11.03.2021

11.03.2021, फाल्गुन (फाल्गुन) गटॖ पछॖ (कृष्ण पक्ष) त्रुवाह (देवादेव) (त्रयोदशी) (देवादेव) ब्रसवार (ब्रहस्पतिवार/ गुरुवार/वीरवार) श्री सप्तर्षि सम्वत 5096, नक्षत्र धनि, राश कुम्भ (दुहचि 9.20 बजि प्यठॖ), ऋतु शिशर (चलान)..द्रठॖपऻन्च़ुक (पंचक) ति छु ॳज़्यकि प्यठॖ शुरु

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

      महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वाहा स्वधा नमोस्तुते

**************************

            नुंदॖ रॆशॖन्य श्रुक्य

आदन कऺरिथ पापन क्रशी

बुडिथ द्युतुथ रॆशी नाव

तसबी गऺयी गुनस हिशी

यि च्यऻन्य नॆमाज़ कऺशी हाव

           अर्थात

ल्वकॖचार रूदुख मऺस्ती मंज़ तॖ खऻरिथ पऻन्य पानस पापॖन्य बऻरीय। बुडिथ त्रऻवॖथ तऺसबी रॗफ गुनस पानस नऻल्य तॖ मोनुथ पनुन पान पानय ऱ़यॊश। यिमय छि चऻन्य कर्म तॖ यिहय छु च़्यॆ नॆमाज़ि हुन्द मतलब सीनस खॊनमुत।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

           **********

1. क़ऻबलियथ (Ablity/Capability/Competence/Fitness/Capacity/Accomplishment)

2. क़ऻबलि सज़ा (Punishable)

3. क़ऻतिल (Murderer/Assassin/Homicide)

4. क़ऻद (Imprisonment/Confinement)

5. क़ऻदि बामुशकत (Rigorous imprisonment)

               मुहावरॖ

1. मु: न छि ग़रीबी रोज़ान न छि

         ॳमीरी रोज़ान

    अ: प्रथ कांह चीज़ छु गऻर

         मुसत्किल, या, स्वख तॖ

         द्वख छु नॖ हमेशि रोज़ान

2. मु: न ज़ायस न प्यायस 

         नहकय रऺटनस हुर्य राज़न

    अ: हंगॖ मंगॖ कांह मुसीबत 

         वलनॖ युन।

3. मु: निमे दानम छु रहमति 

         जानम

   अ: लऻज़्यमी छु रहमति जान

       (पनॖन्य शुर्य ह्यॆछॖनऻव्यूख)

**************************

पंचान्ग:- ऊतरॖ नऺवमि मार्च 2021 द्वह गव म्यॆ मन स्यठाह ख्वश यि वुछिथ ज़ि सऻन्य नऺव पुय छि ज़ानुन यछ़ान पनुन प्वतकाल यानि तिहॖन्द्य ज़िठ्य क्याज़ि तॖ किथॖ पऻठ्य आयि कऺशीरि प्यठॖ च़ऺलिथ मगर यि बूज़िथ गऺयि म्यॆ हऻरऻनी ज़ि असि छॆ नॖ पानसॖय फुर्सतॖ पनॖन्यन शुर्यन तिहॖन्द्यन सवालन जवाब दिनॖ बापथ। यि छि अख विडम्बना ज़ि ॳस्य छि नॖ पानय तयार पनॖन्यन शुर्यन सॗत्य पनॖनि माजि ज़्यॆवि मंज़ कथ करनॖ बापथ तॖ अमि मूजूब छु नॖ सोन शुर व्वतलिथ ह्यकान तॖ न छु सु ह्यकान देवनागरियस मंज़ कऻशुर लीखिथ या कऻशुर पऺरिथ। सु छु यछ़ान तऺमिस गॊछ़ प्रोत्साहन मेलुन मगर तऺमिस छु नॖ कांह ह्यॆछनावन वोल मेलान। जे के विचार मंच संस्था छि स्यठाह जान कूशिश करान कऻशिर बच्चन सॖत्य कथ बाथ करनॖच तॖ यि ज़ानॖनॖच कूशिश करान ज़ि यिम कऻशिर्य बच्चॖ अज़कल लऺग्यमॖत्य छि अख होर तॖ अख योर तिमन मंज़ कोताह जज़बॖ छु पनॖन्य ज़बान, पनॖन्य सभ्यता, पनॖन्य संस्कार, पनॖन्य परम्परा रऺछ़रावनॖच। दूर दूर जायव प्यठॖ ॴस्य शुर्य बुलावनॖ आमॗत्य तॖ तिमन सॗत्य मोबाइलॖ दऺस्य कथ बाथ करान करान तॊर फिकिरी ज़ि सानि समाजिच नींव छि वुनि स्यठाह दऺर्य। सऻन्य नऺव पुय ह्यॆकि आरामॖ सान पनॖन्य प्रज़नथ बरकरार थऻविथ, मगर अशद ज़रुरथ छु तिमन डख दिनुक। यि डख ह्यकन सिरिफ त्युहुन्द मोल मऻज्य दिथ ब्यॆयि नॖ कांह। संस्थायन हॖन्ज़ कऻम छि यिमन शुर्यन ब्रोंहकुन वथ हावॖन्य मगर ज़िठ्यन हुन्द फर्ज़ छु शुरिस थफ कऺरिथ कदम क़दम ब्रोंहकुन पकनावुन। सान्यन शुर्यन छ नॖ कांह ति ख़ता। कॊसुरवार छि ॳस्य ज़ि ॳस्य छि नॖ ज़ऻनिथ मऻनिथ यछ़ान ज़ि सोन शुर गछ़ि पनॖनि माजि ज़्यॆवि सॗत्य जुडिथ रोज़ुन। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

*************************

नऺविव तॖ फॊलिव

भूषण  कौल "दीप"

(बूज़िव म्योन ॳज़्युक सबक़

podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)