15.03.2021

15.03.2021 फाल्गुन (फाल्गुन) ज़ूनॖ पछॖ (शुक्ल पक्ष) द्वय (द्विती) च़ऺन्दॖरवार (सोमवार)  श्री सप्तर्षि सम्वत 5096, नक्षत्र रेवती, राश मेष (रऻच़ हॖन्ज़ॖ 4.42 बजि प्यठॖ), ऋतु बसंत द्रठॖपऻन्च़ुक (पंचक) गछ़ि अज़ समाप्त

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ तॖ आय बत्तॖ। वुद्यूग करव मुकाम प्रावव। 

**************************

      महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

           नुंदॖ रॆशॖन्य श्रुक्य

ॳलिम बॊड तॖ कऺलिम सोदो

मुहम्मद पऻलिथ वुदि पकख वते

क्रय विरिन्य म्वख्तय लोदो

बावॖच दावथ सु तथ वते

           अर्थात

हे इन्सान! ज्ञान छु बॊड, कऺलिमॖ छु तमिच शान। हऺज़रत मुहम्मद सऻबॖन्यन वतन प्यठ पऺकिथ ह्यकख जल जल ब्रोंहकुन पकिथ। यिम वतॖ छि बेशक क्रेछि आसान, मगर क्रॆय विरनि मंज़ यॆलि ऱत्यव कर्मव रूप म्वख्तॖ बरख, तॆलि सपदन वतॖ आसान।तति छु सिरिफ बख्ति बावस म्वल। युस बावॖ तस नालॖ दियि सुय तरि अपोर।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

            ***********

1. कऻतिब (Calligraphist/Scrib)

2. काठ (Wooden piece/Dry branch of tree)

3. काठ बर (A door made of wooden pieces)

4. काठ गछ़ुन (To be tired/To fatigue/To strain)

5. काज (Button hole)

                 मुहावरॖ

1. मु: म्यॆच़ हय तुलख स्वन

         बऺनिनय

    अ: दय कऺर्यनय हमेशॖ रुत

2. मु: म्योन ॴसिथ च्योन गव

    अ: हमहऺस्ती हावॖन्य

3. मु: म्यूठ गामस क्रूठ पानस

    अ: सख्ती पानस वऻनिथ 

         ब्यॆयिस आराम द्युन

      (पनॖन्य शुर्य ह्यॆछॖनऻव्यूख)

**************************

पंचान्ग:- जबार खानन कॊर ती यि अमि बटॖ कोरि वॊनमुत ओस। पुलहारि ख्वरुक सूर मॊथुख ब्यमार सॖन्ज़ि तनि अरॖ वरॖ। दपान जबार खान सुन्द न्यॆचुव ह्यॊतुन ठीख सपदुन। यि वुछिथ आव जॆशॖन मनावनॖ च़्वपऻर्य। डोल नगारॖ आयि वायनॖ। खऻरात आयि बऻगरावनॖ। दपान सु संत युस पॊछ़ बऺनिथ शऻही मऺहलस मंज़ बॆहनावनॖ आमुत ओस आव माला माल करनॖ तॖ तमाम यज़तॖ तॖ एहतिरामॖ सान आव सु संत आज़ाद करनॖ। जबार खान दपान गव शर्मन्दॖ पनॖन्य यि हरकथ वुछिथ ज़ि बटन हॖन्ज़ हेरथ यानि शिवरात्रि फाल्गुनॖ प्यठॖ हारस ताम ज़बर्दऺस्यती वातनावनॖ बापथ। लूकव ह्यॊत वनुन ज़ि जबारॖ जंदॖ, हऻकिम द्राव स्यठाह गंदॖ, हारस ति बनोवुन वंदॖ। दपान जबार खानस बडेयि आस्था बटन हॖन्दिस धर्मस प्यठ। सु दपान आव बटन निश तॖ कऺरॖन सलाम ग्वडॖ तॖ तमि पतॖ कॊरुन मुबारक हऺरच़ हुन्द। दपान यि बूज़िथ ह्यॊत सारिवॖय मुसलमानव हेरच़ प्यठ बटन सलाम करॖन्य तॖ अज़ ताम छु यि द्वह तमी अन्दाज़ॖ यिवान मनावनॖ। शिव रात्रि पगाह ॴस्य बटन यिम मुसलमान तिहन्द्यन गरन गऺछ़िथ ग्वडॖ अदबॖ सान सलाम करान तॖ तमि पतॖ अदॖ मुबारकबाद दिवान। बटॖ ति आयि मुसलमानन यीज़ प्यठ ईद मुबारक करान तॖ दपान सलामि हॖन्ज़ प्रथा छि तनॖ प्यठय पकान आमॖच़। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

 भूषण कौल "दीप"

(बूज़िव म्योन ॳज़्युक सबक़

podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)