04.03.2021

04.03.2021,फाल्गुन (फाल्गुन) गटॖ पछॖ (कृष्ण पक्ष) शॆयम (षष्ठी) ब्रसवार (ब्रहस्पतिवार/गुरुवार/वीरवार),श्री सप्तर्षि सम्वत 5096, नक्षत्र विशा, राश वृश्चिक (दुहचि 6.19 बजि प्यठॖ), ऋतु शिशर (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

      महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वाहा स्वधा नमोस्तुते

**************************

             नुंदॖ रॆशॖन्य श्रुक्य

अवल सुय ॴखॖर सुय

नदॖबल वऺसिथ मल कऻसिव

दस गुल्य गन्डिथ तस कुन ॴसिव

द्यवॖ कुनि दॊज़खॖनि नारॖ लऺसिव

               अर्थात

ग्वडॖ ति तॖ अंदॖ ति छु पानॖ दय। यारबलॖ श्रानॖ सॗत्य छु शरीर मल दूर सपदान मगर यॊद तस कुन गुल्य गऺन्डिथ शरण रूज़िव, त्यॆलि छु मनुक मल दूर सपदान। श्वद मन छु नरकॖनि नारॖ निश इन्सान बऺचिथ ह्यकान

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

            **********

1. फितनॖ (Mischief/Trouble/Revolt)

2. फितनॖ तुलुन (To create disturbance/To raise hue and cry)

3. फितनॖ अंगेज़ (Mischievous/Mischief monk)

4. फतूर (Defect/Disorder/Disturbance)

5. फतवा (Legal opinion/Judicial verdict)

                 मुहावरॖ

1. मु: वऺछ़्य मार नॖ बोज़ान कांह

         दांदॖ मार बोज़ान सऻरी

    अ: शुर्य सॖन्दिस मामलस छि नॖ

          सनान मगर बऺड्य सॖन्दिस

          छि

2. मु: वऺछ़िस लऻगिथ पऺछ़िस 

         वनुन

    अ: कांह ब्रोंह कनि ॴसिथ

          ब्यॆयिस कुन वनुन

3. मु: वऺछ़िस ग्यॆड तॖ दांदस लोद

    अ: ल्वकटिस बॊड तॖ बऺडिस

         ल्वकुट बोग,या,ना बराबरी

          (पनॖन्य शुर्य ह्यॆछॖनऻव्यूख)

**************************

प़चान्ग:- दपान अख ॳमीर शख़स गव वखतॖ अकि सख़ परेशान यि सूंचिथ ज़ि तऺम्यसॖन्दि मरनॖ पतॖ रोज़ि तऺम्यसॖन्ज़ सारि वऻन्सि कमऻवमॖच़ दौलत यॆतीय तॖ तथ मतन तऺम्यसॖन्द्य अंग ॴश्यनाव तॖ करन तऺम्यसॖन्दिस धन दौलतस ॴश्य आरामाह तॖ छ्यॊन्या ट्यॊन्या। सु ओस नॖ यछ़ान ज़ि यि सॊम्बरऻवमॖच़ दौलत गऺछ़ यिथ पऻठ्य लगॖन्य तिहॖन्द्यन अथन तॖ यिथॖ पऻठ्य लॖति छिति गछ़ॖन्य बल्कि ओस छ़ान्डान कांह तिछ़ वथा ज़ि यि सऻरॖय दौलत गॊछ़ सु ह्यकुन पानस सॗत्य स्वर्गस ताम वातॖनावुन। द्वह तॖ राथ वोत तस यी सोंचान तॖ प्रॖछ़ान रूद कॆंच़न सलाहकारन ज़ि किथ पऻठ्य वातॖनावि पानस सॗत्य यि दौलत स्वर्गस ताम। युस ति कांह बोज़ान ओस ॳमिस शखसॖ सुन्द युथ ख़याल सु ओस बोज़ान तॖ असन खंगाला त्रावान ॳमिस ॳमीर सॖन्दिस व्यॊखतुय ख़यालस प्यठ मगर सऺही राय तदबीर दिच़ॖनस नॖ कऻन्सि। यि शखस फ्यूर हटरि हटरि मगर बे-मतलब। सारॖवॖय वॊन ॳमिस शखसस ज़ि अज़ ताम छु नॖ कऻन्सि ति युथ ख़याल आमुत तॖ न छु अज़ ताम कऻन्सि हॖन्ज़ धन दौलत तऺम्यसॖन्दिस मरनस सॗत्य स्वर्गस ताम गऻमॖच़। हालांकि यि छि अख हकीकथ ज़ि पानस सॗत्य छु नॖ इन्सान किहीं निवान मगर ॳमिस शखसस ओसुन जॊनून गॊन्डॖमुत तॖ यछ़ान ओस छ़ान्डुन त्युथ काह सबीला युथ यि ह्यॆकिहे सऻरॖय कमऻवमॖच़ दौलत पानस सॗत्य स्वर्गस ताम वातॖनावॖन्य। फ़ेरान फ़ेरान थॊक यि रऺयीस इन्सान तॖ द्वह अकि वोत यि शख़स कथ ताम जंगलस मंज़ ॳकिस कुटियायि  निश तॖ वुछुन अख साधु बिहिथ कथ ताम ध्यानस मंज़। ॳम्य सूंच ज़ि यि साध छु पानॖ द्वन पलवन मंज़ यि क्याह ज़ानि ॳमीरी कथ छि वनान तॖ यि क्याह मशवरॖ ह्यॆकि दिथ। सूंचुन थख कऺडिथ कडॖ ब्रोंह कुन पडाव मगर ॳमिस क्याह ॴस पताह ज़ि ॳम्य सॖन्दि खयालुक समादान नेरि अतीय। ध्यान म्वकलऻविथ प्रुछ़ साधन ॳमिस शखसस अपऻर्य यिनुक मकसद।  कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

भूषण कौल "दीप"

(बूज़िव ॳज़्युक म्योन सबक़ podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)