19.03.2021

19.03.2021, फाल्गुन (फाल्गुन) ज़ूनॖ पछॖ (शुक्ल पक्ष) शॆयम (षष्ठी) शॊकुरवार (शुक्रवार/जुम्मा/भार्गवार),श्री सप्तर्षि सम्वत 5096, नक्षत्र कृति, राश वृष (चलान) ऋतु बसंत (चलान)...अज़ छि कुमार शॆयम (कुमार षष्ठी) ति

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव।

**************************

      महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

            नुंदॖ रॆशॖन्य श्रुक्य

कॆंच़न द्युतुख यॊत क्या तॊतो

कॆंच़न यॆति नतॖ तॊतुय हाव

कॆंच़न द्युतुख लालुक त्रोटो

कॆंच़न गाशि मंज़ गॊटुय गव

          अर्थात

दय सॖन्ज़ि दयगऺच़ किन्य रूद्य यितॖ गछ़ि बंदनन मंज़ कॆंह आवॖर्य। कॆंच़व प्रोव मूख्य दाम। कॆंच़न छ़ॖनिन लालन हॖन्ज़ त्रठा प्यठय फिरिथ, मगर कॆंच़न गव गाश मंज़ अनिगॊट

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

            *********

1. कारकुन (Worker/An agent)

2. कारगर (Effective/Efficacious/Active)

3. कारनामॖ (Deed/Heroic deed)

4. कारिन्द (Worker/Agent/Representative)

5. कारण (Reason/Cause/Purpose/Means/Motive/Action)

                मुहावरॖ

1. मु: मोतस तॖ क़ब्रि छु हिसाब

    अ: हिसाब छु प्रथ कामि तॖ

         चीज़स

2. मु: मॊत च़ाव पॊत दारि क्वलय

         ह्यथ अटॖबारि

    अ: रनि हुन्द मऻर्यमॊत छु 

          इन्सानस क्वफेल 

          करनावान

3. मु: मुडस ज्ञान द्युन गव ख़रस

         गोर आपरावुन

   अ: कम अकॖल छु नॖ गाटॖजारॖच

         कथ समजिथ ह्यकान

       (पनॖन्य शुर्य ह्यॆछॖनऻव्यूख)

**************************

पंचान्ग:- राथ ताम ह्यॆछ असि हफतॖक्यन सतन दॊहन हॖन्द्य नाव तॖ वऺर्यिक्य बाहन ऱयतन हॖन्द्य नाव कऻशिर्य ज़बऻन्य मंज़। सानि ज़ऻच़ मंज़ छि ट्यॆक्यन्यन तॖ ज़ातकन मंज़ नक्षत्रन हुन्द स्यठाह प्रभाव रोज़ान तॖ सॗती छि सान्यन राशियन हुन्द ति महत्वपूर्ण योगदान रोज़ान सऻनिस जीवन कालस मंज़। यॆलि सोन शुर ज़न्मस यिवान छु यथ संसारस मंज़, ज़ॖ च़ोर चीज़ छि यिवान न्यॆचिपऺतरि हिसाबॖ वुछनॖ, यानि थनॖ प्यनुक माने ज़्यनॖ वख्तुक समय, तमि वख्तॖ कुस नक्षत्र कथ दिशाय मंज़ छु आसान, तमि दुहॖच्य राश क्या छि आसान, तिथि क्याह छु आसान वगैरा वगैरा। यिम चीज़ मद्य नज़र थऺविथ छु सानि बापथ ज़रूरी बनान ज़ि असि सारिनी पज़ि ज़ऻन्यकऻरी थवॖन्य यिमन चीज़न हॖन्ज़। नक्षत्र तॖ रऻश हुन्द प्रयोग छु सानि ज़ऻच़ मंज़ ब्यॆयि ति वारिहान मोक़न प्यठ यिवान करनॖ विज़ि विज़ि। मसलन ट्यॆकिन मिलाप वख्तॖ, सफ़रस गछ़नॖ वख्तॖ, खान्दरन प्यठ, द्रठॖपऻन्च़ुक वुछन बापथ, सूर्य अस्त, ब्रहस्पत अस्त, वगैरा वगैरा। वऺलिव अज़ वुछव ॳस्य सऻनिस पंचान्गस मंज़  यिमन नक्षत्रण हॖन्द्य नाव कऻशिर्य ज़बऻन्य मंज़। यिम छि कुल सतोवुह नक्षत्र आमॖत्य मानॖनॖ। यिहॖन्द्य नाव छि यिथ पऻंठ्य - 1. आश्वनी (अश्वि) 2.भरणी (भर) 3. कृतिका (कृति) 4. रोहिणी (रोहि) 5. मृगशिरा (मृग) 6. आर्द्रा (आर्द्र) 7. पुनर्वस (पुर्न) 8. तिष्या (तिष्य) 9. आश्लेषा (आश्ले)10. मघा (मघा) 11. पूर्वाफाल्गुनी (पूफा) 12. उत्तराफाल्गुनी (उफा) 13. हस्त (स्स्त) 14. चित्रा (चित्र) 15. स्वाती (स्वाति) 16. विशाखा (विशा) 17. अनुराधा (अनू)18. ज्येष्ठा (ज्येष्ठ) 19. मूला (मूल) 20. पूर्वाषाढा (पूषा) 21. उत्तराषाढा (उषा) 22. श्रवण (श्रव) 23. धनिष्ठा (धनि) 24. शतभिषक (शत) 25. पूर्वभाद्रपदा (पूभा) 26. उत्तराभाद्रपदा (उभा) 27. रेवती (रेव) - यिमन सतोवुहन नक्षत्रण मंज़ छि पांछ़ तिम नक्षत्र यिमन दॊहन द्रठॖपऻन्च़ुक रोज़ान छु तॖ कॆंह नक्षत्र छि यिवान यात्रायि खऻतरॖ श्वब यानि जान मानॖनॖ तॖ कॆंह अश्वब यानि ख़राब। सानि जंत्री मंज़ छि यिम नक्षत्र पनॖनिस खानस मंज़ छ़ॊटॖ नावॖ सॗत्य आमॖत्य हावन। तिम छ़ॊट्य नाव छि हॆरिकनि नक्षत्रन सॗत्य ब्रॆक्यटस मंज़ म्यॆ हावनॖच कूशिश कऺरमॖच़। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी। 

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

भूषण कौल "दीप"

(बूज़िव ॳज़्युक यि म्योन सबक़

podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com ति)