21.03.2021

21.03.2021 फाल्गुन (फाल्गुन) ज़ूनॖ पछॖ (शुक्ल पक्ष) सतम (देवादॆव) (सप्तमी) (देवादेव) आथवार (रविवार/ऐतवार) श्री सप्तर्षि सम्वत 5096 नक्षत्र मृग, राश मिथुन (सुबहॖचॖ 6.8 बजि प्यठॖ), ऋतु बसंत (चलान)...अज़ छि दॊयिम सतम...रातुक वॊहरवोद यी अज़

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

      महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

           नुंदॖ रॆशॖन्य श्रुक्य

पानय पानस पाफ न्यवारे

युस नुंदॖ संज़ुन दॊप हॆये

दॖयि वऺसिथ छुय अपोर तरुन

अख कारन तॖ ब्यॆयि क्रॆये

          अर्थात

युस नुंदॖ रॆश्य सऻबॖन्यनन श्रुक्यन ज़ानि सु ह्यॆकि पऻन्य पानय पनॖन्य पाफ न्यवऻरिथ। कारन तॖ क्रॆय छु व्यवहारुक हीतू। दयस (कारन) सॗत्य ध्यानस मंज़ रूज़िथ रॖत्यव कर्मव ह्यॆकि दॖय दूर सपदिथ। यॆमिकिन्य सारिनॖय मंज़ कुन दय डींशिथ तरि ज़ीव अपोर

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

             *********

1. कऻर (Neck)

2. काच़ुर (A brown haired person)

3. काच़ॖ ज़ून (An early moon)

4. कातुर (Mule)

5. कऻच़ (A pair of big scissors)

              मुहावरॖ

1. मु: म्वकॖदमस पतॖ नय 

         फ्वकॖदम आसि, गामस

         तुलि शामस ताम

   अ: प्रथ कऻन्सि छु पनॖनि ख्वतॖ

        बॊड पतॖ आसान, या, 

        हऻक्यमस ति गछ़ि प्यठॖ

        हऻकिम आसुन

2. मु: म्वर्दस वदान बिहिथ 

         रीज़कस वदान वॊदॖन्य

    अ: बत्तॖ कमावुन छु मरनॖ 

          ख्वतॖ मुश्किल, या,मातम

          ति छु द्वख तॖ ज़्येनुन ति

          छु मुश्किल

3. मु: मत्यव अनेये न्वश स्व ति

         द्रायि मऺच़ॖय

    अ: सिनिस छु ह्युवुय समखान

      (पनॖन्य शुर्य ह्यॆछॖनऻव्यूख)

**************************

पंचान्ग:- ब्यॆयि सुय दु-च़्यॊत, ब्यॆयि सुय संशय, ब्यॆयि सॊय वनन, ब्यॆयि सॊय काहन रऻवमॖच़ गाव। यि छा पॊज़ वनान किनॖ हु छु पॊज़ वनान। ब्यॆयि सॊय समस्या, ब्यॆयि सॊय प्रॖछ़गऻर ॳकिस ब्यॆयिस। कुस करि फऻसलॖ? कऺमिसुन्द मानव ॳस्य सऺही। पानस असि ज़्यादॖ ज्ञान छु नॖ, बऺहस ॳस्य कऺरिथ ह्यकव नॖ। करुन हय छु तॖ करुन असि छु क्याह? जंत्री क्वस हिश छि अंसि पानॖनावॖन्य? द्वन ख़यालन प्यठ छि ॳस्य व्वदॖन्य। क्वत गऺयि तिम ज्यॊतिषार्य यिहुन्द वनुन ज़न ओस भगवान सुन्द फर्मान आसान। कलॖ ॴस्य नॖ फिरान तिहॖन्दिस वनॖनस। मगर अज़ छि असि पऺज़्य पऻठ्य तिहॖन्ज़ व्यछ़य बासान। पनॖन्यन रीच़न ऱयवाजन प्यठ ह्यॊतुन असि विश्वास छ़ॊकुन ह्यु। सवाल छु अज़ तीलॖ ॴठम हुन्द, राथ ओस हेरऺच़ हुन्द, ऊत्रॖ ओस ज़र्मसतम हुन्द वगैरा वगैरा। ओंकारनाथॖन्य जंत्री छि हावान तीलॖ ॴठम ॳज़्य याने सतम दुहुय मगर पुनीत जी छु पनॖनि जंत्री मंज़ तीलॖ ॴठम हावान पगाह याने ॴठम द्वह। अज़ छुय ब्यगाह व्वंय यू पगाह कर्ज़दारो। ओंकारनाथ जी छु वनान यि म्यॆ होवमुत छु जंत्री मंज़ सुय छु सऺही तॖ हुपऻर्य छु पुनीत जी वनान ज़ि म्यानि जंत्री मंज़ छु बिल्कुल सऺही  गणित आसान। असि छि द्वशवय सऺही बासान ति क्याज़ि यि गणित छु यिमनॖय द्वन निश क्याज़िकि यिमय ज़ॖ छि ब्यॊन ब्यॊन जंत्री असि ताम वातनावान। ॳस्य आयि यिमन द्वन हॖन्ज़ि पानॖवॖन्य लडायि मंज़ खामॖखा ह्यनॖ। न छु योर गछ़ॖनस वार तॖ न छु होर गछ़नस वार। नतीजि छु यि नेरान ज़ि ॳस्य छि ॳड्य कालॖ मनावान तॖ ॳड्य पगाह। करव हय तॖ करव क्याह। ब्रह्मणन हॖन्ज़ व्यछ़य ॴसॖय ॴस असि, व्वंय प्यॆयि ज्योतिष्यन हॖन्ज़ ति व्यछ़य। यूत म्योन यि रामायण बूज़िथ कऺरिव व्वंय तॊह्य पानय फऻसलॖ ज़ि त्वहि करुन क्याह छु। ॳस्य सऻरी छि व्वंय आज़ाद पऺरिन्दॖ, यपऻर्य मन करि तपऻर्य वुडव।असि छु अब ति टोठ बब ति टोठ। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

भूषण कौल "दीप"

(बूज़िव म्योन यि ॳज़्युक सबक़ podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ koshursabak.blogspot.com प्यठॖ ति)