10.03.2021

10.03.2021, फाल्गुन (फाल्गुन) गटॖ पछॖ (कृष्ण पक्ष) बाह (देवादेव) (द्वादशी) (देवादेव) ब्वदवार (बुद्धवार) श्री सप्तर्षि सम्वत 5096, नक्षत्र श्ववण, राश मकर (चलान) ऋतु शिशर (चलान)... अज़ छि हेरथ

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

      महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वाहा स्वधा नमोस्तुते

**************************

           नुंदॖ रॆशॖन्य श्रुक्य

आशकन त्रेश तॖ ब्वछि नॖ आसे

काशक कमस पऺत्ययनये नॖ ज़ान

छु दूरस वतन सदकस निशे

च़ूरस नॆन्द्र आसि नॖ ज़ात

           अर्थात

यिमव आशकव (यानि दय मत्यॆव) ब्वछि तॖ त्रेशि प्यठ कऻबू आसि कॊरमुत, तिम कमायि कुल्य छि कमस प्यठ गुज़ारॖ ह्यकान कऺरिथ। यिथॖ दय छु बखत्यन निश वास करान, तिथॖ छि स्वबावॖ किन्य नॆन्द्र च़ूरॖ सॖन्ज़न ॳछन गऺजमॖच़ आसान

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

            ********

1. क़ऻबलि दीद (Able to see)

2. क़ऻबलि अमल (Actable)

3. क़ऻबलि ग़ोर (Worth considering)

4. क़ऻबलि क़दॖर (Respectable)

5. क़ऻबलि क़बूल (Acceptable)

                मुहावरॖ

1. मु: न योरुक तॖ न तोरुक

    अ: कुनि कारुक नॖ

2. मु: न ख़ऻर न बरकथ

    अ: यस नॖ कॆंह हऻसिल यी

3. मु: न गछ़्यम मांछ तॖ न 

         गछ़्यम ट्वफ

    अ: म्यूठ ख्यॊन छु जान मगर 

         अम्युक कॗमथ नॖ द्युन, या,

         कुनि फऻयदॖ खऻतरॖ मॆहनत

         न करॖन्य

       (पनॖन्य शुर्य ह्यॆछॖनऻव्यूख)

**************************

पंचान्ग:- अज़ छि वागॖर्य बाह। वटुक ति छु ॳज़्य पूज़ुन। त्वहि सारिनी छु हथ हथ मुबारक ॳज़्यकि दुहुक। अमूमन छि हेरच़ पूज़ा रातस यिवान करनॖ। तवय छि शायद यथ दॊहस वनान हरि रात्रि, कालॖ रात्रि, तालॖ रात्रि। दपान शिव छु तमोगुण प्रधान संहार करन वोल इसलिए छि ॳमिस शिवस तमोगुणी राथ ज़्यादॖ टऻठ। कऻशिर्य बटन छि हेरथ वऺर्युक सारिवी ख्वतॖ बॊड पर्वॖ यानि व्वत्सव यिवान मानॖनॖ। कऺशीरि मंज़ ॴस हेरथ आसान वंदॖ रऻच़न मंज़ मगर कऻशिर्य बटॖ ॴस्य सोरुय मऺशरिथ यानि तॗर कठॖकोश शीन रूद बेतरी यि द्वह हर्षोलासॖ सान मनावान रोज़ान यि द्वह या यिम द्वह। त्र्यन हफतन प्यठ ओस आसान यि त्योहार। हुर्य ऒक्दॊह प्यठॖ तीलॖ ॴठम ताम। तिहिन्द्य शुर्य यॊदवय गरि न्यबर ति आसान ॴस्य, यि द्वह मनावनि बापथ ॴस्य तिम कुनि न तॖ कुनि तऺरीकॖ गर वातान तॖ सारिनी बऻच़न मंज़ समिथ हेरच़ हॖन्ज़ पूज़ा अर्चना करान तॖ ॴशिर्वाद रटिथ ज़िठ्यन हुन्द ब्यॆयि पनॖनिस पनॖनिस कारस न्यॆरान। मगर हालाथ बदलेयि व्यॊखतुय। अज़कल छिनॖ ह्यकान वऻतिथ शुर्य पनॖन्यन पनॖन्यन गरन ताम कुनि नतॖ कुनि वजह मूजूब। ॳड्य रऺट्य इम्तिहानन, ॳड्य रऺट्य पॊज़ अपुज़ बहानन। व्वंय छु नॖ रूदमुत सु वलॖवलॖ ति, सु जनून ति, न छि स्व फ़ुर्सत व्वंय तॖ न छि स्व दिलॖच फ़राग़थॖय। युहुस गव पज़नॖ प्यॆठी कोरोनावयरस महामऻरी वजह किन्य। अख ॳकिस निश गऺयि दूर, ॳकिस ब्यॆयिस निश ह्यॆक्य नॖ वऻतिथ। प्यठॖ रूज़ पनॖनि ज़ऻच़ हॖन्द्य ब्रह्मणन हॖन्ज़ व्यछ़य। पूज़ा करि कुस? मंत्र परि कुस? गरॖ कऻम करि कुस? हारनॖय गिन्दहऻव मगर हारय छॆ नॖ। तासस गिन्दॖहऻव मगर बऻज्य छि नॖ। पॊज़ हय यॊदवय बूज़िव कऻशुर बटॖ छु अज़कल गोमुत गीर। बासान पनुन पान तस बे-पीर।  तऺमिस छुनॖ पानस तखसीर।  खऻर रीथ छि पालॖन्य। हेरथ छि मनावॖन्य। शिव शक्ति दीन असि सारिनी स्यॆदि बुथि कारस तार। करव शिवस ॳस्य ज़ारॖ पार ज़ि असि म्वकलावि पापव तॖ शापव मंज़ॖ। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

भूषण कौल "दीप"

(बूज़िव ॳज़्युक म्योन सबक़ podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)