17.03.2021

17.03.2021 फाल्गुन (फाल्गुन) ज़ूनॖ पछॖ (शुक्ल पक्ष) च़ोरम (चतुर्थी) ब्वदवार (बुद्धवार) श्री सप्तर्षि सम्वत 5096,नक्षत्र अश्विन, राश मेष (चलान), ऋतु बसंत (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

        महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

           नुंदॖ रॆशॖन्य श्रुक्य

रातस द्वहस कलिमा पॊरुम

तिय ज़न मॊरुम तिलॖक स्वन

रात तॖ द्वह कनि प्यठ बॊरुम

ओसुस सास तॖ सपनुस स्वन

           अर्थात

रातस द्वहस क्वरान पऺरिथ गऺयम मनॖच गांगल दूर। तिम आयि बऺरिम तिथॖ पऻठ्य रच़ि रच़ि रगन मंज़ यिथॖ पऻठ्य स्वनॖ रंगॖ तिलॖ कुनि पलवस प्यठ छि छावान। रात-द्वह खॊतुम रथि, युस कनि प्यठ बिहिथ गुज़ोरुम अज्ञऻन्य ॴसिथ प्रोवुम पज़रुक ज्ञान

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

            ********

1. कार आज़मूद (Veteran/Experienced person)

2. कार आमद (Useful/Serviceable)

3. कारॖबार (Business/Trade/Profession/Occupation/Employment)

4. कार बंद (Complying with/Acting up to)

5. कारि स़वाब (Good deed/Good turn)

                 मुहावरॖ

1. मु: म्यॆच़ गऺछ़्यतन या मीच़

    अ: दग नॖ ह्यॆन्य, या, बेदर्दी हुन्द

         इज़हार

2. मु: म्यॊंड म्यॊंड ख्यॊन तॖ 

         फाकय

    अ: बेतसला, या, ब्वछॖरुक

          इन्तिहा

3. मु: मॊत गव सु युस कॊहि 

         तूरस खसि

    अ: बॊड गवॖ सु युस बजर

          हावि, या, बऺडद्यद गऺयि 

          सॊय य्यॊस बऺड ल्वखॖर

          ख्यावि

        (पनॖन्य शुर्य ह्यॆछॖनऻव्यूख)

**************************

पंचान्ग:- कॆंह द्वह ब्रोंठ यानि च़्वदह मार्च ज़ॖ सास अकवुह तॖ  आथवारि द्वह ओस जम्मू कशमीर विचार मंच संस्थायि अख प्रोग्राम ह्यॆन्दी भवनॖ नवि दिल्लि मंज़ मनोवमुत। अथ प्रोग्रामस ओस नाव महाशिवरात्रि उत्सव तॖ अथ प्रोग्राम्स मंज़ आव वुछनॖ ज़ि सानि समाजक्यन ल्वकट्यन तॖ बड्यन शुर्यन, शु वुहॖर्य प्यठॖ ज़ॖतोवुह वुहरिस ताम बऻल्कन तॖ बाल्यकायन कऻच़ाह छि तगान पनॖनि माजि ज़्यॆवि यानि कऻशिर्य ज़बऻन्य मंज़ कथ बाथ करॖन्य बॆ-फ्रूक पऻठ्य। सॗती आव वुछनॖ ज़ि सऻन्य शुर्य कऻच़ाह दिलचस्पी छि थवान चित्रकऻरी मंज़ ति। अमि अलावॖ ब्यॆयि ति कॆंह प्रोग्राम मसलन पारम्पऺरिक पॊशाक हावुन, शंख-नाद करुन, नामा वार हऺस्तियन मान सत्कार करुन, शिवरात्री माडलिंग करॖन्य वगैरा। यॊत ताम पनॖनि कऻशिर्य ज़बऻन्य मंज़ कथ करनुक तोलुक छु, म्यॆ गऺयि खुशी यि वुछिथ ज़ि सऻन्य कऻशिर्य बच्चॖ यिम अम्रीकाहस मंज़ रोज़ान छि, न्युज़ीलैंडस मंज़ रोज़ान छि या वतनॖ न्यबर कुनि ति मुल्कस मंज़ रूज़िथ छि, तिम छि कऻशिर पऻठ्य कथ करान रोज़ान पनॖन्यन गरिक्यन बऻच़न सॗत्य दफ अमा पॊज़ कऻशिर ज़बान ह्यॆछनावन वाल्यन हॖन्ज़ व्यछ़य छि यॆति ति तॖ तति ति। यि वुछिथ सूंच म्यॆ ज़ि बॖ करॖ अख कूशिश यॆमि मोबाईलॖ दऺस्य लूकन ताम तिमन दॊहन, ऱयतन, व्वत्सवन, मोसमन बेतरी हॖन्द्य कऻशिर्य नाव वातनावनॖच ताकि सऻन्य शुर्य ह्यकन ह्यॆछिथ, पऺरिथ लीखिथ तॖ ज़ऻनिथ तॖ परज़नऻविथ। अथ सिलसिलस मंज़ दॊहरावॖ बॖ ब्यॆयि अकि फिरि तिम सऻरी नाव कॖस्तन मंज़। अज़ वुछव दोहन हॖन्द्य नाव - च़न्दॖरवार (सोयवार), बॊम्वार (मंगलवार), ब्वदॖवार (बुद्धवार), ब्रसॖवार (ब्रहस्नतिवार), शॊकुरवार (शुक्रवार), बटॖवार (शनिश्चरवार) तॖ आथवार (रविवार)। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

 भूषण कौल "दीप"

(बूज़िव म्योन ॳज़्युक सबक़

podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)