनि चीज़स या कामि हुन्द

         पूरॖ करनुक वादॖ कऺरिथ 

         नाकाम गछ़ुन

3. मु: लन्जि पम्पोश

    अ: ल्वकटि माहोलॖ न्यबर 

         नीरिथ स्यठाह थज़र प्रावुन

       (पनॖन्य शुर्य ह्यॆछॖनऻव्यूख)

**************************

प़चान्ग;- अज़ वुछव ॳस्य कऺशीरि मंज़ कुस कुस म्यवॖ छु पऻदॖ सपदान, सब्ज़ी कम कम छि पऻदॖ सपदान। म्यवॖ यानि फलन हॖन्द्य कॆंह नाव छि यिथॖ पऻठ्य - च़ूंठ्य (च़ूंठ्यन मंज़ छि ब्यॊन ब्यॊन जऻच़ यानि  कॖसॖम। मसलन अम्बॖर्य च़ूंठ, सफ़ेद च़ूंठ, च़ॊक मॊदुर च़ूंठ वगैरा), बम्म च़ूठ्य, टंग (टंगन मंज़ ति छि ब्यॊन ब्यॊन ज़ऻच़ यानि कॖसॖम मसलन ल्वकॖट्य टंग, बबॖगोश टंग, रसॖदार टंग वगैरा वगैरा) ॴर, च़ॖनॖन्य, चॆरी यानि गिलासॖ (गिलासन मंज़ ति छि ब्यॊन ब्यॊन ज़ऻच़ यानि कॖसॖम मसलन स्यॊद गिलासॖ, डबल गिलासॖ, क्रॖहॖन्य गिलासॖ वगैरा वगैरा) ॴल्यचि, ग्वर्दऻल्य, त्रेलॖ, तुल्य (तुल्यन मंज़ ति केंह ज़ऻच़ यानि कॖसॖम शाह तुल्य, क्रॖहॖन्य तुल्य वगैरा), ह्यन्दॖव्यन्द, खरबूज़, च़ेरॖ, डून्य, बादाम (तिमन मंज़ ति ब्यॊन ब्यॊन ज़ऻच़ मसलन कागज़ी डून्य, वऻन्ट्य डृन्य, कागज़ी बादाम वगैरा वगैरा)। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी।

**************************

*त्रिवेणी* प्रोग्रामस मंज़ शिरकथ करनॖ बापथ सूज़िव पनॖन्य नाव जे के विचार मंच क्यन कार्यकर्ताहन युहुन्द फ़ोन नम्बर छु व्हाटसाप क्यन केंच़न ग्रुपन मंज़ आमुत हावॖनॖ्।  प्रोग्राम छु त्र्यन दॊहन यानि 12, 13 तॖ 14 अप्रैल 2021

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

 भूषण कौल "दीप"

(बूज़िव म्योन यि ॳज़्युक सबक़

podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)